އަހަރެމެންގެ ތެރެއިން ގިނަ މީހުންނަކީ ކިތަންމެ ކުޑަކުޑަ މުޞީބާތެއް، ހިތްދަތިކަމެއް ކުރިމަތިވިނަމަވެސް އެއީ މާބޮޑުކަމެއް ދެކި ކަންބޮޑުވެގެން އުޅޭ ބައެކެވެ. އެހެނަސް ކަމުގެ ޙަޤީޤަތަށް ބަލައިލަމާހެއްޔެވެ؟
ޙަޤީޤަތަކީ ތިބާއަށް ކުރިމަތިވާ މުޞީބާތްތަކަކީ، ﷲ ތަޢާލާ ތިބާދެކެ ލޯބިވެވޮޑިގެންނަވާކަމުގެ ޢަލާމާތެއްކަމެވެ. އަދި އެއީ ސުވަރުގެ އަށް ވާސިލު ވުމަށް ތިބާއަށް ކޮށިގެންދާ މަގެއްކަމުގައި ވެގެންދާކަމެވެ.
ނަބިއްޔާ ޞައްލައްﷲ ޢަލައިހި ވަސައްލަމަ ޙަދީޘް ކުރައްވާފައި ވެއެވެ.
(إِنَّ عِظَمَ الْجَزَاءِ مَعَ عِظَمِ الْبَلاءِ ، وَإِنَّ اللهَ إِذَا أَحَبَّ قَوْمًا ابْتَلاهُمْ ، فَمَنْ رَضِيَ فَلَهُ الرِّضَا ، وَمَنْ سَخِطَ فَلَهُ السُّخْطُ)
މާނައީ: "ހަމަކަށަވަރުން ބޮޑުވެގެންވާ ދަރުމަލިބުންވަނީ، ބޮޑުވެގެންވާ މުޞީބާތް ކުރިމަތި ވުމަށް ފަހުގައެވެ. އަދި ހަމަކަށަވަރުން ﷲ ތަޢާލާ ބަޔަކުމީހުންދެކެ ލޯބި ވެވޮޑިގަންނަވައިފިނަމަ، އެބައިމީހުން އިމްތިޙާނު ކުރައްވައެވެ. ފަހެ އެކަމަށް ރުހިއްޖެ ކަމުގައި ވަނީނަމަ، ﷲ ތަޢާލާގެ ރުއްސެވުން އެމީހެއްގެ މައްޗަށްވެއެވެ. އަދި އެކަމާއި ނުރުހިއްޖެ ކަމުގައި ވަނީނަމަ، ﷲ ތަޢާލާގެ ކޯފާ، އެމީހެއްގެ މައްޗަށްވެއެވެ."
(السلسلة الصحيحة) 1 / 227
--އިސްލާމީ ތިލަފަތުގެ ދަރުސަކުން
