ޢާއިޝަތު ރަފާޙް ޢަލީ
ސުވަރުގެ ވައްދަވާނީ އެއްވެސް ފާފައެއް ނުކުރާ މީހުންނެއް ނޫނެވެ. ފާފަކުރެވުމުން ތައުބާވެ ހެޔޮ ޢަމަލުތައްކޮށް ތަޤްވާވެރިކަންމަތީގައި އުޅުނު މީހުންނެވެ. އެހެންކަމުން ސުވަރުގެއަކީ ﷲ ތަޢާލާ އެކަލާނގެއަށް ތަޤްވާވެރިވި މީހުންނަށް ތައްޔާރުކުރައްވަވާފައިވާ ތަނެކެވެ. އިންސާނުންގެ ބުއްދިއަށް ނުގެނެވޭހާ ގިނަގުނަ ނިޢުމަތްތައް ﷲ ތަޢާލާ ވަނީ އެތަނުގައި ލައްވަވާފައެވެ.
ﷲ ތަޢާލާ ކީރިތި ޤުރްއާނުގައި ޒުޚްރުފް ސޫރަތުގެ 71 ވަނަ އާޔަތުގައި ވަޙީ ކުރައްވާފައިވެއެވެ.
يُطَافُ عَلَيْهِم بِصِحَافٍ مِّن ذَهَبٍ وَأَكْوَابٍ ۖ وَفِيهَا مَا تَشْتَهِيهِ الْأَنفُسُ وَتَلَذُّ الْأَعْيُنُ ۖ وَأَنتُمْ فِيهَا خَالِدُونَ ﴿٧١﴾
މާނައީ: "އެއުރެންގެ ގާތުގައި ރަނުގެ ކަންވާރުތަކާއި، ތަށިތަކާއިގެން ބުރުޖެހޭނެތެވެ. އަދި އެތާނގައި ހިތްއެދޭ، އަދި ލޯތަކަށް އަރާމު ލިބިދޭ ހުރިހާ ތަކެތި ވެއެވެ. އަދި ތިޔަބައިމީހުން އެތާނގައި ދެމިތިބޭނެތެވެ."
މިއީ މާތް ﷲ ގެ ރަޙްމަތްފުޅުން ސުވަރުގޭގެ އަހުލުވެރިންނަށް ދެއްވަވާފައިވާ ނިޢުމަތްތަކެކެވެ. މިފަދަ ރަޙްމަތެއް އެބައިމީހުންނަށް ދެއްވަވާފައިވަނީ އެބައިމީހުން ދުނިޔޭގެ ޙަޔާތުގައި އެހެން އަޅުތަކުންނާ ޚިލާފު ޞިފަތަކަކުން ޞިފަލިބިގެންފައިވާތީއެވެ.
އެހެންކަމުން އޭގެ ތެރެއިން ބައެއް ސިފަތައް ތިރީގައި ތަފްޞީލުކޮށްލާނަމެވެ
· ﷲ ތަޢާލާއަށް ފުރިހަމަ ގޮތުގައި އީމާންވުން: ސުވަރުގޭގެ އަހުލުވެރީންގެ ސިފައަކީ ﷲ ތަޢާލާއަށް ފުރިހަމަ ގޮތުގައި ގަބޫލުކުރުމާއި، އީމާންވުމާއި، މަލާއިކަތުންނާއި، ފޮތްތަކާއި، ރަސޫލުބޭކަލުންނާއި، ޤަޟާ ޤަދަރާއި، ހުރިހާ ބަސްތަކާއި ޢަމަލުތަކެއްގައި އީމާންވުމެވެ.
· ނަމާދުކުރުން: ﷲ ތަޢާލާ މުއުމިނޫން ސޫރަތުގެ 1 އަދި 2 ވަނަ އާޔަތުގައި ވަޙީ ކުރައްވާފައިވެއެވެ. قَدْ أَفْلَحَ الْمُؤْمِنُونَ ﴿١﴾ الَّذِينَ هُمْ فِي صَلَاتِهِمْ خَاشِعُونَ ﴿٢﴾ މާނައީ: "مؤمن ން ކާމިޔާބުވެއްޖެކަން ކަށަވަރެވެ. (1) އެއުރެންނީ، އެއުރެންގެ ނަމާދުގައި މަޑުމައިތިރިވެތިބޭ މީހުންނެވެ. (2) " ސުވަރުގޭގެ އަހުލުވެރިން ދުނިޔޭގެ ޙަޔާތުގައި ނަމާދުކުރަނީ ޚުޝޫޢަތްތެރިކަމާއެކު ހިތް ޙާޟިރުކޮށްގެންނެވެ. އެގޮތުން މާތްالله ދުޢާއާއި ޛިކުރުކޮށް އެކަލާނގެއާ ގާތްވަމުންދާ ކަމުގެ އިޙްސާސް ކުރެވެމުންނެވެ. މާނައަކީ ނަމާދުގައި ޚުޝޫއަތްތެރިވުމަކީ ވަގުތަށް ނަމާދު އަދާކުރުމާއި، އޭގެ ރުކުންތަކާއި ވާޖިބުތައް ރަނގަޅަށް އަދާކުރުމެވެ.
· ގިނަގިނައިން ތައުބާވުން: ﷲ ތަޢާލާ ތައުބާވާ މީހުންނަށް ސުވަރުގެ ލިބޭނެކަމަށް ވަޢުދުވެވަޑައިގެންފައިވެއެވެ. އެކަލާނގެ ޙަޟްރަތުން ޝަރަފާއި ނިޢުމަތުގެ ސަބަބުންނެވެ. ތައުބާވުމަކީ ކުރީގެ ފާފަތަކާއި ފާސިޤުވުންތަކަށް ދޫކޮށްލާ، ދީނުގައިވާ ވާޖިބުތަކާއި ފަރްޟުތައް ކުރުމަށް ޢަޒުމް ކަނޑައަޅާ އެކަން ކުރުމެވެ.
· ބޭކާރު ވާހަކަތަކާއި ޢަމަލުތަކުން ދުރުވެތިބުން: އެހެނީ އެއީ ފައިދާއެއް ނެތް ކަމެކެވެ.
ﷲ ތަޢާލާ މުއުމިނޫން ސޫރަތުގެ 3 ވަަނަ އާޔަތުގައި ވަޙީ ކުރައްވާފައިވެއެވެ. وَالَّذِينَ هُمْ عَنِ اللَّغْوِ مُعْرِضُونَ ﴿٣﴾ މާނައީ: "އަދި އެއުރެންނީ، ބޭކާރު ވާހަކަތަކާއި، ކަންތަކުން ދުރުހެލިވެތިބޭ މީހުންނެވެ."
ފަހެ ސުވަރުގެ ޙާޞިލުކުރުމަށް އެދޭ މީހުން އެމީހުންގެ ވަގުތުގެ ބޭނުން ހިފާނީ އެމީހުންނަށް ފައިދާއެއް ލިބޭ ކަންކަމުގައެވެ. ބޭކާރު ކަންކަމުގައި އެބައިމީހުން ދުރުހެލިވެއެވެ.
