އަހަރެމެން ކޮންމެ މީހަކީވެސް ދިރިއުޅުމުގައި އެތައް ބައިވަރު ކަންކަމަށް އަބަދުވެސް ބޭނުންވެފައި ތިބެންޖެހޭ ބައެކެވެ. ކޮންމެ ކަމަކަށްވެސް އެދި ދަންނަނަވަން ޖެހެނީ ﷲ ތަޢާލާގެ ޙަޟްރަތުގައެވެ. އެކަލާނގެ އަނގަވާފައިވަނީވެސް ކޮންމެ ކަމަކަށް އެދިގެންވެސް ﷲ ތަޢާލާގެ ޙަޟްރަތުގައި ދެންނެވުމަށެވެ. ވީމާ ހަމަ ދަންނަވަމުން ގެންދަންވީއެވެ.
ވިސްނަންވީ 2 ކަމަކަށެވެ. އެއީ ކެތްތެރިކަން އިސްކުރުމަށާއި ނަމާދު ޤާއިމުކުރުމަށެވެ. ނަމާދުޤާއިމުކުރުމުގެ މާނައަކީ ފަރުޟު ފަސް ނަމާދު ބަރާަރަށް އަދާކުރަމުން ގެންދިއުމެވެ. އަދި ފަރުވާތެރިވެ ޖަމާޢަތުގައި ކުރަން މަސައްކަތްކުރުމެވެ. ވަގުތުޖެހުމުން ވީހައި އަވަހަކަށް ނަމާދުކުރުމެވެ.
އަހަރެމެންނަށް ސަލާމަތް ޞިއްހަތުގައި ބަނޑުފުރާނަ މުއްތިކޮށްގެން ތިބެވޭނަމަ އަހަރެމެންނަށް އެވަނީ ﷲ ތަޢާލާގެ ނިޢްމަތް ލިބިފައެވެ. ކެތްތެރިވާށެވެ! ޝުކުރުވެރިވާށެވެ! ބޭނުންވެގެން ހުންނަ ހުރިހާ ކަންކަން ވަގުތުން ފުރިހަމަވާނެ ކަމަށް އުންމީދުވެސް ނުކުރާށެވެ!
ކޮންމެ މީހަކުވެސް އެދޭނީ ނުވަތަ ބޭނުންވާނީ އެމީހަކު ބޭނުންވާހައިކަންކަން ވަގުތުން ވަގުތަށް ފުރިހަމަވުމަށެވެ. ނަމަވެސް ﷲ ތަޢާލާ ކޮންމެ ކަމެއްވެސް ފުރިހަމަކުރައްވަވައި ދެއްވަވާނީ އެކަމަކުން އެމީހަކަށް އެންމެ ބޮޑަށް ފައިދާކުރާނެ ވަގުތުގައެވެ. އެކަމުގެ ޔަޤީންކަން ހިތުގައި ބާއްވާނަމަ ކަންކަން ޙާޞިލު ނުކުރެވި ލަސްވެގެން އުފެދޭ ކަންބޮޑުވުންތަކުން ސަލާމަތްވެވޭނެއެވެ. އިން ޝާ ﷲ
އިންސާނުންގެ ކިބައިގައި ހުރުން އެންމެ މުހިންމު ސިފައަކީ ކެތްތެރިކަމެވެ. ކެތްތެރިކަމުގެ އަގު ﷲ ތަޢާލާގެ ޙަޟްރަތުގައި އެހައިބޮޑުވެގެންދަނީ އެސަބަބަށްޓައެވެ. ތިމަން ﷲ ވޮޑިގެންވަނީ ކެތްތެރިކަމާއިއެކު ނަމާދުކުރުމުން ވާގިއެދޭ މީހުންނާއިއެކުގައިކަމަށް ވަޙީ ބަސްފުޅުގައި އޮތުމުން މިކަމުގެ ދަލީލަކަށް ފުދެއެވެ.
--އިސްލާމީ ތިލަފަތުގެ ދަރުސަކުން
