އަހަރެމެން މި އުންމީދުކުރަނީ އަހަރެމެންނަކީ މުއްމިނުން ކަމުގައިވުމަށެވެ. އެހެންކަމުން މި 3 އާޔަތަށް ވިސްނައިލަމާހެއްޔެވެ؟
إِنَّمَا الْمُؤْمِنُونَ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ آيَاتُهُ زَادَتْهُمْ إِيمَانًا وَعَلَىٰ رَبِّهِمْ يَتَوَكَّلُونَ
"މުއުމިނުން ވާކަން ކަށަވަރީ، ﷲ ހަނދުމަކުރާހިނދު އެއުރެންގެ ހިތްތައް ބިރުވެތިވާ މީހުން ކަމުގައެވެ. އަދި އެކަލާނގެ (ބާވައިލެއްވި) އާޔަތްތައް އެއުރެންނަށް ކިޔައިދޭހިނދު، އެއުރެންގެ އީމާންކަން އިތުރުވާ މީހުން ކަމުގައެވެ. އަދި އެއުރެންގެ ވެރިރަސްކަލާނގެއަށް ވަކީލްކުރާ މީހުން ކަމުގައެވެ." (އަލް އަންފާލް: 2)
الَّذِينَ يُقِيمُونَ الصَّلَاةَ وَمِمَّا رَزَقْنَاهُمْ يُنفِقُونَ
"އެއުރެންނީ، ނަމާދު ޤާއިމް ކުރާ މީހުންނެވެ. އަދި އެއުރެންނަށް ތިމަންރަސްކަލާނގެ ދެއްވި ތަކެތިން ހޭދަކުރާ މީހުންނެވެ." (އަލް އަންފާލް: 3)
أُولَٰئِكَ هُمُ الْمُؤْمِنُونَ حَقًّا ۚ لَّهُمْ دَرَجَاتٌ عِندَ رَبِّهِمْ وَمَغْفِرَةٌ وَرِزْقٌ كَرِيمٌ
"ޙަޤީޤަތުގައި މުއުމިނުންނަކީ، ހަމަ އެއުރެންނެވެ. އެއުރެންގެ ވެރިރަސްކަލާނގެ ޙަޟްރަތު ގައި މަތިވެރި ދަރަޖަތަކާއި، ފާފަފުއްސެވުމާއި، ދީލަތިވެގެންވާ ރިޒުޤް އެއުރެންނަށް ހުށްޓެވެ."
(އަލް އަންފާލް: 4)
އަހުރެމެންނަކީ ނަމާދުކުރާ އަދި ޞަދަޤާތްވެސްދޭ ބައެކެވެ. ނަމަވެސް ކުރިމަތިވަމުން އަންނަ އެއްކަންތައް ފާހަގަކޮށްލާނަމެވެ. އެއީ ފުރަތަމަ އާޔަތުގައި ބަޔާންކުރައްވަވާފައިވާ ދެ ކަންތަކެވެ.
"މުއުމިނުން ވާކަން ކަށަވަރީ، ﷲ ހަނދުމަކުރާހިނދު އެއުރެންގެ ހިތްތައް ބިރުވެތިވާ މީހުން ކަމުގައެވެ. އަދި އެކަލާނގެ (ބާވައިލެއްވި) އާޔަތްތައް އެއުރެންނަށް ކިޔައިދޭހިނދު، އެއުރެންގެ އީމާންކަން އިތުރުވާ މީހުން ކަމުގައެވެ."
އަމިއްލަ ނަފްސާއި ސުވާލުކޮށްލާށެވެ! ﷲ ތަޢާލާގެމަތިން ހަނދުމަވުމުން ބިރުވެތިވެވޭހެއްޔެވެ؟ އަދި ޤުރްއާނުގެ އާޔަތްތަކުގެ އަޑު އިވުމުން އީމާންކަން އިތުރުވޭހެއްޔެވެ؟
"އަދި އެއުރެންގެ ވެރިރަސްކަލާނގެއަށް ވަކީލްކުރާ މީހުން ކަމުގައެވެ." ސުވާލަކީ ކަންކަން ދިމާވުމުން ފުރިހަމަ ގޮތުގައި ވަކީލްކުރެވޭހެއްޔެވެ؟ ތެޅިފޮޅިނުގަނެ މަޑުން ހުރެވޭ ހެއްޔެވެ؟ މިއީ ﷲ ތަޢާލާ މިންވަރުކުރެއްވެވި ކަންކަން ކަމާއި ހެޔޮރަޙްމަތް މިންވަރުކުރައްވަވާނެކަމަށް އިތުބާރުކުރެވޭހެއްޔެވެ؟"
މިކަންކަމަކީ ވަރަށް ބޮޑަށް ވިސްނައި ސަމާލުކަންދޭންޖެހޭނެ ކަންތައްތަކެވެ. ފުރިހަމަ މުއްމިނަކަށްވުމަށް އަބަދުވެސް ގަދައަޅައި މަސައްކަތްކުރަންވާނެވެ. މިއާޔަތްތަކުގައިވާފަދަ މުއްމިނަކަށްވެވޭނީއެއިރުންނެވެ. އަދި މުއްމިނުންނަށް ދެއްވަވާނެ ކަމަށް ބަޔާންކުރައްވަވާފައިވާ މިޢްމަތްތައް ލިބޭނީވެސް އެއިރުންނެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
