މިހާރަކަށް އައިސް އެންމެ ގިނައިން އިވޭ އެއް އަޑަކަށްވާނީ ކޮންމެވެސް މީހަކަށް ކޮންމެވެސް އަނިޔާއެއް ލިބެންދާކަމުގެ ޝަކުވާގެ އަޑެވެ. ގެއިގެ އެތެރެއާއި ބޭރުގައި އެންމެ ބާރަށް ގުގުމާލާފައި މިވަނީ އަނިޔާލިބެމުންދާ މީހުންގެ ރުއިމުގެ ވޭނީ އަޑެވެ!
އެންމެންނަށްހެން އެކިވަރުގެ އަނިޔާތައް ލިބެމުންދާ މިފަދަ ދުވަސްވަރެއެްގައި އަނިޔާގެ ކުރިމަތީގައި ސާބިތުވުމަށް އޮތްމަގާއިމެދު ގިނަބައަކު ސުވާލުކުރެއެވެ. އެފަދައިން ސުވާލުކުުރާ މީހުން ގާތު ބުނެލަން އޮތީ ދުނިޔެއިން ތިބާ ބޭނުންވާ ކަންކަން ހިތަށް ޖަމާކުރާށެވެ! އެއިރުން އުފާވެރިކަން ތިބާ އާއި ވަކިކުރުވުމަކީ ކުރެވޭނެކަމެއް ނޫނެވެ.
އެކަން ކުރެވޭނީ ﷲ ތަޢާލާ ހަނދުމަކުރުމުން ހިތްހަމަޖެހުން ލިބޭ މީހުންނަށެވެ. ދުނިޔެއިން ކަންކަމަށް ދަހިވެތިވާ، ދުނިޔެއަށް ލޯބިކުރާ މީހުންނަށް މިބުނިފަދަ ހިތްހަމަޖެހުމެއް ނުލިބޭނެއެވެ. އަބަދުވެސް އުޅެންޖެހޭނީ ކޮންމެވެސް ކަމަކާއިމެދު ކަންބޮޑުވެގެންނެވެ!
ޝައިޚުލް އިސްލާމް އިބްނު ތައިމިއްޔާ ރަޙިމަހުﷲ އެކަލޭގެފާނު ކަސްތޮޅު އަޅުވައި ކުޑަގޮޅިއަށް ލައި ބަންދުކުރި ހިނދު ވިދާޅުވީ ކީކޭތޯއެވެ؟ "މިބައިމީހުން އަހަރެން ކުޑަގޮޅިއަކަށް ލައި ބަންދުކުރުމުން އެމީހުންނަށް އަހަރެންނަށް އެކުރެވުނީ ކޮން ކަމެއް ހެއްޔެވެ؟ (މުރާދަކީ އެއްވެސް ހިތްދަތިކަމެއް ނުކުރެވެއެވެ.) އަހަރެންގެ ހުރިހާ އުފަލަކާއި ހިތްހަމަޖެހުމެއް ވަނީ އަހަރެންގެ ހިތުގައެވެ. އެބައިމީހުންނަށް އަހަރެންނާއި އަހަރެންގެ ހިތަކާ ވައްކެއް ނުކުރެވޭނެއެވެ."
މިއީ ވަރަށް ޢިބްރަތްތެރި ބަސުފުޅެކެވެ. މިބަސްފުޅަށް ޢަމަލުކުރެވިއްޖެނަމަ މީހަކު ކޮށްފާނެ އަނިޔާއަކަށް ދޫފާނެ ގެއްލުމަކަށް ކަންބޮޑުވެގެން އުޅޭކަށް ނުޖެހޭނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
