ބައެއް މީހުންނަކީ އެއްގޮތަކަށްވެސް ނަމާދުނުކުރާ މީހުންނެވެ. އެމީހުންނަކީ ކާފިރުންނެވެ. ރޯދަހިފައި ޒަކާތްދީ އަދި ޙައްޖުވެފައިވީނަމަވެސްމެއެވެ. މިއީ އަހުރެންގެ ބަހެއް ނޫނެވެ. ރަސޫލް ޞައްލަﷲ ޢަލައިހިވަސައްލަމަ އެކަން ޙަދިޘްފުޅު ކުރައްވަވާފައި އޮތް ގޮތެވެ.
ދެން އޮތީ ފަރުޟް 5 ނަމާދަށް ރައްކައުތެރިނުވެ ހިތަށްއަރާ ޢަދަދަކަށް ނަމާދުކުރާ މީހުންނެވެ. އެމީހުންނަކީ މުނާފިޤުންނެވެ. ނަމާދަށް ކަންނެތްވުމަކީ މުނާފިޤުންގެ ސިފައެއްކަން ކީރިތި ޤުރްއާނުން އެނގެން އެބައޮތެވެ.
ދެން ނިކަން ބުނެބަލާށެވެ! ފަރުޟް 5 ނަމާދަށް ރައްކައުތެރިނުވާ މީހަކަށް އޮތީ ކޮން ސަލާމަތްކަމެއް ހެއްޔެވެ؟ އެއްގޮތަކަށްވެސް ނަމާދުނުކުރާނަމަ އޭނާއެވަނީ ކާފިރަކަށެވެ. 5 ނަމާދު ހަމައަށް ނުކުރާނަމަ އޭނާއެވަނީ މުނާފިޤަކަށެވެ.
އަހުރެންގެ އިލްތިމާސަކީ މުސްލިމަކަށްވެ މުސްލިމެއްގެ ގޮތުގައި ހުންނަން ބޭނުންވާނަމަ ފަރުޟް 5 ނަމާދަށް ރައްކައުތެރިވާށެވެ! ނޫނީ އެމީހަކަށް ޤިޔާމަތް ދުވަހު ސަލާމަތްކަމެއް ނެތެވެ. އަދި މިކަމަސްވެސް ވިސްނައިލާށެވެ!
މީހަކު ނަމާދުނުކުރަނީއެވެ. އެގޮތުގައި ހުއްޓައި އޭނާ މަރުވެއްޖެނަމަ ދެންވާނެ ގޮތަކާއިމެދުގައެވެ. ފަރުޟް 5 ނަމާދު ހަމައަށް އަދާނުކުރާ މީހަކު މަރުވެއްޖެނަމަ ދެންވާނެ ގޮތަކާއިމެދުގައެވެ. އެމީހުންނަށް އޮތް ޙުކުމް ކުރިން މިބަޔާންކުރީއެވެ.
- ޝައިޚް ޢާޞިމް އަލްޙަކީމްގެ ދަރުސަކުން
