އަޅުގަނޑަކީވެސް ސަޖިދައިގައި އޮއްވައި ފުރާނަ ހިއްޕެވުމަށް އެދޭ މީހަކީމެވެ. އެފުރުޞަތު މިހާރުވެސް ދެއްވަވާނެތޯ؟
ސުވާލުކުރެއްވި ކިޔުންތެރިޔާއަށް ބުނެލަން އޮތީ ތިރީގައިވާ ލިޔުމުން ޖަވާބު ލިބިލައްވާނެ ކަމަށް އުންމީދުކުރަމެވެ. އިން ޝާ ﷲ
ކޮންމެ ކަމެއްވެސް ޙާޞިލުކުރެވޭނީ އެކަމަށް އެދިގެން މަސައްކަތްކުރާ މީހަކަށެވެ. އިޚްލާޞްތެރިކަމާއިއެކު މަސައްކތަކުރާ އަޅުންނަށް ﷲ ތަޢާލާ އެކަމެއް ފަހިކޮށް ދެއްވަވާނެތެވެ. ވީމާ ސަޖިދައިގައި އޮއްވައި މަރުވުމަށް އެދޭ މީހާއަށްވެސް އޮތީ އެކަމަށް އެދިގެން މަސައްކަތްކުރުމެވެ.
އިމާމްޢުމަރު ސުލޭމާނުގެ ދަރުސެއްގައި ވިދާޅުވެފައިވެއެވެ.
މަރުވުމަށް އެންމެރަނގަޅު މަޤާމަކީ ސަޖިދައިގަ އޮވެއެވެ! އެކަން ހިންމަވައި ދެއްވެވުން އެދި ދުޢާކުރަންވާނެއެވެ. މިކިޔައިދެނީ 1996 ވަނަ އަހަރު ހިނގައިދިއަކަމެއްގެ ވާހަކައެވެ.
ޝައިޚް ޢަބްދުލްޙަމީދު ކިޝްކް ރަޙިމަހުﷲ އަކީ އެކަމަށް އެދިވަޑައިގެން ދުޢާކުރައްވަވަމުން ގެންދެވި އިމާމެކެވެ. އިމާމް ދުޢާކުރައްވަމުން ގެންދެވީ "އިމާމެއްގެ ގޮތުގައި ދިރިއުޅުއްވެވުމަށާއި އިމާމެއްގެ ގޮތުގައި ހުންނަވަނިކޮށް މަރުގެންދެވުމަށާއި ޤިޔާމަތް ވުމުން ކައްވަޅުން ތެުވެވަޑައިގަންނަވާ މަޤާމަކީ ސަޖިދައިގެ މަޤާމް" ކަމުގައި މިންވަރުކޮށްދެއްވެވުް އެދިވަޑައިގެނެނެވެ.
އެފަދައިން ދުޢާ އެކުރެއްވެވީ "ތިބާ ކައްވަޅުން ތެދުވާނީ ތިބާ އެންމެފަހުން ދުނިޔޭގައި ހުރެ ކުރި ޢަމަލެއްގެ މަތީގައި" ކަމަށް ރަސޫލް (ﷺ) ޙަދީޘްފުޅު ކުރައްވަވާށެވެ! އެކަންކަމަށް އެދިވަޑައިގަންނަވާވަރު ބޮޑުކަމުން ހުކުރު ދުވަހު މިންބަރުގައި ހުންނަވައިގެންވެސް މިފަދައިން ދުޢާކުރައްވަމުން ގެންދެވިއެވެ.
ﷲ ތައާލާ އޭނާގެ ފުރާނަ ގެންދެވީ ހުކުރު ދުވަހެއްގައި އިމާމެއްގެ ގޮތުގައި ނަމާދުކުރައްވަމުން ސަޖިދައިގައި އޮންނަވަނިކޮށެވެ. ސުބްހާނަﷲ
ޞަޙާބީންވެސް އެބޭކަލުންގެ ފުރާނަ ސަޖިދައިގައި އޮންނަވަނިކޮށް ގެންދެވުން އެދިވަޑައިގެން ދުޢާކުރެއްވެވިއެވެ. އަދި މަރުވުމަށް އެންމެރަނގަޅު މަޤާމަކީ ސަޖިދައިގައިކަމަށް ރަސޫލް (ﷺ) ވަނީ އިޝާރާތްކުރައްވަވައިފައެވެ.
މިސްކިތުގެނަމަކަށް "މަސްޖިދު" ކިޔަނީ ވެސް އެއީ ﷲ ތަޢާލާއަށް ސަޖިދަކުރާތަން ކަމުގައިވާތީއެވެ. ޤިޔާމަތް ދުވަހު ﷲ ތައާލާއަށް ސަޖިދަ ކުރެވޭނީ ވެސް އިޚްލާޞްތެރިކަމާއިއެކު ދުނިޔޭގައި ސަޖިދަކުރި މީހުންނަށެވެ! ކާފިރުންނަށާއި މުނާފިޤުންނަކަށް ސަޖިދައެއް ނުކުރެވޭނެއެވެ. އެމީހުން ގުދުވާން އުޅުނު ނަމަވެސް ނުވެވޭނެއެވެ. ބުރަކަށިތައް ހުންނާނީ ދަގނަޑުގަނޑެއް ފަދައިން ހަރުވެފައެވެ.
އެއީ އެމީހުންދުނިޔޭގައި ފުރިހަމަ ޞިއްހަތުގައި ތިބިއިރު ސަޖިދަ ނުކުރިކަމަށްޓަކައެވެ. މުނާފިޤުން ސަޖިދަކުރީ އިޚްލާޞްތެރިކަމެއް ނެތި ދެއްކެން ކަމަށްވާތީއެވެ.
ޝައިޚް ޢަބްދުލްހަމީދަކީ ކޮން ބޭކަލެއް؟ ގުޅުންހުރި ވީޑިއޯ:
