ނަމާދަށް ހުންނައިރު ތިމާގެ ހަށިގަނޑު ވީހައި ބޮޑަށް ސީދަލަށް ބަހައްޓަން މަސައްކަތްކުރާށެވެ. އަރިވެ ގުދުވެ ބަނޑިލައްވައި ނުހަދާށެވެ. އަދި ވީހައި ބޮޑަށް ސަޖިދަވަޅަށް ބަލަން މަސައްކަތްކުރާށެވެ. ނަމަވެސް އައަތަޙިއްޔާތު ކިޔާއިރު ބަލަންވާނީ ކަނައަތުގެ އަތްތިލައަށް، އިނގިލިތަކަށެވެ. އެއީ ހަމައެކަނި އައްތަޙިއްޔާތު ކިޔާވަޤުތުގައެވެ.
ﷲ ތަޢާލާގެ މަތިން ހަނދުމަކުރުން ގިނަކޮށް ވީހައި ފުރިހަމައަށް ނަމާދުކުރަން މަސައްކަތްކުރާމީހަކަށް ރަޙްމަތް އިތުރުކުރައްވަވާނެއެވެ. ދަތި އުނދަގޫ ޙާލަތްތަކުން މިންޖުވެވޭނެ މަގެއް ދައްކަވާނެތެވެ. އެހެނީ އެމީހަކު އޭނާގެ ޢމަލުން އެދައްކަނީ އެމީހަކު ﷲ ތަޢާލާއަށް ކިޔަމަންތެރިވާ މިންވަރެވެ. ﷲ ތަޢާލާ ދެކެ ލޯބިވާ މިންވަރެވެ.
ސުވަރުގެ އެދިގެން ކުރެވޭނެ އެންމެ މުހިންމު މަސައްކަތަކީ ނުވަތަ އަޅުކަމަކީ ބަރާބަރަށް ނަމާދުކުރުމެވެ. ޚުޝޫޢަތްތެރިކަމާއިއެކު ނަމާދުކުރަން މަސައްކަތްކުރުމެވެ. ﷲ ތަޢާލާ ޤަބޫލުފުޅު ކުރައްވަވާނެ ފެންވަރުގައި ނަމާދުކުރަން މަސައްކަތްކުރުމެވެ.
ނަމާދަށް ރައްކައުތެރިވާ މީހުން ދެކެ ﷲ ތަޢާލާ ލޯބިވެވޮޑިގެންވެއެވެ. އެމީހަކަށް ހެޔޮ ގޮތްތައް މިންވަރު ކުރައްވަވަތެވެ. ވީމާ ކޮންމެ ދުވަހަކުވެސް އެންމެ މަދުވެގެން ފަރުޟު 5 ނަމާދުގެ އިތުރުން ރަވާތިބު ސުންނަތުގެ 12 ރަކްޢަތާއި ވިތުރިގެ 3 ރަކްޢަތާއި ދަމުނަމާދާއި އަދި ޟުޙާ ނަމާދުގެ މަދުވެގެން 2 ރަކްޢަތް ނަމަވެސް ކުރަން ގަދައަޅައި މަސައްކަތްކުރާށެވެ.
ދުނިޔޭގައި އެމީހެއްގެ ދިރިއުޅުމަށް ހެޔޮ ބަދަލުތަކެއް އަންނާނެއެވެ. އަދި އާޚިރަތް ދުވަހު އުފާކުރާ މީހުންގެ ތެރޭގައި ހިމެނިގެންދާނެއެވެ. އިން ޝާ ﷲ
--އިސްލާމީ ތިލަފަތުގެ ދަރުސަކުން
