ނަމާދާއި ޛިކުރަތައް ކިޔުމުގެ އެންމެ ބޮޑު ބޭނުމަކީ ﷲ ތަޢާލާ މަތިވެރިކުރުމާއި ﷲ ތަޢާލާގެ ރުހިވޮޑިގަތުން ލިބިގަތުމެވެ. އެހެނީ ކޮންމެ މީހަކަށްވެސް އެންމެ މުހިންމު ކަމަކީ ﷲ ތަޢާލާގެ ރުހިވޮޑިގަތުން ލިބުމެވެ. ފުރިހަމަ ގޮތުގައި އަޅުކަންކުރެވޭނީވެސް ﷲ ތަޢާލާގެ ރުހިވޮޑިގަތުން ލިބިގެންކަމަށްވާތީއެވެ.
ޢައިޝަތުގެފާނުގެ އަރިއަހުން ރިވާވެގެންވަނީ މި ދުޢާއަކީ ރަސޫލް (ﷺ) ގިނަގިނައިން ކުރެއްވެވި ދުޢާއެއް ކަމަށެވެ. މިދުޢާ ކުރަންވީ ޙަރަމްބަން ތަކްބީރު (ﷲއަކްބަރު) ކިޔުމަށްފަހުގައެވެ.. އަދި އެ މަޤާމުގައި ކިޔުމަށް މިނޫން ދުޢާތައްވެސް ޙަދީޘްގައި އެބަހުއްޓެވެ. މިދުޢާ ކިޔަންވީ ސުންނަތް ނަމާދުތަކުގައެވެ.
سُبْحَانَكَ اللَّهُمَّ وَبِحَمْدِكَ وَتَبَارَكَ اسْمُكَ وَتَعَالَى جَدُّكَ وَلاَ إِلَهَ غَيْرُكَ
ދުޢާގެ މާނައީ: ޔާ ﷲ! އިނބަ ﷲ ހުސްޠޯހިރުވަންތައެވެ! އިނބަ ﷲ އަށް ޙަމްދުހުއްޓެވެ! އަދި އިނބަ ﷲ ގެ ނަންފުޅު ބަރަކާތްވަންތަވެވޮޑިގެންވެއެވެ! އަދި އިނބަ ﷲގެ މަތިވެރިކަން އުފުލިގެންވެއެވެ. އަދި އިނބަ ﷲ ފިޔަވައި ޙައްޤުވެގެން އަޅުކަން ވެވޭއެހެން އިލާހަކކު ނުވެއެވެ.
މިއީވެސް ދުޢާއުލްއިފްތިތާޙްއެކެވެ!
މަޢުލޫމާތު: ޝައިޚް އިބްރާހީމް ފަރީދު އަހްމަދު
