ތިމާގެ ބެލުމުގެ ދަށުގައި ތިބޭ ބައަކަށް އަޅުކަންކުރަން މަގުފަހިކޮށްދީ ހިތްވަރުދިނުމަކީ އަޅުކަމެކެވެ. ﷲ ތަޢާލާ ޘަވާބު ދެއްވަވާނެ ކަމެކެވެ. އަދި އެއީ ކޮންމެ މީހެއްމައްޗަށްވެސް އޮތް މަތިވެރި ވާޖިބެއްވެސްމެއެވެ.
ކަންމިހެން އޮތް ނަމަވެސް ބައެއް ފިރިން ބަލަނީ ހުކުރު ދުވަހަކީ އަނބިމީހާއަށް އެންމެ މަސައްކަތްބުރަ ދުވަސްކަމުގައި ހެދޭތޯއެވެ! އެންމެ ގިނަ ތަކެތި ކައްކަންޖައްސުވާ ދުވަސްކަމަށް ހެދޭތޯއެވެ! އަދި ބައެއް އަނބިން އަމިއްލައަށްވެސް ހުކުރު ދުވަހަކީ އެމީހުންނަށް އެންމެ މަސައްކަތް ބުރަ ދުވަހުގެ ގޮތުގައި ކަންކަން ރާވައެވެ. އެހެންކަމުން އިތުރަށް ވިސްނައިލަމާހިނގާށެވެ.
ހުކުރު ދުވަހަކީ ހެޔޮ ޢަމަލުތައްކުރުން ގިނަކުރުމުގެ ދުވަހެވެ. ހުކުރު ދުވަހުގެ ޘަވާބު ލިބިގަންނަން މަސައްކަތްކުރުމުގައި ވެސް އެހެނިހެން އަޅުކަމާއި އެއްފަދައިން އަންހެނެއް ފިރިހެނެއް އެއްވެސް ތަފާތެއް ނެތެވެ. ހުކުރު ދުވަހާއިމެދު އަންހެނުންގެ ސަމާލުކަން އިތުރުކުރަންޖެހޭ 2 ކަމެއް ފާހަގަކޮށްލާނަމެވެ. އެއީ ކަހްފި ސޫރަތް ކިޔެވުމާއި ރަސޫލް (ﷺ) ގެ މައްޗަށް ޝަލަވާތްކިޔެވުން އިތުރުކުރުމެވެ.
ބައެއް މީހުންނަށް ހީކުރެވިފައި އޮންނަނީ ކަހްފި ސޫރަތް ކިޔެވުމަކީ ހުކުރުނަމާދަށްދާ ފިރިހެނުން ހުކުރަށް ގޮސްތިބެ ކުރަން ޖެހޭ ކަމެއް ކަމަށެވެ. އެއީ އަންހެނުން ކުރަންޖެހޭ ކަމެއް ނޫން ކަމަށެވެ. މިފަދަ ވިސްނުން ލިބިފައި އެވަނީ ދީނީ ގޮތުން މީސްތަކުން ހޭލުންތެރިނުވެ އޮތް ޒަމާނުގައި ބައެއް މުޖުތަމައުތަކުގައި ޢަމަލުކުރަމުން އައި ގޮތުން ކަމަށްވެދާނެއެވެ.
ބުރާސްފަތި ދުވަހުގެ މަޣްރިބު ނަމާދުން ފެށިގެން ހުކުރު ދުވަހުގެ މަޣްރިބު ނަމާދުގެ ވަގުތާ ދެމެދަކީ ހެޔޮކަމާއި ޘަވާބު ލިބިގަތުމަށް ލިބޭ ރަނުގެ ފުރުޞަތެކެވެ. މިވަގުތުތައް ހިމެނިގެންދާނީ ހުކުރު ދުވަހުގެ ތެރޭގައެވެ. ވީމާ "މަޣްރިބުން މަޣްރިބަށް" ކަހްފި ސޫރަތް ކިޔަވައިލުންވާނީ ކިހައި ފަސޭހަކަމަކަށް ހެއްޔެވެ؟ އެކަންކޮށްލުމުން އެއް ހަފްތާއިން އަނެއް ހަފްތާއަށް ތިބާ އުޖާލާކޮށްދޭނެ ނޫރެއް ތިބާއަށް ދެއްވަވާނެތެވެ. އަދި މި އުޖާލާކަން އުޑާއި ހަމައަށް ފޯރުމަކީ ތިބާއަށް ލިބިގެންދާ ކިހައިމަތިވެރި ޝަރަފެއް ހެއްޔެވެ؟
ހަމައެއާއެކު ފާހަގަކޮށްލާނަމެވެ. ބައެއް ޢިލްމްވެރިން ވިދާޅުވަނީ ހުކުރު ދުވަހު ކަހްފި ސޫރަތް ކިޔަވަން އޮތް ޙަދީޘްފުޅަށްބަލާއިރު ކިޔަވަން އޮތީ ފަތިސްނަމާދުން ފެށިގެން ކަމަށެވެ. ސަބަބަކީ މުސްލިމުންނަށް ދުވަސް ފެށެނީ ފަޖުރުލުމުންނެވެ. ދަލީލެއްގެ ގޮތުން ވިދާޅުވަނީ ރޯދަމަހު އިރުއޮއްސުމުން ރޯދަ ވީއްލައި ކައިބޮއި އުޅެނީއެވެ. ރޭގަނޑު ކުރަނީ ރޭއަޅުކަމެވެ. ފަޖުރުލުމުން ތިބެނީ ރޯދައަށެވެ. އެއީ ރޯދަހިފުމަކީ ދުވާލުކުރަން އޮތް ކަމަކަށްވާތީއެވެ. ވީމާ މުސްލިމުންނަށް އަޅުކަންކުރުމުގައި ރޭގަނޑާއި ދުވަސް ތަފާތެވެ.
ކޮންމެއަކސް އަޅުކަންކޮށްގެން މަތިވެރި ޘަވާބާއި ޝަރަފު ހޯދަން މަސައްކަތްކުރުމުގައި އަންހެނެއް ފިރިހެއްގެ މެދުގައި އެއްވެސް ތަފާތެއް ނެތެވެ. އެމީހަކު ކުރި މަސައްކަތަކާއި އެއްވަރަށް އެމީހަކަށް ދެއްވަވާނެތެވެ!
ދެން ފާހަގަކުރަން ޖެހެނީ ރަސޫލް (ﷺ)ގެ މައްޗަށް ޞަލަވާތް ކިޔެވުން ގިނަކުރުމެވެ. ޞަލަވާތް ކިޔެވުމަށް ބަލައިފިނަމަ އެކަމަށް އިހްމާލްވަމުންދަނީ ހަމައެކަނި އަންހެނުންނެއްވެސް ނޫނެވެ. އަންހެނުންނާއި ފިރިހެނުންނެވެ. ކޮންމެ ހުކުރު ދުވަހަކު ޚުޠުބާގަޢާއި އެނޫންވެސް ގޮތް ގޮތުން އަބަދު ހަނދާންކޮށްދެމުން ގެންދާއިރުވެސް ސަމާލުކަން ނުދެނީ ކީއްވެގެންހެއްޔެވެ؟
اللهم صل وسلم على نبينا محمد و على آله وصحبه أجمعين.
- އިސްލާމީ ތިލަފަތުގެ ދަރުސަކުން
