މާތް ﷲ އެކަލޭގެފާނަށް ރުއްސުން ލެއްވެވި އަބޫޒުހައިރު، ޢުމާރަތު ބުނު ރުވައިބާގެ ކިބައިން ރިވާވެގެންވެއެވެ. އެކަލޭގެފާނު ވިދާޅުވިއެވެ. ރަސޫލް ﷺ ޙަދީޘްފުޅު ކުރައްވަވާތީ ތިމަންކަލޭގެފާނު އަޑު އެއްސެވީމެވެ. އެކަލޭގެފާނު ޙަދީޘްފުޅުކުރެއްވެވިއެވެ.
"{އިރުއެރުމުގެ ކުރީގައްޔާއި އިރުއޮއްސުމުގެ ކުރީގައި (އެބަހީ: ފަތިސްނަމާދާއި ޢަޞްރުނަމާދު) ކުރުމަށް އާދަކޮށްފި އެއްވެސް މީހަކު (ދަންނާށެވެ!) ހަމަކަށަވަރުން، އެމީހަކު ނަރަކައިގެ އަލިފާނުގެތެރެއަށް ނުވަންނަހުއްޓެވެ.}
ރިޔާޟުއްޞާލިޙީން: 1048
މިއީ މިދެ ނަމާދުގެ މަތިވެރިކަން ބަޔާންކޮށްދޭ ޙަދީޘްފުޅުތަކުގެ ތެރެއިން ޙަދީޘްފުޅެކެވެ. ހަމައެކަނި މިދެނަމާދުކުރުމުން ފުދެނެކަމުގެ ދަލީލެއް ނޫނެވެ. މުސްލިމުންނަށް އޮތީ ފަރުޟް 5 ނަމާދުކުރުމެވެ. 5 ނަމާދުން އެންމެ ނަމާދެއް ނުކުރާނަމަވެސް އެމީހަކީ ނަމާދު ޤާއިމުކުރާ މީހަކަށް ނުވާނެއެވެ. މުސްލިމުންނަށް ވާންޖެހޭނީ ނަމާދު ޤާއިމުރާ ބައަކަށެވެ.
އެކަން އޮޅުވާލައި އެމީހަކަށް ފަސޭހައިން ކުރެވޭ ނަމާދުތައް ކުރާ ބައަކު އުޅެއެވެ. ދުވާލަކު 2، 3 ނަމާދުކުރާ މީހުންވެސް އުލެއެވެ. އެއިން އެއްވެސް މީހަކީ ނަމާދު ޤާއިމުކުރާ މީހަކަށް ނުވެވޭނެއެވެ.
- އިސްލާމީ ތިލަފަތުގެ ދަރުސަކުން
