މުސްލިމަކާއި ދިމާއަށް އެއްވެސް މީހަކު އޭނާއަކީ ކާފިރެއް ނުވަތަ އިސްލާމް ދީނާއި ދެކޮޅު މީހެއް ކަމަށް ބުނުމަކީ އިސްލާމް ދީން ހުއްދަކުރާ ކަމެއް ނޫނެވެ. އަދި އެއީ ﷲ ތަޢާލާއަށް ބިރުވެތިވާ އެއްވެސް މުސްލިމަކު ކޮށްގެންވާނެ އަދި ކުރާނެ ކަމެއް ވެސް ނޫނެވެ.
ނަމަވެސް ވިސްނާލަންޖެހޭ ކަމަކީ މީހުން މުސްލިމުންނަށްވަނީ ކިޔާ ނަމަކުން ނޫންކަމެވެ. އިސްލާމުންނަށް ކިޔާ ނަމެއް ކިޔާ ނަމެއް ކިޔާ ކޮންމެ މީހަކީ މުސްލިމެއް ނޫނެވެ. މުސްލިމަކަށްވާނީ ކީރިތި ޤުރްއާން އެންމެ ފުރިހަމަ ގޮތުގައި ޤަބޫލުކޮށް އަދި ރަސޫލްﷺ ގެ ސުންނަތް ޤަބޫލުކުރުމުންނެވެ. ޝަހާދަތުގެ ދެކަލިމަ ދުލުން ކިޔައި އެއިގެ މާނަހިތުގެ އަޑިން ޤަބޫލުކޮށް ޢަމަލުވެސް ކުރުމުންނެވެ.
މުސްލިމަކަށް އޮޅުމެއްގެ ތެރެއިން ނުބައި ބަހެއް ބުނެވިދާނެއެވެ. ނަމަވެސް މުސްލިމަކީ އެފަދަ ނުބައިބަސްތައް ތަކުރާރުކުރާނެ މީހެއް ނޫނެވެ. ބުނާ ބަހުން އިތުރު މާނަތައް ދޭހަވާގޮތަށް ދީނުގެ ވާހަކަތައް ދައްކައި ދީނުގެ ކަންކަމަށް އޮޅުން އަރުވަން މަސައްކަތްކުރާނެ މީހެއް ނޫނެވެ. އަދި ފައުޅުގައި އިސްލާމް ދީނަށް ގޮންޖަހައި މަލާމާތްކޮށް ފުރައްސާރަކުރާ މީހަކު، ޖަމާޢަތެއް ޙިމާޔަތެއްވެސް ނުކުރާނެއެވެ. އެދަ ކަންކަން ކުރާ މީހަކަށް ޖަމާއަތަކަށް ތާއީދެއްވެސް ނުކުރާނެއެވެ. ތިމާއަށް އެފަދަ ކަމެއް ކުރެވިއްޖެނަމަ ތައުބާ ވުމަށް ކޮންމެ މުސްލިމަކުވެސް އަވަސްވެގަންނާނެއެވެ.
ސުވާލަކީ މުސްލިމަކު އިސްލާމް ދީނުގެ ޙުކުމްތަކަށް ގޮންޖަހާނެހެއްޔެވެ؟ ކީރިތި ޤުރްއާނަށް ކުޑައިމިސް ބަސް ބުނާނެ ހެއްޔެވެ؟ ﷲ ތަޢާލާ އަށާއި ރަސޫލް ﷺ އަށް މަލާމާތާއި ފުރައްސާރަކުރާނެ ހެއްޔެވެ؟ އިސްލާމް ދީނުގައި ކުރުން ލާޒިމް ކަންކަން ކުރަން ނުޖެހޭނެ ކަމަށް ބުނާނެ ހެއްޔެވެ؟
އިސްލާމް ދީން ޤަބޫލުކޮށްގެން ހުރި މީހަކު މިފަދަ ޢަމަލެއްކޮށްފިނަމަ އެމީހަކަށް ފުރަތަމަ އޮތީ ތައުބާވުމުގެ ފުރުޞަތު ދިނުމެވެ. ތައުބާ ނުވިނަމަ އޮތީ އެންމެ ހަރުކަށި އަދަބުދިނުމެވެ. މިއީ އެއްވެސް މީހަކަށް ބަދަލުކުރެވޭނެ ޙުކުމެއް ނޫނެވެ. އޮތީ ތަންފީޒްކުރުމެވެ.
ތިމާއަކީ މުސްލިމަކު ކަމަށް ބުނާ މީހަކު އިސްލާމް ދީނުގެ ޙުކުމްތަކަށް ގޮންޖަހައި ކީރިތި ޤުރްއާނަށް ކުޑައިމިސް ބަސް ބުނެ ﷲ ތަޢާލާ އަށާއި ރަސޫލް ﷺ އަށް މަލާމާތާއި ފުރައްސާރަކޮށް ކުޑައިމިސްބަސްބުނެ އިސްލާމް ދީނުގައި ކުރުން ލާޒިމް ކަންކަން ކުރަން ނުޖެހޭނެ ކަމަށް ބުނާނަމަ އަދި ﷲ ތަޢާލާ ބާވައިލެއްވެވި ޙުކުމްފުޅުތަކަށްވުރެ މޮޅު ގޮތް އެމީހަކަށް އެނގޭކަމަށް ބުނާނަމަ އެމީހަކީ އިސްލާމް ދީނާއި ދެކޮޅު، ލާދީނީ މީހެއް ކަމަށް މުސްލިމުން ބުނާނެއެވެ. ކާފިރުން އެމީހަކަސް ތައްރީފްކުރާނެއެވެ. މެޑްލްތަކާއި ޢިއްޒަތްވެސް ދޭނެއެވެ.
އެމީހެއްގެ ޢަމަލުތައް ނުބައިވެ ހައްދުފަހަނައަޅައި ދިއުމުން އެމީހަކަށް ﷲ ތަޢާލާ ލަޢްނަތްލައްވަވާ ކަމާއި ނަމަވެސް ޝައިޠޯނާ އެމީހަކަށް ޝަރަފުގެ ތާޖްދޭކަން އެއީ މުސްލިމުން ޤަބޫލުކުރާ ޙަޤީޤަތެކެވެ.
ކަންކަން ހުރީ މިމަގުން ކަމަށްވުމުން ޝައިޠޯނާ ޢިއްޒަތާއި ޝަރަފްގެ ތާޖްޑޭ ހިސާބަށް އެއްވެސް މީހެއްގެ ކަންކަން ހިނގައްޖެނަމަ އެމީހަކާއިމެދު ބުނަން އޮތް ޙައްޤުބަސް މުސްލިމުން ބުނާނެއެވެ. އެއީ ފާސްކުރާ ޤާނޫނަކުން މަނާކުރެވޭނެ ކަމެއް ނޫނެވެ.
ރާއްޖޭގެ ފަހުގެ ތާރީޚުގައި މިފަދަ ކަންކަން ހިނގާފައި އެބަހުއްޓެވެ. ޢިލްމުވެރިން ގެންދަވަނީ ޙައްޤުބަސް ވިދާޅުވަމުންނެވެ. އެފަދަ ބަސްފުޅު ވިދާޅުވަނީ އެކަންކުރާ މީހާއަށް ބައްލަވައިގެނެއް ނޫނެވެ. އެމީހަކު ކުރާ އަމަލަށް ބައްލަވައިގެނެވެ. އެމީހަކު ދައްކާ ވާހަކައަށް ބައްލަވައިގެނެވެ.
ވީމާ މަޖިލީހުން މިހާރު ފާސްކުރަން މިއުޅޭ ޤާނޫނުން ޙިމާޔަތްދޭން މަސައްކަތްކުރަނީ ކޮންބައަކަށްކަމާއި އެކަމުގެ ސަބަބުން ނުކުންނާނީ ކޮން ނަތީޖާއެއްކަމާއިމެދު މިވަނީ ވަރަށް ފުންކޮށް ވިސްނަން ޖެހިފައެވެ.
ރައްޔިތުންގެ މަޖިލީހުގައި ބައެއް މެންބަރުން މިހާރުވެސް ގެންދަނީ އިސްލާމް ދީނާއި ދެކޮޅު ވާހަކަތައް ދައްކަމުންނެވެ. އެގޮތަށް ދައްކާ ވާހަކައަކު ކުށްވެރި ނުވާނެ ގޮތަށް އެތިބީ ޤަވާއިދެއްވެސް ފާސްކޮށްގެންނެވެ. އިތުރަށް ކުރަން މިއުޅޭ ކަމަކީ މަޖިލީހާއި އެނޫންވެސް ތަންތަނުގައި ﷲ ތަޢާލާ އާއި ދެކޮޅަށް، އިސްލާމް ދީނާއި ދެކޮޅަށް ވާހަކަދައްކައި ކީރިތި ޤުރްއާނަށް ގޮންޖަހާ، ﷲ ތަޢާލާ އަށާއި ރަސޫލް ﷺ އަށް މަލާމާތާއި ފުރައްސާރަކުރާ މީހުން ޙިމާޔަތްކުރުން ކަމަށްވެ އެމީހުން ދައްކާ އެފަދަ ވާހަކަތަކަށް ދީނީ ޢިލްމުވެރިންނަށް ރައްދު ނުދެވޭނެ ގޮތް ވެސް ހެދުން ކަމުގައިވެއްޖެނަމަ އެކަމަކީ އިސްލާމް ދީނުގެ އަޞްލާއި އެއްގޮތަށް ކުރެވޭ ކަމަކަށްވާނެތޯއެވެ؟
މިދިވެހި ޤައުމުގައި އެހެން ދީނަކަށް ފުރުޞަތު ނުދެއްވަވާނދޭވެ! އެފަދަ ފިކުރުގައި މަސައްކަތްކުރާ ޚާއިނުންގެ ކިބައިން މި ޤައުމު ސަލާމަތްކުރައްވަވާނދޭވެ!
ދިވެހި ޤައުމު ފުރިހަމަ މިނިވަން، ސައްތައިން ސައްތަ މުސްލިމް ޤައުމެއްގެ ގޮތުގައި އަބަދަށް ލަހައްޓަވާށި! އާމީން
