މުސްލިމުންނަކީ އެއްވެސް ކަމެއްގައި ﷲ ތަޢާލާ އާއިމެދު ޝައްކުކޮށްގެންވާނެ ބައެއް ނޫނެވެ. އޮތީ އަބަދުވެސް ޔަޤީންކޮށްގެން ހުރުމެވެ. އަހަރެމެން އުފެއްދެވުމަށްފަހު ﷲ ތަޢާލާ އަހަރެމެންގެތެރެއިން އެކަކުވެސް ދޫކޮށް ނުލައްވަވަތެވެ. ﷲ ތަޢާލާ ވޮޑިގެންވަނީ އަހަރެމެންނާއިއެކުގައެވެ. އަދި ކީއްހެއްޔެވެ؟ އެންމެ ބޮޑު އުފަލަކީ އެމީހަކާއިއެކު ﷲ ތަޢާލާ ވޮޑިގެންވަނީ އެމީހަކު އެދޭ ގޮތަކަށްކަމަށްވުމެވެ.
ޤުދްސިއްޔަ ޙަދީޘްފުޅުން އެނެގެން އޮތީ އެމީހަކު އެދޭ ބީދައަކުން އެމީހަކާއިއެކު ﷲ ތަޢާލާ ވޮޑިގެންވާނެ ކަމެވެ. ވީމާ އެކަމުގައި އޮތީ މީސްތަކުންގެ އިޚްލާޞްތެރިކަން ހުރި މިންވަރެކެވެ.
މި ޙަދީޘްފުޅުން އެނގެނީ އެމީހަކު އެދޭ ކަންކަން ﷲ ތަޢާލާ ހިންމަވައިދެއްވަވާނެ ކަމަށް އިޚްލާޞްތެރިކަމާއިއެކު ޤަބޫލުކުރާ މީހާގެ ބޭނުންތައް ﷲ ތަޢާލާ ފުއްދަވައިދެއްވަވާނެ ކަމެވެ. އެމީހާގެ ފާފަތައް ފުއްސަވައި ދެއްވަވާނެ ކަމަށް ޤަބޫލުކުރާ މީހާގެ ފާފަތައް ﷲ ތަޢާލާ ފުއްސަވައިދެއްވަވާނެ ކަމެވެ. ކަމަކުން ސަލާމަތްކޮށްދެއްވެވުމަށް އެދޭމީހާ ސަލާމަތްކުރައްވަވައި ދެއްވަވާނެ ކަމެވެ.
އިޚްލާޞްތެރިކަން ކުރިއަށް ނެރެންޖެހޭ ސަބަބަކީ ﷲ ތަޢާލާގެ ޙަޟްރަތުން ކަމަކަށް އެދޭމީހާ، އެންމެ ފުރަތަމަ ކަމަކަށް އެމީހާ ﷲ ތަޢާލާއަށް އިޚްލާޞްތެރިވާންޖެހޭނެތީއެވެ. އެމީހާގެ ނިޔަތާއި ޢަމަލުތަކުން ﷲ ތަޢާލާއަށް އިޚްލާޞްތެރިކަން ހާމަކުރަން ޖެހޭނެތީއެވެ. ކިޔަމަންތެރިކަން އަދާކުރަން ޖެހޭނެތީއެވެ!
ވީމާ ﷲ ތަޢާލާގެ ރުހިވޮޑިގަތުމާއި ދީލަތިވަންތަކަމަށް އެދޭމީހާ އެކަން ޔަޤީންކޮށްގެން އެކަންކަން ޙާޞިލުކުރަން މަސައްކަތްކުރާށެވެ! ބޭނުންވާ ކަންކަމުގައި ﷲ ތަޢާލާއަށް، އެކަން ހިންމަވައި ދެއްވަވާނެ ކަމުގެ ޔަޤީންކަމާއިއެކު ދަންނަވަމުން ގެންދާށެވެ! އެމީހާގެ އެދުންތައް ފުއްދަވައި ދެއްވަވާނެތެވެ! އިން ޝާ ﷲ
- އުސްތާޛް މުޙައްމަދު ބާޖައުރ ގެ ދަރުސަކުން
