ދަހި މީހުން ދަނީ ގިނަވަމުންނެވެ. ފަޤީރަކު ކަމަކު އެދިގެން އަތުވެއްޖެނަމަ އެމީހެއްގެ ބުރަކަށީގައި އަތްއަޅައި ކޮއްޕާ ދުރައްލާ މީހުން ގިނަވެއްޖެއެވެ. އިންސާނެއްގެ ފުރާނަ ސަލާމަތްކުރަން ބޭނުންވާ ބޭސްފަރުވާއަށް އެދިގެން ސަލާންޖަހަން ދިއަނަމަވެސްމެއެވެ. އަސާސީ ބޭނުމެއް ނުފުއްދިގެން ދިއަނަމަވެސްމެއެވެ.
ތިމާއަށް ﷲ ތަޢާލާ ދެއްވެވި ތަނަވަސްކަން ތިމާގެ ކިބައިގައި ހުރެމެ، ނެތްކަމަށް ބުނެ ދޮގުހަދަން ޖެހިލުމެއްނުވެއެވެ. އެ ބުނާ ދޮގު ބަސްތައް ﷲ ތަޢާލާ އައްސަވައި ވޮޑިގެންވާކަންވެސް އެމީހުންގެ ހަނދާނަކު ނުހުރެއެވެ.
ﷲ ތަޢާލާގެ ވަޙީ ބަސްފުޅު ބަލައި ކިޔާށެވެ!
"އަދި ދަހިވެތިވެ، ﷲ ފިޔަވައި އަމިއްލަޔަށް ފުދިގެންކަމަށްހީކޮށް، އަދި އެންމެ ހެޔޮބަސް ދޮގުކުރިމީހާ ދަންނާށެވެ!"
"ފަހެ، ތިމަންރަސްކަލާނގެ ދަތިކަންހުރި މަގަށް އެމީހަކަށް މަގު ފަހިކޮށްދެއްވާ ހުށީމެވެ."
"އަދި އެމީހާ ( ނަރަކަޔަށް ) ވެއްޓޭހިނދު، އެމީހާގެ މުދާ އެމީހާޔަށް އެއްވެސްކަމެއް ފުއްދައެއް ނުދޭނެތެވެ."
(އައްލައިލް: 9،10،11)
ދެން ބަލާލަންވީ ﷲ ތަޢާލާ ދެއްވެވި ތަކެތިން ހޭދަކުރާ މީހުންނަށް ދެއްވަވާ ރަޙްމަތަށެވެ.
" ފަހެ) މުދަލުން (ހޭދަކޮށް) ﷲ އަށް (ތަޤްވާވެރިވެ، އަދި އެންމެ ހެޔޮބަސް ތެދުކުރިމީހާ ދަންނާށެވެ!"
" ފަހެ، ތިމަންރަސްކަލާނގެ ފަސޭހަކަން ހުރިމަގަށް އެމީހަކަށް މަގު ފަހިކޮށްދެއްވާ ހުށީމެވެ" .
މީސްތަކުންނޭވެ! ދީލަތިވާށެވެ! ތިބާގެ އަތުގައިވާ ތަނަވަސްކަމަކީ އެއްވެސް ޙާލެއްގައި ތިބާގެ މިލްކެއް ނޫނެވެ. އެއީ ހަމަ ދާދި ކުޑަކުޑަ ހިނދުކޮޅަށް ތިބާ އާއި ޙަވާލުކުރައްވަވާފައިވާ ﷲ ތަޢާލާގެ އަމާނާތެކެވެ. އަމާނާތަށް ތެދުވެރިވެ އެއިގެ ޙައްޤުވެރިންނަށް އަދާކުރުމުން ތިބާއަށް ލައްވަވާނެ ރަޙްމަތާއި އަދި ޚިޔާނާތްތެރިވުމް ދެއްވަވާނެ ޢަޛާބުވެސް މިއޮތީ ހާމައަށް ފެންނާށެވެ!
- އިސްލާމީ ތިލަފަތުގެ ދަރުސަކުން
