ރަސޫލް ﷺ ގެ ޙަދީޘްފުޅެއްގެ މާނައިގައިވެއެވެ. "ބަނޑުހައިވެގެން ތިބި 2 ހިޔަޅު ވީއްލިފައިވަނިކޮށް ބަލަހައްޓާނެ މީހަކު ނެތި އޮތް ބަކަރި އައިނެއް ފަދަ ޖަނަވާރުތަކެއް ފެނިއްޖެނަމަ އެ ޖަނަވާރުތަކަށް ދޭނެ ގެއްލުން ހިތައް ގެނެސްބަލާށެވެ."
ހިޔަޅަކީ ސިންގާތަކާއިވެސް ޚިލާފަށް ކާންބޭނުންވާވަރަށްވުރެ ގިނަ ތަކެއްޗަށް ގެއްލުންދޭ އެއްޗެކެވެ. އަދި ތަކެއްޗަށް ގެއްލުން ދިނުމުގައި ހައްދުފަހަނައަޅާފައިވާ އެއްޗެކެވެ. ހިޔަޅުގެ ކިބައިން ތަކެތި ސަލާމަތްކުރަން ދަނޑުވެރިން/ ބަކަރި ގެންގުޅޭ މީހުން ކުއްތާ ބައިތިއްބައި އެހައި ބޮޑު ސަމާލުކަމެއް ދެނީ އެ ސަބަބަށްޓަކައެވެ.
އަދިވެސް ޙަދީޘްފުޅުގެ މާނައިގައިވެއެވެ. "މީހަކު ތަނަވަސްކަމަށާއި މަޝްހޫރުވުމަށް ދަހިވެތިވެއްޖެނަމަ އެމީހެއްގެ ކިބައިން ދީނަށް (އިސްލާމް ދީނަށް) ލިބޭނެ ގެއްލުން، ކުރިން މިބަޔާންކުރި ޙާލަތުގައި އެ 2 ހިޔަޅުގެ ކިބައިން ބަކަރިތަކަށް ލިބޭނެ ގެއްލުމަށްވުރެ މާބޮޑުވާނެއެވެ."
މީސްތަކުންނޭވެ! ފައިސާއަށް ދަހިވެތިވުމާއި އަދި ތިމާގެ މަޝްހޫރުކަން އިތުރުކުރަން ހިތުގައި ޝައުޤުވެރިކުރުވުމަކީ ހިތުގައި މިބަޔާންކުރި ފަދައިން 2 ހިޔަޅު ގެންގުޅުން ފަދަކަމެކެވެ. އެ 2 ޖަނަވާރު އަހަރެމެންގެ ދީން ނަގައިލުވާނެއެވެ. ދީނަށް ބޮޑެތި ގެއްލުންތައް ދޭނެއެވެ.
- އިސްލާމީ ތިލަފަތުގެ ދަރުސަކުން
