އެއްވެސް އިންސާނަކަށް މީސްތަކުންގެ ދޫތަކުން ސަލާމަތްވެވޭނެނަމަ ރަސޫލާ ﷺ އަށް ސަލާމަތްވެވަޑައިގެންނެވުނީހެވެ. އެހެންކަމާއިއެކުވެސް އިތުރު ރަސޫލާ ﷺ ގެ ޒަމާނުގައިވެސް އަދި މިއަދުވެސް އިތުރު ޞާޙިބާއަށް ނުބައިބަސްތައް ބުނާ މީހުން ބައިވަރެވެ. ރަސޫލް ﷺ ގެ އިސްތަށިފުޅުގައި ނުއަޅުވަނީ ކޮން އިލްޒާމެއް ހެއްޔެވެ؟ ކަހީނެކޭ ސިޙުރުވެރިއެކޭ ނުގޮވާހެއްޔެވެ؟
އިމާމް ޝާފިޢީ ރަޙިމަހުالله ވިދާޅުވިއެވެ. "މީސްތަކުންގެ ދުލުން ސަލާމަތްވެވޭނެކަމަށް ހީކޮށްފިމީހަކީ މޮޔައެކެވެ."
އެހެންކަމާއިއެކުވެސް ވިސްނާލަން ޖެހޭނެ ކަމެއް އެބައޮވެއެވެ. އެއީ ތިމާކުރާ ކަންކަމުގައި ތެދުވެރިވެ އިޚްލާޞްތެރިވުމެވެ. ﷲ ތަޢާލާގެ އެންމެހައި އަމުރުފުޅުތަކަށް އެންމެ ފުރިހަމަ ގޮތުގައި ކިޔަމަންގަތުމެވެ. އެންމެ ފުރިހަމަ ގޮތުގައި ﷲ ތަޢާލާއަށް ކިޔަމަންތެރިވުމެވެ. ބަހާއި އެއްގޮތްކުރުމެވެ.
ހަމައެއާއިއެކު ރައްޔިތުންގެ މަސްއޫލިއްޔަތު އަދާކުރަންޖެހޭ، ދައުލަތުގެ އިސްމަޤާމެއްގައި ހުރި މީހަކުނަމަ އެމަސްއޫލިއްޔަތު އަދާކުރުމުގައި ތެދުވެރިވެ އިޚްލާޞްތެރިވާންޖެހޭނެއެވެ. މަޤާމް ނުލިބޭއިރު ކަންބޮޑުވުން ފައުޅުކުރިކަންކަން އިޞްލާޙްކުރުމުގެ ބާރު ﷲ ތަޢާލާ ދެއްވަވައިފިނަމަ އެކަންކަން އިޞްލާހްކުރަން މަސައްކަތްކުރަންޖެހޭނެއެވެ. އެކަމަށް ހުރަސްތަކެއް ހުރިނަމަ އެކަންކަން ރައްޔިތުންނަށް ކިޔައިދީ އޮޅުންފިލުވައިދޭން ޖެހޭނެއެވެ.
އެކަންކަން އެގޮތަށް ކުރެވިއްޖެނަމަ މީސްތަކުންގެ ކުރިމަތީގައި އޭނާއަކީ މޮޔައަކަށްވީނަމަވެސް ﷲ ތަޢާލާގެ ޙަޟްރަތުގައި އެމީހަކުވާނީ ޤަދަރުއުފުލިގެންވާ ޢިއްޒަތްތެރިއަކަށެވެ. ވީމާ ފުރަތަމަކަމަކަށް ކުރަންޖެހޭ ކަމަކީ ތިމާއަކީ ﷲ ތަޢާލާގެ ޙަޟްރަތުގައި ޤަދަރުއުފުލިގެންވާ މީހަކަށްވުމެވެ.
- އިސްލާމީ ތިލަފަތުގެ ދަރުސަކުން
