އަހުރެމެން، އަހުރެމެންނަށްވުރެ މަތީދަރަޖައިގެ މީހުން ކުރާ ކަންކަމާއިމެދު ސުވާލުކުރަނީ އެމީހުންނަކީވެސް އިންސާނުން ކަމުގައި ވީތީއެވެ. ނިންމާ ނިންމުނަތްކާއިމެދު ސުވާލުކުރަނީ ރަނގަޅު ނޫން ނިންމުމެއް ނިންމައިފާނެތީއެވެ.
އެހެނަސް އެކަން ﷲ ތަޢާލާ އާއިމެދު މުޅިން ތަފާތެވެ. އެހެނީ ﷲ ތަޢާލާއީ ހުރިހާ ކަންކަން އެންމެ މޮޅަށް ދެކެދެނެވޮޑިގެންވާ ރަސްކަލާނގެއެވެ. ވީގޮތާއި ވާނޭ ގޮތްވެސް އެންމެ މޮޅަސް ދެނެވޮޑިގެންވަނީ ހަމައެކަނި ﷲ ތަޢާލާ ކަމަށްވާތީއެވެ.
ﷲ ތަޢާލާއަށް ފުރިހަމަ ގޮތުގައި އީމާންވެގެން ހުންނަ މީހަކު ﷲ ތަޢާލާ ބާވައިލެއްވެވި އެއްވެސް ޙުކުމްފުޅަކާއި ގުޅިގެން އެއްވެސް ސުވާލެއް ނުކުރާނެއެވެ. ހިތުގެއަޑިން ކޮންމެ ކަމެއްވެސް ޤަބޫލުކުރާނެއެވެ.
އެކަމަށްޓަކައި ﷲ ތަޢާލާ ޤިޔާމަތް ދުވަހު ދެއްވަވާ މަތިވެރި ދަރަޖަ ނިކަން ދެކިބަލާށެވެ! ތަޤްވާވެރިންގެ ތެރޭގައި އެމީހަކު ހިމަނުއްވަވައި ދެއްވަވާނެތެވެ! އެކަމުގެ ސަބަބުން އެމީހަކަށް ޞިރާޠުމަގު ހުރަސްކުރެވޭނެތެވެ! އިން ޝާ ﷲ
ﷲ ތަޢާލާ އެއްވެސް ކަމެއް ހުއްދަކުރެއްވެވުމުން ނުވަތަ ޙަރާމް ކުރެއްވެވުމުން އެއީ ކީއްވެގެންކަމާއިމެދު ހިތުގައި އެއްވެސް މިންވަރަކަށް ޝައްކު ނުއުފެއްދުމަކީ ޞިރާޠުމަގު ހުރަސްކުރެވޭނެ މީހުންގެ ތެރޭގައި ހިމެނޭނެ ސަބަބެކެވެ.
އެއީ ތަޤްވާވެރިންގެ ސިފައެކެވެ. ﷲ ތަޢާލާއަށް ފުރިހަމަގޮތުގައި ކިޔަމަންތެރިކަން އަދާކުރާކަމުގެ ހެއްކެކެވެ.
މުސްލިމަކަށްވެވޭނީ ފުރިހަމަގޮތުގައި އީމާންވެގެންނެވެ. ފުރިހަމަގޮތުގައި އީމާންވުމަކީ ﷲ ތަޢާލާ ކުރައްވަވާފައިވާ ހުރިހާ އަމުރުފުޅުތައް ބަލައިގަތުމެވެ. ވަކިކަމެއް ދޫނުކޮށް ކޮންމެ ކަމެއްގައިވެސް ބޯލަނބައި ކިޔަމަންތެރިކަން އަދާކުރުމެވެ.
--ބިލާލް އައްސަދުގެ ދަރުސަކުން
