މާތް ﷲ އެކަލާނގެ އިޚްތިޔާރުކުރައްވަވާ އަޅުންނަށް ފުރުޞަތު ދެއްވަވައެވެ. ފޭލްވުމުން އަނބުރާ ގެންދަވައެވެ. އަދި ދެވަނަ ފަހަރަށް ވެސް ފުރުޞަތު ދެއްވަވައެވެ. ދެއްވަވާ ދެވަނަ ފުރުޞަތުގައިވެސް ކުރިއަށްދާން ނުއެނގި އަމިއްލަ ގެދޮރު ވިއްކާލަންޖެހޭ ޙާލަތަށް ދިއުމުން އެމީހާއަށް ކިޔާނެ "ފޭލިއާ" ނޫން ނަމެއް އަޅުގަނޑަކަށް ނުއެނގެއެވެ.
ދުނިޔޭގެ އެހެން ޤައުމުތައް ފަދައިން ރާއްޖެއަށްވެސް ކުރިމަތިވެފައިވަނީ މިހައިތަނަށް ކުރިމަތިވި އެންމެ ނުރައްކައުތެރި ޙާލަތެވެ. އެއްފަރާތުގައި ކޮރޯނާގެ ވަބާއެވެ. ކޮންމެ ދުވަހަކު އެތައްސަތޭކަ ބައަކު ބަލިވަމުންދާއިރު އަނެއްބައި ދުވަސްދުވަހު ބަލިވާ މީހުންގެ ޢަދަދު 2000 އަށްވުރެވެސް މަތިވަނީއެވެ. މުޅި ރާއްޖެއަށްހެން ފެތުރުނީއެވެ. އަނެއްފަޅިން ބަލައިފިނަމަ ވިޔަފާރިތައް ބަނގުރޫޓުވަމުންދަނީއެވެ. ގިނަ ބައަކު ދަރަނިވެރިވެ ބަނޑަށް ޖެހެމުންދަނީއެވެ.
މިފަދަ ނާޒުކް ޙާލަތުގައި ޤައުމުގެ ކަންކަން ހުރިއިރުވެސް މިހާލަތުން ޤައުމު ސަލާމަތްކުރުމުގެ އެންމެ އިސްމަޤާމުތަކުން މިފެންނަނީ މާތް ﷲ ދެއްވެވި ދެވަނަ ފުރުޞަތުގެ ބޭނުންވެސް ކުރަން ނުއެނގުމުން ބަނގުރޫޓުވެ އަމިއްލަ ގެދޮރު ވިއްކާލަން ޖެހުނު މީހުންނެވެ.
އެޙާލަތަށް އެއްޗެއް ބުނާކަށް ނެތީމެވެ. ނަމަވެސް އަޅުގަނޑުގެ ސުވާލަކީ އެފަދަ މީހަކަށް މިޙާލަތުގައި ޤައުމުގެ ކަންކަން ޒިންމާދާރުކަމާއިއެކު ބެލެހެއްޓިދާނެތޯއެވެ؟ ރައްޔިތުންނަށް ބޭނުންވާ ޚިދުމަތް ފޯރުކޮށްދެވިދާނެތޯއެވެ؟ އަމިއްލަ ވިޔަފާރި މެނޭޖް ނުކުރެވި ބޮޑުތަނުން ފޭލްވެ ގެދޮރު ވިއްކަން ޖެހުނު މީހަކަށް ޤައުމުގެ ކަންކަން މެނޭޖް ކުރެވިދާނެތޯއެވެ؟ މިއީ ޤައުމުގެ ކަންކަމަށް ވިސްނާ މީހެއްގެ ޙައިޞިއްޔަތުން އަޅުގަނޑުގެ ހިތުގައި އުފެދޭ ސުވާލުތަކެވެ.
10 އަހަރުގެ ލޯބިލޯބި ކުއްޖަކަށް ދުނިޔެ ދޫކުރަންޖެހުމުން މިއަދު އެންމެން އެދައްކަނީ އެވާހަކައެވެ. މާދަމާ ކުރިމަތިލާންޖެހޭނެ ޙާލަތެއް ނުއެނގޭތީ ކަންބޮޑުވާންޖެހޭ ވާހަކައެވެ. މިފަދަ ކަންބޮޑުވުންތަކުން އަރައިގަނެ ކުރިއަށް ދެވޭނީ ޤައުމުގެ އިސްމަޤާމްތަކަށް އިސްކުރާ މީހުންނަކީ ވަކި ޢާއިލާއަކަށް ނިޞްބަތްވުމުން މަޤާމްދޭ މީހުންނަށް ނުހަދައި ކަންކަން ކުރަން ޤާބިލު، ކިޔަވައި ޢިލްމުވެރިވެގެން ތިބި މީހުން ކަންކަމަށް އިސްކޮށްގެން ކަމަށް ފެންނާތީ އަޅުގަނޑުގެ ވިސްނުން ހާމަކޮށްލީއެވެ!
ރައީސް ޞާލިޙްގެ އަރިހުން އެދެނީ ޤައުމު ޣަރަޤް ނުވަނީސް މިފަދަ ކަންކަމާއިމެދު އިތުރަށް ވިސްނަވައިލަދެއްވުމަށެވެ!
- މިއަދުނޫހުގެ ކިޔުންތެރިއެއް
