ބައެއް މީހުން އެމީހުންނަށް ﷲ ތަޢާލާ މުޢްޖިޒާތް ނުދައްކަވާ ކަމަށް ބުނެ ވާހަކަދައްކައެވެ. އެއީ އެމީހުންނަށް ވިސްނޭ ގޮތެވެ. ދުނިޔެއާއި ދުނިޔޭގައިވާހައި އެއްޗަކީ މުޢްޖިޒާތެވެ. އެއިގެ ތެރެއިން އެންމެ ފުރިހަމަ އެއް މުޢްޖިޒާތަކީ އިންސާނާއެވެ. އިންސާނާގެ ހަށިގަނޑު އުފައްދަވާފައިވާ ގޮތެވެ.
ކުޅަދުންވަންތަކުގެ އެންމެ ބޮޑު އެއް ހެއްކަކީ ﷲ ތަޢާލާ އިންސާނާއަށް ދެއްވަވާ ނިޢްމަތްތަކެވެ. އެއްވެސް ނިޢްމަތެއް އެކަލާނގެ އަނބުރައި ގެންދަވައިފިނަމަ ނުވަތަ ނުދެއްވަވާނަމަ ނުލިބޭނެއެވެ. މިސާލަކަށް ފެނުމުން، އަޑު އިވުމުން މަޙްރޫމް ކުރައްވަވައިފިނަމަ އެއިން ނިޢްމަތެއް ލިބިގަނެވޭނެ އެއްވެސް ގޮތެއް ނެތެވެ.
މިސާލަކަށް އަޑުއިވުމުން މަޙްރޫމް ކުރައްވަވައިފި މީހަކަށް އަޑު އިއްވޭނެ ގޮތެއް ނެތެވެ. ފެނުމުން މަޙްރޫމްކުރައްވަވައިފި މީހެއްގެ ލޮލަށް ފެންނާނެ އެއްވެސް ގޮތެއް ނެތެވެ. އެފަދަ ލެންސެއް އަދި އަިނެއްވެސް މިހައިތަނަށް އުފެއްދިފައެއް ނުވެއެވެ. ނުވެސް އުފެއްދޭނެއެވެ.
މިސާލަކަށް ދުލަށް ބަލައިލާށެވެ! ދޫ އޮތް ނަމަވެސް ވާހަކަ ދެއްކޭނީ ﷲ ތަޢާލާ އިރާދަ ކުރެއްވެވި އަޅަކަށެވެ. އަދި ދުލުގައި އެއްޗެތި ޖެއްސި ނަމަވެސް އެންމެ ކުޑަމިނުން ރަހަ އެނގޭނީވެސް އެކަމުގެ ހިއްޞު ދެއްވަވާފައިވާނަމައެވެ.
ދެން އޮތީ ފުރާނައެވެ. ﷲ ތަޢާލާ އެމީހެއްގެ ފުރާނަ ގެންދަވައިފި މީހަކަށް އަލުން ދިރުން ދިނުމަކީ ކުރެވޭނެ ކަމެއް ނޫނެވެ. ދުނިޔޭގެ ހުރިހާ ޑޮކްޓަރުންނާއި ޢިލްމުވެރިން އެކުވި ނަމަވެސް ދރުން ނުދެވޭނެއެވެ. ﷲ ތަޢާލާ އެމީހެއްގެ ފުރާނަ ގެންދަވާފައިވާ ހަމައެކަކަށްވެސް އެނބުރި ދުނިޔެއަށް އާދެވިފައިނުވާކަން އެކަމުގެ ދަލީލަކަށް ފުދި އިތުރުވާނެއެވެ.
ވީމާ މިކަންކަމަށް އެކަނި ވިސްނައިލި ނަމަވެސް ތިމާއަށް މުޢްޖިޒާތެއް ނުދައްކަވައިގެން އެކަމުގެ ވާހަކަ ދެއްކޭކަށް ނެތެވެ. މުޢްޖިޒާތްތައް މިހިރީ ބަލައިލި ކޮންމެ ކަމަކުން ފެންނާށެވެ!
- އިސްލާމީ ތިލަފަތުގެ ދަރުސަކުން
