ކިތަންމެ ގާތް މީހެއްގެ ގާތުގައި ނަމަވެސް ދެފަހަރަކު ކަމަކަށް އެދިއްޖެނަމަ ފޫހިވެއެވެ. ޙާލުބަލަން ނުގުޅާތަނުގައި ގުޅީމާ ފޯނު ނެގުންވެސް ހުއްޓާލައެވެ. ހިތާމައަކީ ގިނަ ފަހަރު އަމިއްލަ ޢާއިލާގެ މީހެއްގެ ގާތުގައިވެސް ކަްނކަމު އެދޭނަމަ އެމީހަކުދެކެ ފޫހިވާ ކަމެވެ.
ނަމަވެސް ﷲ ތަޢާލާގެ ޙަޟްރަތުގައި އެކަން މުޅިން ތަފާތެވެ.
ނިކަން ވިސްނައިލަބަލާށެވެ! ﷲ ތަޢާލާ އެމީހަކު ދެކެ އެންމެ ބޮޑަށް ލޯބިވެވޮޑިގަންނަވާ އެއްކަމަކީ ކަންކަމަށް ބޭނުންވެގެން ގިނަގިނައިން އެކަލާނގެ ޙަޟްރަތުގައި ދެންނެވުމަށެވެ. ކަންކަމަށް އެދިގެން ގިނައިން ދަންނަވާ ވަރަކަށް އެމީހަކަށް ﷲ ތަޢާލާ ލޯބިވެވޮޑިގަންނަވާ މިންވަރު އިތުރުވެގެންދެއެވެ. އަދި އެމީހާ އެދޭ ކަންކަން ހިންމަވައި ދެއްވަވަތެވެ. ނުވަތަ އެއަށްވުރެ މާރަނގަޅު ގޮތްތައްވެސް މިންވަރުކުރައްވަވަތެވެ.
މީސްތަކުންނޭވެ! ކޮންމެ ކަމަކަށް ބޭނުންވިޔަސް ﷲ ތަޢާލާގެ ޙަޟްރަތުގައި ދެންނެވުމަށް ﷲ ތަޢާލާ އަންގަވާފައިއެވަނީ އެއްވެސް ޙާލެއްގައި މީސްތަކުންގެ ނިކަމެތިކަން އަންގަވައި ދެއްވެވުމަކަށް ނޫނެވެ. ﷲ ތަޢާލާ މީސްތަކުންގެ ދެކެ ލޯބިވެވޮޑިގަންނަވާ މިންވަރު އަންގަވައި ދެއްވެވުމަށެވެ.
އެކަމުން އަހުރެމެން ލިބިގަންނަން ޖެހޭ އެންމެ މުހިންމު ފިލާވަޅަކީ އަހުރެމެން އެންމެ ބޮޑަށް ލޯބިވާންވީ ﷲ ތަޢާލާގެ ޙަޟްރަތަށް ކަމެވެ. އަހުރެމެން ފުރިހަމަ ގޮތުގައި ﷲ ތަޢާލާއަށް ކިޔަމްނަތެރިވާންޖެހޭނެ ކަމެވެ. އަދި ﷲ ތަޢާލާގެ ލޯބިވެވޮޑިގަތުން ގެއްލިގެން ހިނގައިދާނެ އެއްވެސް ކަމެއް ކޮށްގެން ނުވާނެ ކަމެވެ.
އެގޮތުގައި ޘާބިތުވެ ހުރެއްޖެ މީހަކަށް ﷲ ތަޢާލާ ދުނިޔޭގައިވެސް އުފާވެރިކަން ދެއްވަވައި އަދި އާޚިރަތް ދުވަހު ދެއްވަވާ އުފާވެރިކަން މާބޮޑުވާނެއެވެ. އިން ޝާ ﷲ
- ބިލާލް އައްސަދުގެ ދަރުސަކުން
