ގިނަ ބައަކު ދުޢާކުރަން ފަށަނީ ހަމަ ރަނގަޅަށެވެ. ފުރަތަމަ ކަމަކަށް ﷲ ތަޢާލާއަށް ޙަމްދު ޘަނާ ކިޔައެވެ. ދެވަނަ ކަމަކަށް ރަސޫލް ޞައްލަ ﷲ ޢަލައިހި ވަސައްލަމައަށް ޞަލަވާތް ކިޔަވައެވެ.
ނަމަވެސް ގިނަ ބައަކު 3 ވަނަ ކަންތައް ހަނދުމަނެތިކޮށްލައެވެ. އެއީ ތިމާއަށް ކުރެވިފައިވާ ފާފަތައް ފުއްސަވައި ދެއްވެވުން އެދިދެންނެވުމެވެ. ގިނަ ބައަކު އެކަން ނުކޮށް ދަންނަވަނީ އެމީހަކު ބޭނުންވާ ކަންތަކުގެ ވާހަކައެވެ.
ރަނގަޅު ގޮތަކީ 3 ވަނަ ކަމަކަށް ފާފަތައް ފުއްސަވައި ދެއްވެވުން އެދި ދެންނެވުމަށްފަހު 4 ވަނަ ކަމެއްގެ ގޮތުން ތިމާ ބޭނުންވާ ކަންކަމުގެ ވާހަކަ ދެންނެވުމެވެ.
ދުޢާ ނިންމާލުމުގެ ކުރިން 5 ވަނަ ކަމެއްގެ ގޮތުންވެސް ރަސޫލް ޞައްލަﷲ ޢަލައިހިވަސައްލަމައަށް ޞަލަވާތްކިޔަވާށެވެ. އަދި އެންމެ ފަހުން ކުރާ 6 ވަނަ ކަމަކަށް ﷲ ތަޢާލާ މަތިވެރިކުރާށެވެ. ޙަމްދުޘަނާ ކިޔާށެވެ.
ދުޢާކުރުމުގެ ކުރިން ހެޔޮ ޢަމަލެއް ކުރާށެވެ. ދުޢާކުރުމުގެ ތެރެއިން ތިމާގެ ދެރަނިކަމެތިކަން ބަޔާންކޮށް އެންމެ ކަރުނަތިއްކެއް ނަމަވެސް ވައްޓައިލެވިއްޖެނަމަ އެދެވުނީ އެންމެ މަތިވެރި ދަރަޖައަށެވެ.
މިމަގުން ދުޢާކުރަން މަސައްކަތްކުރާށެވެ! ޢިޖާބަކުރައްވަވާނެތެވެ. އިން ޝާ ﷲ
- މުފްތީ މެންކުގެ ދަރުސަކުން
