ކޮންމެ މީހަކަށްވެސް ކޮންމެ ފަދަ ހުވަފެނެއްވެސް ފެނިދާނެއެވެ. އެއީ މައްސަލައެއް ނޫނެވެ. ހުވަފެނެއް ފެނުމަކީ އެހައި ބޮޑުކަމެއް ކަމަށް ނުދެކޭށެވެ. އެހެނީ ހުވަފެނުގެ އެތައް ބާވަތެއް އެބަހުރެއެވެ. ހުވަފެން ފެންނަ ސަބަބުތައްވެސް ގިނައެވެ.
ފެންނަ ހުވަފެނުގެ ތެރޭގައި ޢާންމުކޮށް ހިމެނެނީ 3 ބާވަތެއްގެ ހުވަފެނެވެ. ފުރަތަމަ ބާވަތަކީ ﷲ ތަޢާލާ އެމީހަކަށް ދައްކަވާ ކަންކަމެވެ. ދެވަނަ ބާވަތަކީ ޝައިޠޯނާ ދައްކާ ކަންކަމެވެ. 3 ވަނަ ބާވަތަކީ އެމީހަކު ކަމަކާއިމެދު ފިކުރުކުރާނަމަ އެކަމުގެ ސަބަބުން ފެންނަ ހުވަފެންތަކެވެ.
ފެނުނު ހުވަފެނަކީ ތިމާއަށް ފައިދާކޮށްފާނެ ހުވަފެނެއްކަމަށް ޤަބޫލުކުރެވޭނަމަ ޙަޤީޤަތަކަށް ހެދުމަށް މަސައްކަތްކުރާށެވެ! ﷲ ތަޢާލާ އިރާދަކުރެއްވެވި އަޅަކަށް ހިންމަވައި ދެއްވަވާނެތެވެ. އުންމީދާއިއެކު ދުޢާކުރަމުން ކާމިޔާ ދެއްވަވާނެތެވެ. ޔޫސުފް ސޫރަތުން އެކަން އެނގިގެންދެއެވެ.
މިބުނަނީ ހުވަފެނުގައި ތިބާ ހެޔޮ އަމަލެއް ކުރަނިކޮށް ފެނިއްޖެ ނަމަ އެކަމެއް ކުރަން މަސައްކަތްކުރާށެވެ! ތިބާ ޢާންމުކޮށް ނުކުރާ އަޅުކަމެއް ކުރަނިކޮށް ފެނިއްޖެ ނަމަ އެކަމެއް ކުރަން އަވަސްވެގަންނާށެވެ! އެހުވަފެނަކީ އެކަމެއް ކުރުމަށް ތިބާއަށް ކުރެއްވެވި އިލްހާމެއްކަމަށް ދެކޭށެވެ!
ހުވަފެނުގައި މައިންބަފައިން ފެނިއްޖެނަމަ އެމީހުންނަށްޓަކައި ހެޔޮދުޢާކޮށް ޞަދަޤާތްކުރުން ފަދަ ކަންކަންކުރާވެ! އެމީހުން ދުނިޔޭގައި ތިބިނަމަ އެމީހުންނާއި ބައްދަލުކުރާށެވެ! ފޯނުންނަމަވެސް ގުޅައި ޙާލުބަލާށެވެ! އެމީހުން ތިބީ ތިބާގެކިބައިން ކަމަކަށް އެދިގެންކަމަށްވެދާނެއެވެ!
--އިސްލާމީ ތިލަފަތުގެ ދަރުސަކުން
