ދަތިއުނދަގޫ ޙާލަތެއް ކުރިމަތިވުމުން އެހާލަތާއި ގުޅިގެން ދެއްވަވާނެ ލުއިފަސޭހަކަން، އުފާވެރިކަން ދެއްވެވުން އެދިދުޢާކުރާށެވެ! އެލުއިފަސޭހަކަން ލިބެން އޮތް މަގު ދައްކަވައި ދެއްވެވުން އެދި ދުޢާކުރާށެވެ! އެމީހަކަށް ލުއިފަސޭހަކަން މިންވަރުކުރައްވަވައި ދެއްވާނެތެވެ! ޓަކިޖަހަންވީ ދޮރުތައް އަންގަވައި ދެއްވަވާނެތެވެ! އިން ޝާ ﷲ
ބައެއް މީހުންނަށް ޤަބޫލުކުރެވެނީ ހިތްހަމަޖެހުމާއި ލުއިފަސޭހަކަން ލިބިގެންދާނީ މުޞީބާތަކަށްފަހުގައި ކަމަށެވެ. ނަމަވެސް ﷲ ތަޢާލާ ވަޙީކުރައްވަވާފައިވަނީ ކޮންމެ މުޞީބާތާއިއެކުގައިވެސް ، ނުވަތަ ދަތި އުނދަގޫކަމަކާއިއެކުގައިވެސް ފަސޭހަކަން މިންވަރުކުރައްވަވާފައިވާ ކަމަށެވެ. ވީމާ މިއީ މުޅިން ތަފާތު 2 މާނައެކެވެ.
إِنَّ مَعَ ٱلْعُسْرِ يُسْرًا
"ފަހެ، ހަމަކަށަވަރުން، އުނދަގޫކަމާއިއެކު ފަސޭހަކަންވެއެވެ." (އައްޝަރްޙި: 6)
މިއާޔަތުން އެނގިގެންދަނީ އެއް ދޮރު ބަންދުކުރައްވަވާއިތުރު ދޮރުތައް ހުޅުއްވަވައިދެއްވަވާނެކަމެވެ. އެއްކަމަކުން ދަތިކުރައްވަވާއިރު އިތުރު ރަހްމަތައް މިންވަރުކުރައްވަވާފައި ވާނެކަމެވެ. ވީމާ އަހަރެމެންނަށް އޮތީ ކުރިމަތިވި ދަތިއުނދަގޫ ހާލަތުން ސަލާމަތްވެވެންދެން އިންތިޒާރުކުރުމެއް ނޫނެވެ. އެކަމުގެ އިންތިޒާރީގައި ތިބޭއިރުވެސް އެދަތިކަމާއިއެކު ﷲ ތަޢާލާ ފޮނުއްވެވި ރަޙްމަތް ހޯދަން މަސައްކަތްކުރުމެވެ. އެކަން ދެނެގަންނަން މަސައްކަތްކުރުމެވެ.
މިއާޔަތާއިމެދު ވިސްނައިލުމުން އެނގެނީ ދަތިއުނދަގޫތައް ކުރިމަތިކުރައްވަވަނީ ރަޙްމަތް އިތުރުކުރައްވަވަން ކަމެވެ. މުއުމިނުން ނިކަމެތި ނުކުރައްވަވާނެކަމެވެ. މާޔޫސްވެ ގޮތް ހުސްވެގެން އުޅެން ނުޖެހޭނެ ކަމެވެ.
- ޑރ. ނޫމާން ޢަލީ ޚާންގެ ދަރުސަކުން
