ގޭގައި އެކަނިހުރެ ނަމާދުކުރިނަމަވެސް، ދަންވަރު ހޭލައިގެން ނަމާދުކުރިނަމަވެސް ނިދާ ހެދުމުގައި ނަމާދުނުކުރާށެވެ. ނިދާ ހެދުމުގައި ނަމާދުކުރުމުން އަންގައިދެނީ ތިބާގެ ހިތުގައި ނަމާދުކުރުމަށް އޮތް ސަމާލުކަން ކުޑަކަމެވެ.
ދަންވަރު އެކަނިހުރެ ނަމާދުކުރިނަމަވެސް ނަމާދަށް ފެށީންސުރެ އެހުރެވެނީ ﷲ ތަޢާލާގެ ޙަޟްރަތުގައެވެ. ﷲ ތަޢާލާގެ ޙަޟްރަތަށް ޙާޒިރުވާންޖެހޭނީ ވީހައި ރީތިވެގެންނެވެ. ޒީނަތްތެރިވެގެންނެވެ.
ނިދާހެދުމުގައި ވެސް ނަމާދުކުރުން ހުއްދައެވެ. ނަމާދު ޞައްޙަވާނެއެވެ. ނަމަވެސް އެއީ އަދަބުގެ ގޮތުން ބެލިނަމަވެސް ދަށުދަރަޖައިގެ ކަމެކެވެ. ވީމާ ނިދާހެދުމާއިއެކު ނަމާދުކުރާނަމަ އެންމެ ކުޑަމިނުން މަތިން ރިވެތިފޭރާމެއްލާށެވެ.
ނަމާދަށް ރިވެތި ފޭރާންލައި ޒީނަތްތެރިވުމަކީ ނަމާދަށްދެވޭ ސަމާލުކަން އަންގައިދޭކަމެކެވެ. ނަމާދަށްވުރެ ބޮޑަށް މުސްލިމުން ސަމާލުކަންދޭންޖެހޭ އެހެންކަމެއް ނުއޮންނާނެއެވެ!
- އިސްލާމީ ތިލަފަތުގެ ދަރުސަކުން
