ލޯބީގެ މިޘާލަކީ ކުޑަކުޑަ ގަހެއްގެ މިޘާލެވެ. ގަސް ހެދިބޮޑުވާނީ ފެނާއި ކާނާ ދިންވަރަކުންނެވެ. ހަމަ އެފަދައިން ލޯތްބަށްވެސް ފެނާއި ކާނާ ބޭނުންވެއެވެ. ދިރުވައި އާލާކުރަން މަސައްކަތްކުރަން ޖެހެއެވެ.
އަހަރެމެން ޔަޤީންކުރަން ޖެހޭނެ ކަމަކީ ކޮންމެ ކަމެއްގައިވެސް އެންމެ ފައިދާހުރި ގޮތް ފެންނާނީ ޤުރްއާނާއި ސުންނަތުންކަމެވެ. ރަސޫލް ﷺ ގެ ޢަމަލުފުޅުތަކުންކަމެވެ.
ޢާއިޝަތުގެފާނުގެ އަރިއަހުން ރިވާވެގެންވާ ޙަދީޘްފުޅެއްގައިވަނީ ރަސޫލް (ﷺ) ޢައިޝަތުގެފާނާއި ކައިވެނިބައްލަވައިގެން އުޅުއްވަމުން އެކަމަނާދެކެ ލޯބިފޅުވެވަޑައިގަންނަވާކަމަށް ހަދީޘްފުޅު ކުރައްވަވާ ކަމަށާއި އަދި ދުވަހަކުވެސް ވަރިނުކުރައްވަވާނެ ކަމަށް ޙަދީޘްފުޅު ކުރެއްވެވި ކަމަށެވެ.
މިކަމުން އެނގިގެން މިދަނީ ކައިވެނިކޮށްގެން ކިތަންމެ ގިނަ ދުވަހަކު އުޅުނު ނަމަވެސް، ޢުމުރުން ކިތަންމެ ދޮށިވީނަމަވެސް އެކަކު އަނެކަކު ދެކެ ލޯބިވާކަން ހާމަކުރަންޖެހޭނެ ކަމެވެ. އަދި ވަކިނުވެ އެކުގައި ދިރިއުޅޭނެ ކަމުގެ ވައުދު ތަކުރާރުކުރަންޖެހޭނެ ކަމެވެ.
ހަމައެއާއިއެކު ސަމާލުކަންދޭންވީ ކަމަކީ ދުލުން މިފަދަ ބަސްބުނުމަކުން އެކަނި ނުފުދޭނެ ކަމެވެ. ރަސޫލް (ﷺ) ޢަމަލުފުޅު ކުރެއްެވިފަދައިން ޢަމަލުކުރަންވެސް ޖެހޭނެ ކަމެވެ. ދިރިއުޅުމުގެ ކަންކަމުގައި ބައިވެރިވެ އެކަކު އަނެކަކަށް އެހީތެރިވެދޭންޖެހޭނެ ކަމެވެ. އިޚްލާޞްތެރިކަމާއި ވަފާތެރިކަން އިސްކުރަންޖެހޭނެ ކަމެވެ.
މިޒަމާނުގައި ކަންކަން ހިނގަމުންދާގޮތަށްބަލާއިރު ލޯބީގެ ވާހަކަތައް ދެއްކުމާއި އަދި ލޯބިވާކަން ހާމަކުރުން ވެފައި އޮންނަނީ ކައިވެނީގެ ކުރިން ކުރާކަމަކަށެވެ! ކައިވެނިކުރުމަށްފަހު އެބާވަތުގެ ވާހަކަތައް ދެއްކުން އޮންނަނީ މަދުކުރެވިފައެވެ. ދުވަސްކޮޅެއްފަހުން ލޯބިވާކަން ހާމަކޮށް ބަސް ބުނުން އޮންނަނީ ހަމައެކަނި ވަކި ދުވަސްތަކަކު ކުރާކަމަކަށް ހަދައިފައެވެ.
މިއީ މިކަން އޮންނަންވީ ގޮތެއް ނޫނެވެ. އެކަކު އަނެކަކު ދެކެ ލޯބިވާކަން ހާމަކުރަން ވަކިއުމުރެއް ނެތެވެ! އެއީ އަބަދުވެސް ކުރަމުން ގެންދަން ޖެހޭނެ ކަމެކެވެ. ދިރުވައި އާލާކުރަމުން ގެންދަން ޖެހޭ ކަމެކެވެ. އެކަމުގައިވެސް ރަސޫލް (ﷺ) ވަނީ އުންމަތަށް ނަމޫނާ ދައްކަވައިފައެވެ.
--ޑރ، ޔާސިރު ޤާޟީގެ ދަރުސަކުން
