ކުރިމަތިވާ ނުތަނަވަސްކަމަށައި ދަތި އުނދަގޫ ކަންކަމަށް އަބަދު ވިސްނަން ވެއްޖެނަމަ އެހެންކަމެއް ކުރާނެ ވަޤުތެއް ހަމަ އެކަކަށްވެސް ނުލިބޭނެއެވެ. ސަބަބަކީ ދުނިޔެއަކީ މައްސަލަތަކުން ފުރިގެންވާ ތަނެކެވެ. އެހެންވީމާ އަބަދުވެސް ދާނީ މައްސަލަތައް ކުރިމަތިވަމުންނެވެ.
ގިނަބައަކަށް ކަންކުރެވޭގޮތަކީ އެއްވެސް ބާވަތެއްގެ ދަތި އުނދަގޫކަމެއް ކުރިމަތިވެއްޖެ ނަމަ އެކަމަކާއި މެދު ވިސްނަމުންގޮސް ނަމާދަށް ހުންނައިރުވެސް އެ މައްސަލަތައް މަތިން ހަނދާންކުރަންހަދައިގެން ނަމާދަށްވެސް ސަމާލުކަން ނުދެވެނީއެވެ. ﷲ ތަޢާލާއަށް ކުރަން ޖެހޭ އަޅުކަން ވެސް ފުރިހަމަނުކުރެވެނީއެވެ.
އެއިގެ އިތުރުން ބައްދަލުވާހައި ބައެއްގެ ގާތު ހަމަ އެއްކަމެއްގެ ވާހަކަތައް ދައްކައި ޝަކުވާ ކުރެއެވެ. އެނޫންކަމެއް އެމީހާގެ ސިކުނޑީގައި ހުންނަ ކަމަކަށްވެސް ނުވެއެވެ. އެފަދަ މީހުންނަށް ﷲ ތަޢާލާ ވަޙީކުރައްވަވާފައިވަނީ މިފަދައިންނެވެ.
"އަދި ކަލޭގެފާނު ކެތްކުރައްވާށެވެ! ފަހެ، ހަމަކަށަވަރުން، އިޙްޞާންތެރިންގެ ދަރުމަ، ﷲ ގެއްލެނި ނުކުރައްވާނެތެވެ." (ހޫދު: 115)
ވީމާ އަހަރެމެންނަށް އޮތީ ކެތްތެރިވުމެވެ. މަސައްކަތްކުރަންވީ އިޙްޞާންތެރިންގެތެރެއިން ވުމަށެވެ. އިޙްޞާންތެރިކަމުގެ މާނައިގައި ތިމާ އަޅުކަންކުރާއިރު ތިމާއަށް ﷲ ތަޢާލާ ނުފެނުނު ނަމަވެސް ﷲ ތަޢާލާ 7 އުޑުމަތިން ތިމާކުރާ އަޅުކަން ބައްލަވައިވޮޑިގެންވާކަން ޤަބޫލުކޮށް ވީހައި ފުރިހަމައަށް އަޅުކަންކުރުން ވަނީ ހިމެނިގެންނެވެ.
މިއާޔަތުގައި ވަޙީކުރައްވަވާފައި އެވަނީ އިޙްޞާންތެރިންނަށް ހުރި ދަރުމަ ގެއްލެނި ނުކުރައްވަވާނެ ކަމެވެ. ކެތްތެރިވެ އިޚްލާޞްތެރިކަމާއި އިޙްޞާންތެރިކަމާއިއެކު އަޅުކަންކުރާ މީހުންގެ ބޭނުންތައް ފުއްދަވައި ދެއްވަވާނެ ކަމެވެ.
މިހުންނަނީ އައު ވާހަކަތަކެއް ނޫނެވެ. ނަމަވެސް މިއީ ގިނަގިނައިން ހަނދުމަކޮށްދޭންޖެހިފައިވާ ކަމަކަށްވާތީ ހަމަ ހަނދުމަކޮށްލައިދިނީއެވެ.
- އިސްލާމީ ތިލަފަތުގެ ދަރުސަކުން
