ދުނިޔޭގެ އެެހން މީހުންނާއި މުސްލިމުން ތަފާތެވެ. ﷲ ތަޢާލާގެ ރަޙްމަތްފުޅުން މުސްލިމުން ތިބީ އިސްލާމް ދީނުގައެވެ. އަދި ﷲ ތަޢާލާގެ އެއްކައުވަންތަކަމާއި އެންމެހައި ބާރުތައް ލިބިވޮޑިގެންވަނީ ﷲ ތަޢާލާގެ ޙަޟްރަތަށް ކަމާއި ދުނިޔަވީ ހަޔާތަށްފަހު އެނބުރި ދިއުންވަނީވެސް ﷲ ތަޢާލާގެ ޙަޟްރަތަށްކަން މުސްލިމުންނަށް އެނގެއެވެ.
އެހެންކަމާއިއެކުވެސް ﷲ ތަޢާލާގެ ރުހިވޮޑިގަތުން ހޯދަން އެބަ މަސައްކަތްކުރެވޭ ހެއްޔެވެ؟ ޢާއިލާ އެކުގައި ސުވަރުގެ ވަނުމަށް އެބަ މަސައްކަތްކުރެވޭ ހެއްޔެވެ؟ ޢާއިލާއަށް ޙަޤީޤީ އުފާވެރިކަން ލިބިގަންނަން އެބަ މަސައްކަތް ކުރެވޭ ހެއްޔެވެ؟
މުސްލިމުންގެ ހުރިހާ ކާމިޔާބީއެއް ގުޅިފައިވަނީ ކީރިތި ޤުރްއާނާއިއެވެ. ޤުރްއާނާއި ގުޅުންބަދަހިކުރުމާއިއެވެ. އެހެންކަމުން މިގެނެސްދެނީ ކޮންމެ މީހަކަށްވެސް އަދި ޢާއިލާއަކަށްވެސް ވަރަށް ފައިޑާކުރާނެ ލިޔުމެކެވެ.
ޢާއިލާގެ ތެރޭގަ ކީރިތި ޤުރުއާނުގެ ފޮނިކަން ލިބިގަތުމަށްޓަކައި ކުރެވިދާނެ 5 ކަމެއް!: ޝައިޚް ޝާފިޢް
ޢާއިލާގެ އުފާވެރިކަމަށްޓަކައި މުޅި ޢާއިލާ އެންމެ ބޮޑަށް ކައިރިވާންވީ ކީރިތި ޤުރުއާނާއެވެ. އެގޮތުން ޢާއިލާގެ ތެރޭގައި ކީރިތި ޤުރުއާނުގެ ފޮނިކަން ލިބިގަތުމަށްޓަކައި ތިރީގައި މިވާ ކަންކަން ކުރެވިދާނެއެވެ.
1- ކީރިތި ޤުރުއާން ތިލާވަތުކޮށް އަޑު އެހުމުގެ ޙަލަޤާއެއް ކުރިޔަށް ގެންދިޔުން
2- ކީރިތި ޤުރުއާން ހިތުދަސްކުރުމުގެ ޢާއިލީ ޙަލަޤާއެއް ކުރިޔަށް ގެންދިޔުން
3- ޢާއިލާގެ މެމްބަރުންގެ ތެރެއިން މަދުވެގެން އެކަކު ރީތިކޮށް ކިޔަވަން ދަސްކޮށްދޭ ކޯހެއްގައި ބައިވެރިކޮށް އެފަދަ މީހެއްގެ އެހީތެރިކަމާއެކު އެހެން
މީހުންނަށް ތަޖުވީދަށް ރީތިކޮށް ކިޔަވަން ދަސްކޮށްދިނުން
4- ކީރިތި ޤުރުއާނުގެ ތަފްސީރު ކިޔުން
5- ކީރިތި ޤުރުއާނުގައި ﷲ ތަޢާލާ އަހަރެމެންނަށް ވަޙީކުރައްވާފައިވާ ބަސްފުޅުތައް ދެއްވާފައިވާ މެސެޖުތައް ދެނެގަތުމަށްޓަކައި ޢަރަބި ބަސް ދަސްކުރުން.
މިއީ މުޅި ޢާއިލާއަށް އުފާވެރިކަން ގެނުވާނެ ކަންކަމެވެ. ޤުރުއާން ބާވައިލައްވާފައިވަނީ އުފާވެރިކަމަށްޓަކައެވެ.
مَا أَنزَلْنَا عَلَيْكَ الْقُرْآنَ لِتَشْقَىٰ – {طه 2 } "އަހަރެން މިޤުރުއާން ތިބާގެ މައްޗަށް ބާވައިލެއްވީ، ތިބާގެ ހިތްދަތިވެ، އަބާއްޖަވެރިވުމަކަށް ނޫނެވެ."
ވަރަށް ބޮޑު ތެދެކެވެ. އެ ޤުރުއާން ބާވައިލެއްވީ އުފާވެރިކަމާއި، ހިތްހަމަޖެހުމާއި، ބާއްޖަވެރިކަމަށްޓަކައެވެ.
ޤުރުއާނާއެކުގައި އުޅޭ ޢާއިލާއެއް ދުވަހަކުވެސް އަބާއްޖަވެރިކަމުގެ ތެރެއަކަށް ނުދާނެއެވެ. ޤުރުއާނަކީ މުޅި ޢާއިލާއަށް އުފާވެރިކަން ގެނެސްދޭ ފޮތެކެވެ.
--ޝައިޚް މުޙައްމަދު ޝާފިޢު
