އަހުރެމެންނަށް ކޮންމެ ކަމެއްވެސް ކާމިޔާބް ކުރެވެން އޮތީ އެކަމަކަށް ﷲ ތަޢާލާ ތައުފީޤް ދެއްވެވުމުންނެވެ. ވީމާ ދުނިޔެ ކާމިޔާބުކުރަންވެސް އަދި އާޚިރަތް ކާމިޔާބުކުރަންވެސް ކުރަން އޮތް އެންމެ މުހިންމު ކަމަކީ ﷲ ތަޢާލާގެ ޙަޟްރަތުން ތައުފީޤް ލިބިގަންނަން މަސައްކަތްކުރުމެވެ. ތައުފީޤް ދެއްވެވުން އެދުމާއިއެކު ތައުފީޤް ދެއްވަވާނެ މަގުން ޢަމަލުކުރުމެވެ.
އިބްންއަލްޤައްޔިމް ރަޙިމަހުﷲ ވިދާޅުވެފައިވަނީ އެމީހެއްގެ ކިބައިގައި މި 6 ސިފަ ހުރެއްޖެނަމަ ތައްފީޤް ލިބުމުގެ މަގު އެމީހަކަށް ބަންދުކުރައްވަވައިފާނެ ކަމަށެވެ.
ފުރަތަމަ ސިފައަކީ:
ﷲ ތައާލާ ނިޢްމަތެއް ދެއްވެވުމުން ﷲ ތަޢާލާއަށް ޝުކުރުވެރިވުމުގެ ބަދަލުގައި އެނީޢްމަތަކުން މަންފާ ހޯދަން މަސައްކަތްކުރުމެވެ.
މިސާލަކަށް ތަނަވަސްކަން ދެއްވެވުމުން ﷲ ތަޢާލާ އަންގަވާފައިވާ މަގުން ހޭދަކުރުމުގެ ބަދަލުގައި އެފައިސާއިން ތިމާއަށް ތަނަވަސްކަން އިތުރުކުރަން މަސައްކަތްކުރުން ފަދަ ޢަމަލުތައް ކުރުމެވެ.
މިސާލަކަށް ލޮލަލަށް ފެނުމުގެ ނިޢްމަތް ދެއްވެވުމުން ﷲ ތަޢާލާ ބަލަން އަންގަވާފައިވާ ތަކެއްޗަށް (ޤުރްއާން ފަދަ) ނުބަލައި ޙަރާމްކުރެއްވެވި ތަންތަން ބެލުމެވެ. ހަމަ އެފަދައިން ބަންގީގެ އަޑު ނުއަހައި (ބަންގިއަށް ޢިޖާބަ ނުދީ) މިޔުޒިކް އަޑުއެހުމެވެ.
ދެވަނަ ސިފައަކީ:
ޢިލްމުވެރިވެ މީސްތަކުންނަށް ހެޔޮ ޢަމަލުކުރަން ނަޞޭހަތްދޭމީހާ އޭނާ ދޭ ނަޞޭޙަތާއި އެއްގޮތަށް ޢަމަލު ނުކުރުމެވެ. ކިތަންމެ ގިނަ ޢިލްމެއް ލިބިފައިވީނަމަވެސް ލިބިފައިވާ ޢިލްމަށް ޢަމަލުނުކުރާނަމަ ޘަވާބެއް ނުލިބޭނެއެވެ.
ތިންވަނައީ:
ފާފަކުރެވުމުން ތައުބާވުން ލަސްކުރުމެވެ. ފާފަކުރުމެއް ނެތެވެ. ފާފައެއް ކުރެވިއްޖެނަމަ އޮތީ އަވަހަށް ތައުބާވުމެވެ. ތައުބާވާކަށް ވަކިތަނެއް އަދި ވަކި ވަޤުތެއްވެސް ނެތެވެ. ﷲ ތަޢާލާ ވަޙީކުރައްވަވާފައިވަނީ ފާފައެއް ކުރެވިއްޖެނަމަ ކޮންމެ ތަނެއްގައި ހުރިނަމަވެސް ކޮންމެ ވަޤުތަކުނަމަވެސް އަވަހަށް ތައުބާވުމަށެވެ.
ހަތަރުވަނައީ:
ބޮޑާކަމާއި ކިބުރުވެރިކަން އެމީހެއްގެ ކިބައިގައި ހުރުމެވެ. ތިމާއަކީ އެހެންމީހުންނަށްވުރެ މޮޅު، މަތިވެރި މީހެއްކަމުގައި ޤަބޫލުކުރެވުމެވެ.
ފަސްވަނައީ:
އެމީހާ ކުރަން ﷲ ތަޢާލާ އަންގަވާފައިވާ ކަންކަން ނުކޮށް ދުނިޔެ ޙާޞިލްކުރަން މަސައްކަތްކުރުމެވެ.
ހަވަނައީ:
މަރުމަތިންނާއި އާޚިރަތް ދުވަސް އަންނާނެކަން ހަނދާން ނައްތައިލުމެވެ.
ވީމާ މި 6 ސިފައިންކުރެ އެންމެ ސިފައެއްވެސް ތިބާގެ ކިބައިގައި ހުރިއަ ނުދޭށެވެ! އެސިފަތައް ދޫކޮށްލާށެވެ! ދުނިޔެވެސް އަދި އާޚިރަތްވެސް ޙާޞިލުކުރެވެން އޮތީ އެއިރުންނެވެ.
- އިސްލާމީ ތިލަފަތުގެ ދަރުސަކުން
