ކުރިމަތިވާ ކަންކަމާއި ގުޅިގެން ތިމާގެ އެދުވަހުގެ ޠަބީޢަތް ނުވަތަ "މޫޑް" ގޯސްވުން ބަހަނާއަކަށް ދައްކައި ނަމާދު އަޅާމީހުން މަދެއް ނޫނެވެ. ކުރިމަތިވާ ކޮންމެ ޙާލަތެއް މިންވަރުކުރައްވަވަނީ ﷲ ތަޢާލާކަމާއި އެއީ އިމްތިޙާން ކުރެއްވެވުމެއްކަން ރަނގަޅަށް އެނގޭއިރުވެސްމެއެވެ. މިއީ ވަރަށް ބޮޑަށް ހިތާމަކުރަންޖެހޭ ކަމެކެވެ. ސުވާލަކީ މޫޑް ރަނގަޅުވާނީ ނަމާދު ފަރުޟުކުރެއްވެވި ﷲ ތަޢާލާ އެކަން މިންވަރުކުރެއްވެވުމުންކަން ވެސް ހަމަ ނުއެނގެނީހެއްޔެވެ؟
އިންސާނުންގެ އެންމެ ބޮޑު ބަލިފައަކީ ކަންބޮޑުވެ މުޞީބާތްތައް ގިނަވާވަރަކަށް ﷲ ތަޢާލާ އާއި ދުރަށް ޖެހެވޭ ކަމެވެ. ﷲ ތަޢާލާގެ މަގުން ފޭވެވޭކަމެވެ. ﷲ ތަޢާލާ އަންގަވާފައިވަނީ ދަތިތައް އިތުރުވާ ވަރަކަށް އެކަލާނގެ އާއި ކުތަންވުމަށެވެ. ނަމަވެސް އިންސާނުންނަށް މިވާގޮތަކީ ކިރިޔާ ދަތިކަމެއް ކުރިމަތިވި ނަމަވެސް ފުރަތަމަ ކަމަކަށް ހަނދުމަނެތިކޮށްލެވެނީ ﷲ ތަޢާލާއެވެ!
މީސްތަކުންނޭވެ! ތިމާއަށް ކުރިމަތިވެފައިވަނީ ކިތަންމެ ބޮޑު ހިތްދަތިކަމެއް އަދި ތަކްލީފެއް ނަމަވެސް "މޫޑް" ގޯސްނުކުރާށެވެ! ނަމާދާއި ދުރުހެލިވެ ﷲ ތަޢާލާގެމަތިން ހަނދުމަނެތިކޮށްނުލާށެވެ! ނަމާދާއި އެހެނިހެން އަޅުކަންމަތިން ހަނދުމަނެތިކޮށްނުލާށެވެ. ހާސްވެ ކަންބޮޑުވާވަރަކަށް އަތްތައް އުފުލާށެވެ! ދުޢާކުރާށެވެ! ޙާލަތު ބަދަލުކޮށްދެއްވެވުމަށް އެދޭށެވެ! ﷲ ތަޢާލާ ތިބާގެ ޙާލަތު އުފާވެރިކަމާ ހިނިތުންވުމަށް ބަދަލުކުރައްވަވައި ދެއްވަވާނެތެވެ! އިން ޝާ ﷲ ބިރުވެތިވާށެވެ! އެދުވަހުގެ "މޫޑް" އާއި ގުޅުވައިގެން ނަމާދު އަޅާނަމަ އެމީހަކީ ﷲ ތަޢާލާއަށް ކިޔަމަންތެރިއެއް ނޫނެވެ! އެކަމުގެ ސަބަބުން އެމީހާގެ މޫޑް ދުވަހަކުވެސް ރަނގަޅުނުވެދާނެ ކަމަށް ބިރުވެތިވާށެވެ! ﷲ ތަޢާލާއަށް ފުރިހަމަ ގޮތުގައި ކިޔަމަންތެރިވެގެން ހުންނަ މީހަކު ދުވަހަކު ނަމާދު އަޅަން އެއްވެސް ބަހަނާއެއް ނުދައްކާނެއެވެ! ނަމާދުކުރާނެއެވެ! ﷲ ތަޢާލާއަށް ކިޔަމަންތެރިކަން އަދާކުރާނެއެވެ!
--އިސްލާމީ ތިލަފަތުގެ ދަރުސަކުން
