ކިތަންމެ ގާތްމީހަކު ނަމަވެސް އިޞްލާޙްކުރުމުގެ ބޭނުމުގަ މީހުން ފަޟީޙަތްނުކުރާށެވެ! ޚުދު ތިމާގެ ޙަޔާތުގެ ބައިވެރިޔާ ނަމަވެސް އިޞްލާޙްކުރަން އެދޭނަމަ އެކަނި ބަހައްޓައިގެން ނަޞޭޙަތްދޭށެވެ! ވިސްނައިދޭން މަސައްކަތްކުރާށެވެ.
އަމިއްލައަށް ވިސްނައިލާށެވެ. ތިބާއަށް ކުރެވޭ ނުރަނގަޅު ކަމެއްގެ ވާހަކަ މީސްތަކުންގެ ތެރޭގައި ދައްކާނަމަ ތިބާއަށް ވެގެންދާނެ ގޮތަށެވެ. ތިބާއަށް އެކަމަށް ރުހެވޭނެ ހެއްޔެވެ؟ އެފަދަ ޙާލަތުގައި ގިނަ ބައަކަށް ބުނެވެނީ "އާނ! އެކަން އޮންނާނީ ކޮށްފަ! ދެން ކަލެއަށް ކީއްތަ ކުރެވޭނީ؟" ފަދަ ގޮތްދޫނުކުރުމާއި ޖަދަލުކުރުމުގެ ބަސްތަކެވެ. އެއީ ރަނގަޅު ގޮތް ނޫންނަމަވެސް އެކަން އެހެންވެދާނެކަން ޤަބޫލުކުރާށެވެ!
ބައިވެރިޔާއަށް ކުށެއް ކުރެވުނީއެވެ. ދެމީހުން އެކަނިވެލާށެވެ. ނުވަތަ ދެމީހުން އެކަނިވާ ވަޤުތެއްގައި އެކަމެއްގެ ވާހަކަ ދައްކާށެވެ. ކުށް ކުރެވުނު މީހާއަށް ކަންކަން ޤަބޫލުކުރަން ފަސޭހަވާނީވެސް އެއިރުންނެވެ. އެއިގެ އިތުރުން މީސްތަކުންގެ މެދުގައި ފަޟީޙަތް ނުކުރީތީ އުފާވެސްކުރާނެއެވެ. ދެމީހުންގެ މެދުގައި ލޯބިވެސް އިތުރުވާނެއެވެ.
އެހެނަސް ބައެއް މީހުން އެކަންކަމަށް ވިސްނާނުލައި ގޭގެ އެންމެގެ މެދުގައި ނުވަތަ ރައްޓެހިންގެ ތެރޭގައި އެބާވަތުގެ ވާހަކަތައް އެބަ ދައްކައެވެ. ތިމާގެ ހުރި މޮޅުކަން ނުވަތަ ރަނގަޅުކަން ދައްކަން ބޭނުންވެގެންވެސް އެގޮތަށް ކަންކަން އެބަކުރެއެވެ. އެހެނަސް އެއީ އެއީ ހަަމ ހެދޭ ވަރަށް ބޮޑު ގޯހެކެވެ. ކުރެވޭ ވަރަށް ނުރަނގަޅު ކަމެކެވެ. އެއިރުން ކަންކަން ދާނީ އިތުރަށް ގޯސްވަމުންނެވެ.
އެއްވެސް މީހަކީ އެމީހަކަށް ކުރެވޭ ކުށްތައް އެހެން މީހުންނަށް އެނގެން ބޭނުންވާނެ މީހެއް ނޫނެވެ. ޚުދު ތިމާވެސް ބޭނުމެއް ނުވާނެއެވެ. ވީމާ އެެހން މީހުންނާއިމެދުގައިވެސް ޢަމަލުކުރަންވާނީ އެގޮތަށެވެ.
އަމިއްލަ ދަރިންނަށް ނުވަތަ ކިތަންމެ ގާތް މީހަކަށް ނަޞޭޙަތްދިންކަމުގައިވީނަމަވެސް މިބުނި މަގުން ޢަމަލުކުރާށެވެ. ނަތީޖާ ފެންނާނީ އެއިރުންނެވެ.
ނިންމާލަމުންވެސް ސުވާލުކޮށްލަން ބޭނުންވަނީ އެހެން މީހަކު ތިމާ ފަޟީޙަތްކުރަން ރުހޭނަން ހެއްޔެވެ؟ ހަމައެކަކުވެސް ނުރުހޭނެއެވެ. ވީމާ ތިމާއަކީވެސް އެހެން މީހުން ފަޟީޙަތްކުރާ މީހަކަށް ނުވާށެވެ.
ހަމައެއާއިއެކު ވިސްނައިލާށެވެ. ބޭނުންވެގެން މިއުޅެނީ އަނެކާ ފަޟީޙަތްކުރާކަށް ނޫނެއްނޫންހެއްޔެވެ؟ ބޭނުންވަނީ މައްސަލަ ޙައްލުކުރަން ނޫންހެއްޔެވެ؟ ވީމާ ކޮންމެ ކަމެއްގައިވެސް އެންމެ ފައިދާކުރާނެ ގޮތަށް ޢަމަލުކުރަން މަސައްކަތްކުރާށެވެ.
- އަލަފް
