އަޅުގަނޑުގެ ފުރަތަމަ ކައިވެނިކުރެވުނީ ޢުމުރުން 23 އަހަރުގައެވެ. އެކައިވެނި ރޫޅުނީ ކައިވެންޏަށް 6 ވަނަ އަހަރުއެވެ. އެކައިވެނީގައި ދަރިއަކު ލިބުނެވެ.
ކައިވެނި ރޫޅުނު އަހަރު ދެވަނަ ކައިވެނިކުރީމެވެ. ދެވަނަ ފިރިމީހާ ޢާއިއެކު ދެފަހަރު ކައިވެނިކޯށް އެކުގައި 10 އަހަރު ހޭދަކުރީމެވެ. ދަރިއަކު ނުލިބެއެވެ.
3 ވަނަ ކައިވެނި ކުރެވުނީ ޢުމުރުން 41 އަހަރުގައެވެ. ކައިވެނިކުރި ތަނާހެން ދަރިއަކު މިވަނީ ލިބިފައެވެ.
އަޅުގަނޑުގެ ޙަޔާތާއިމެދު ފާހަގަކުރަންބޭނުންވާ ދެކަމެއް އެބަ އޮތެވެ.
1 އަޅުގަނޑަކީ އަބަދުވެސް ޕީރިއަޑް މައްސަލަ ޖެހޭތީ ބޭސްކާން ޖެހުނު އަންހެނެއްކަމާއި 3 ވަނަ ފިރިމީހާ ޢާއި ކައިވެނިކުރިފަހުން ބޭސްނުކައި ޤަވާޢިދުން ޕީރިއަޑްވަމުން އަންނަކަން.
2 އަޅުގަނޑަކީ އެއްއިރެއްގައި ހިކި އަންހެނެއް ނޫނެވެ. ޢުމުރުން 40 އަހަރުން މަތިވީފަހުން 2 ވަނަ ދަރިފުޅު މިލިބުނީވެސް ހަމަ ފަލަކޮށް ހުއްޓައެވެ.
އެހެންވީމާ ފަލަވުމާއި ޢުމުރުން 40 އިން މައްޗަށް ދިއުމުން ދަރިން ލިބެން ހުރަސްއެޅޭކަމަށް ބުނެ ދެކެވޭ ވާހަކަތައް ޤަބޫލުކުރެވޭކަށް އަޅުގަނޑަކަށް ނެތެވެ.
3 ވަނަ ކަމަކީ އަބަދުވެސް އަޅުގަނޑު އައީ ފުރިހަމަ ޞިއްޙަތަކަށާއި ހެޔޮލަފާ، އަޅުގަނޑު ދެކެ ލޯބިވާ، ލޯބިން އަޅުގަނޑު ގެންގުޅޭނެ ފިރިއަކަށް އެދި ދުޢާކުރަމުންނެވެ. އަޅުގަނޑު ވަރުބަލި ކަމެއް ނެތި ކުރަމުން އައި ދުޢާ މިހާރު މިވަނީ ޢިޖާބަ ކުރައްވަވައިފައެވެ. އިން ޝާ ﷲ
މިހާރު އަޅުގަނޑަށް ބޭސްކާންޖެހޭ ބައްޔެއް ނެތެވެ. ލިބިފައިވާ ފިރިމީހާއަކީ އަޅުގަނޑުގެ ދެކެ ވަރަށް ލޯބިވާ ފިރިއެކެވެ. މާޝާﷲ
- ޒުބައިދާ / މިއަދުނޫހުގެ ކިޔުންތެރިއެއް
(މިވާހަކައަކީ މިއަދުނޫހުގައި ވަރަށް ގިނައިން ލިޔަމުން މިއަންނަ ދީނީ ވާހަކަތަކާއި ވަރަށް ގުޅުން ބޮޑު ވާހަކައަކަށްވާތީ ފާހަގަކޮށްލަމެވެ. ހެޔޮ ލަފާ ރަނގަޅު ބައިވެރިއަކު ދެއްވެވުމާއި ދަރިން ދެއްވެވުން އޮތީ ހަމައެކަނި ﷲ ތަޢާލާގެ ޙަޟްރަތުންނެވެ. އެކަމަކަށް ވަކި ޢުމުރެއް ނެތެވެ. އަދި އެއީ ކިތައްވަނަ ފިރިމީހާ ކަމެއްވެސް ނުއެނގޭނެއެވެ. އޮތީ މާޔޫސްނުވެ ތަޤްވާވެރިވެ ހުރެ ދުޢާކުރަމުން ގެންދިއުމެވެ.
ކިޔުންތެރިޔާ ބުނި ގޮތުގައި އޭނާއަކީ ދަމުނަމާދުކޮށް ދުޢާކުރަމުން އައި އަންހެނެކެވެ.)
