الحمد لله والصلاة والسلام على رسول الله وعلى آله وصحبه أجمعين.
ﷲ ތަޢާލާވަނީ ބައިތުލް މަޤްދިސްއަކީ ބަރަކާތްލެއްވިގެންވާ ތަނެއްކަމުގައި ލައްވާފައެވެ.
އެއިލާހު ވަޙީކުރައްވާފައިވެއެވެ.
﴿سُبْحَانَ الَّذِي أَسْرَىٰ بِعَبْدِهِ لَيْلًا مِّنَ الْمَسْجِدِ الْحَرَامِ إِلَى الْمَسْجِدِ الْأَقْصَى الَّذِي بَارَكْنَا حَوْلَهُ﴾ [سورة الإسراء ١]
މާނައީ: "އެއިލާހުގެ ހުސްޠާހިރުވަންތަކަމާއެވެ! އެއިލާހީ، އަލްމަސްޖިދުލް ޙަރާމުން އަލްމަސްޖިދުލް އަޤްޞާއަށް އެއިލާހުގެ އަޅާ، ރޭގަނޑުން ބައެއްގައި ގެންދެވި އިލާހެވެ. އެއީ އެތަނުގެ ވަށައިގެން، ތިމަންއިލާހު ބަރަކާތްލެއްވި ތަނެވެ."
އަލްޤުދުސްއަކީ މަސްޖިދުލްއަޤްޞާގެ ވަށައިގެންވާ ސަރަހައްދެވެ. އެހެންކަމުން އެތަނަކީވެސް ބަރަކާތްލެއްވިގެންވާ ތަނެކެވެ.
ﷲ ތަޢާލާވަނީ ބައިތުލް މަޤްދިސްއަކީ މުޤައްދަސް ތަނެއްކަމަށް، މޫސާ عليه السلام ގެ ދޫފުޅުމަތިން ސިފަކުރައްވާފައެވެ.
﴿يَا قَوْمِ ادْخُلُوا الْأَرْضَ الْمُقَدَّسَةَ الَّتِي كَتَبَ اللَّـهُ لَكُمْ﴾ [سورة المائدة ٢١]
މާނައީ: "އޭ އަހުރެންގެ ޤައުމުގެ މީހުންނޭވެ! މުޤައްދަސްވެގެންވާ ބިމަށް، ތިޔަބައިމީހުން ވަންނާށެވެ! އެ ބިމަކީ ތިޔަބައިމީހުންނަށްޓަކައި ﷲ ކަނޑައަޅުއްވާފައިވާ ބިމެވެ."
(މިލިޔުމަކީ މާދަމާ (މިމަހުގެ 25) އިން މާރިޗް މަހުގެ 4 އަށް މުޅި ދުނިޔޭގައި ބައިނަލްއަޤްވާމީ އަލް ޤުދުސް ހަފްތާގައި މިއަދުނޫހުން ބައިވެރިވުމުގެ ގޮތުން ޝާއިޢުކުރާނެ ލިޔުންތަކުގެ ތެރެއިން ލިޔުމެކެވެ.)
