ބައެއް މީހުން ދުޢާކުރުމަށްފަހު އެކަމެއް ހިންމަވައި ދެއްވެވުން ލަސްވެލާއިރަށް ތިމާކުރި ދުޢާ ޢިޖާބަ ނުކުރެއްވެވީ ކަމަށް އެބަ ޤަބޫލުކުރެއެވެ. އަދި ﷲ ތަޢާލާ ތިމާގެމަތިން ހަނދުމަފުޅު ނެތިކޮށްލެވެވީ ކަމަށްވެސް އެބަ ޤަބޫލުކުރެއެވެ.
އެއިރުން ވާނީ ކިހިނަކުން ހެއްޔެވެ؟ އެއިރުން ވާނެގޮތްވެސް ބުނެދޭނަމެވެ.
ޤުދްސިއްޔަ ޙަދީޘްފުޅެއްގައި ﷲ ތަޢާލާ ވަޙިކުރައްވަވާފައިވަނީ ކޮންމެ މީހަކާއިއެކުވެސް ތިމަން ﷲ ވޮޑިގެންވަނީ އެމީހަކު ތިމަން ﷲ އާއިމެދު ޤަބޫލުކުރާ ގޮތަކަށް ކަމަށެވެ. އެބަސްފުޅުން އެނގެނީ ކުރި ދުޢާ ޢިޖާބަ ނުކުރައްވަވާނެ ކަމަށް ޤަބޫލުކުރުމުން އޭނާގެ ދުޢާ ޢިޖާބަ ނުކުރައްވަވައިފާނެ ކަމެވެ. އަދި ﷲ ތަޢާލާ ތިމާގެމަތިން ހަނދުމަފުޅު ނެތިކޮށްލައްވަވައިފިކަމަށް ޤަބޫލުކޮށްފި މީހަކުގެ މަތިން ހަނދުމަފުޅު ނެތިކޮށްލައްވަވައިފާނެ ކަމެވެ.
ވީމާ ދުޢާކުރުމަށްފަހު ތިމާކުރި ދުޢާ ޢިޖާބަ ނުކުރެއްވެވީ ކަމަށް ޤަބޫލުކުރުމާއި އަދި ﷲ ތަޢާލާ ތިމާގެމަތިން ހަނދުމަފުޅު ނެތިކޮށްލައްވަވައިފިކަމަށް ޤަބޫލުކުރުމަކީ އެމީހަކު ކުރި ދުޢާ ޢިޖާބަނުކުރައްވަވައިފާނެ ސަބަބެކެވެ. އަދި ތިމާއަށް ﷲ ތަޢާލާގެ ރަޙްމަތް ބޮޑުތަނުން އުނިވެގެން ހިނގައިދާނެ ސަބަބެކެވެ.
މިހުރީ ބޮޑެތި ކަންކަމެވެ. ވީމާ މިކަންކަމަށް އަބަދުވެސް ވަރަށް ބޮޑަށް ސަމާލުކަންދޭންވާނެއެވެ. ދުޢާ ކުރުމަށްފަހު ޢިޖާބަ ކުރައްވަވާނެ ކަމުގެ ޔަޤިންކަމުގައި ހުންނަންޖެހޭ ސަބަބަކީ އެއީއެވެ. އެއިރުން އެމީހަކާއިއެކު އެގޮތުގައި ﷲ ތަޢާލާ ވޮޑިގެންވާނެތީއެވެ. އިން ޝާ ﷲ
- ޝައިޚް ޝުޢައިބް އަބޫ ޔޫސުފްގެ ދަރުސަކުން
