އަހަރެމެން ބުނާ ބަސްތަކާއި ކުރާ ޢަމަލުތައް ލިޔުއްވަވަން ﷲ ތަޢާލާ 2 މަލާއިކަތުން ލައްވަވާފައިވާކަން އަހަރެމެންނަށް އެނގެއެވެ. އެކަން ޤުރްއާނުން އެނގެން އޮތުމުންނެވެ.
"އަދި ހަމަކަށަވަރުން، ތިޔަބައިމީހުންގެ މައްޗަށް ރައްކާތެރިވެ ބަލަހައްޓަވާ މަލާއިކަތުންވެއެވެ."
"(އެއީ) މާތްވެގެންވާ، ލިޔުއްވާ މަލާއިކަތުންނެވެ."
"ތިޔަބައިމީހުން ކުރާ ކަންތައް އެ މަލާއިކަތުން ދެނެވަޑައިގެންވެތެވެ."
(އަލް އިންފިތާރު: 10،11،12)
ޙަޤީޤަތަށް ބަލައިފިނަމަ އެފަތް ލިޔުއްވަވަނީ މަލާއިކަތުންނެއް ނޫނެވެ. އަހަރެމެން އަމިއްލައަށެވެ. މިބަހުގެ މާނައަކީ މަލާއިކަތުން ކުރައްވަވާ ހަމައެކަނި ކަމަކީ ފަތުގައި ރެކޯޑްކުރެއްވެވުމެވެ. އެއްވެސް އުނިއިތުރެއް ގެންނެވުމަކާއި ނުލައެވެ.
ވީމާ އެފަތުގައި އެއްވެސް ނުބައި ޢަމަލެއް ރެކޯޑް ނުކުރުމުގެ ފުރިހަމަ ބާރު ﷲ ތަޢާލާ ވަނީ މީސްތަކުންނަށް ދެއްވަވައިފައެވެ. އެހެނީ ނުބައި ބަހެއް ނުބުނުމުން ނުވަތަ ނުބައި ޢަމަލެއް ނުކުރުމުން ރެކޯޑްވެފައި ހުންނާނީ ރަނގަޅު ބަސްތަކާއި ރަނގަޅު ހެޔޮ ޢަމަލުތަކެވެ.
- އިސްލާމީ ތިލަފަތުގެ ދަރުސަކުން
