ދަރިންގެ މައްސަލަތައް ބޮޑުވެ ޙައްލުނުކުރެވިގެން ކަންބޯދުވަނީ މިވެނި ގިންތިއަކުން ކަމަށް ބުނެވޭކަށް ނެތެވެ. ހުރިހާ ގިންތިއެއްގައިވެސް އެކަންވެފައި މިއޮތީ އެންމެ ބޮޑު މައްސަލައަށެވެ. ފަޤީރަސް ތަނަވަހަސްމެއެވެ. ތަނަވަސްނަމަ އިތުރަށް މައްސަލަ ބޮޑުވެއެވެ.
މިހެން ބުނަން މިޖެހެނީ އަތް މަތި ތަނަވަސްވެފައި މައިންބަފައިންނަކީ ދުނިޔަވީ ދިރިއުޅުމުގައި ހަރުދަނާ ބައަކަށްވީނަމަވެސް މިއަދު އެންމެ ބޮޑު އެއް މައްސަލައަކަށްވެފައި އޮންނަނީ އެމީހުންގެ ދަރިން ތަރުބިއްޔަތު ނުކުރެވުމުގެ މައްސަލަ ކމަށްވާތީއެވެ. ޚާއްޞަކޮށް ﷲ ތަޢާލާއަށާއި އިސްލާމް ދީނަށް ލޯބިކުރާ ދަރިންގެ ގޮތުގައި ތަރުބިއްޔަތު ނުކުރެވޭކަމުގެ މައްސަލައެވެ.
ކޮންމެ ކަމެއްގެ ވެސް އެންމެ މޮޅު ޙައްލު ފެންނަން އޮތީ ކީރިތި ޤުރްއާނުންނެވެ. ވީމާ މިބަޔާންކުރި ފަދަ މައްސަލަތައް ދިމާވާ ކޮންމެ ބެލެނިވެރިއަކުވެސް ލުޤްމާން ސޫރަތުގެ ތަފްސީރު ކިޔާލައި ފުންކޮށް ވިސްނައިލާށެވެ! އަދި ޢަމަލުކުރަން މަސައްކަތްކުރާށެވެ.
ލުޤްމާންގެފާނު ދަރިކަލުންނަށް ނަޞޭޙަތް ދެއްވެވުމުގައި އަބަދުވެސް އެންމެ އިސްކުރައްވަވާފައިވަނީ ﷲ ތަޢާލާއެވެ! ކަންކަން މަނާކުރައްވަވާއިރުވެސް މަނާކުރައްވަވަނީ ﷲ ތައާލާ އެކަމެއް މަނާ ކުރައްވަވާފައިވާތީކަން ބަޔާން ކުރައްވަވައެވެ. އަދި ﷲ ތައާލާއީ ކުރެވޭ އެންމެ ކުދި ފާފަތަކުގެ ހިސާބުވެސް ބައްލަވާނެ އިލާހްކަން ބަޔާންކޮށް ދެއްވަވައެވެ.
މިކަމުން އެނގެނީ ދަރިން ކުރާ ކަމަކީ ކިތަންމެ ކުޑަ ކަމެއް ކަމަށް ޤަބޫލު ކުރެވުނު ނަމަވެސް އެކަމަކީ އިސްލާމް ދީން ހުއްދަ ނުކުރާ ކަމަކަށްވާނަމަ އެންމެ ފަހަރަކުވެސް އެކަން ކުރަން ހުއްދަދީގެން ނުވާނެ ކަމެވެ. އަދި ދަރިންގެ ހިތްތަކުގައި އެންމެ ޅައުމުރުން ފެށިގެން ﷲ ތައާލާއަށް ލޯތްބާއި ކިޔަމަންތެރިކަން އުފައްދަން ޖެހޭނެ ކަމެވެ. ﷲ ތަޢާލާގެ އަމުރުފުޅު ތަކަށް ބިރުވެތިވެ ރައްކައުތެރިވާން ނަޞޭޙަތްދީ ހާނުވަން ޖެހޭނެ ކަމެވެ. ހަމަ އެއާއިއެކު އެހުރިހާ ކަމެއްގައިވެސް މައިން ބަފައިން އަމަލީ ގޮތުން ދަރިންނަށް ނަމޫނާ ދައްކަން ޖެހޭނެ ކަމެވެ.
މިހާރަކަށް އައިސް ބައެއް ބެލެނިވެރިން އެމީހުންގެ ދަރިންނަށް ކަންކަން ވިސްނައިދޭން މަސައްކަތްކުރާއިރު ގިނަ ފަހަރު ބޭނުންކުރާނީ ކޮންމެވެސް ޢިލްމުވެރިއަކު ބުނެފައިވާ ބަހެކެވެ. އެގަތަށް އެކަން ކުރުމުން ދަރިންނަށް ކުރާ އަސަރު ވަރަށް ބޮޑުތަނުން ކުޑަވާނެއެވެ. އެއިގެ ބަދަލުގައި ކީރިތި ޤްރްއާނާއި ސުންނަތުން މިޘާލު ދައްކާނަމަ ކުރާ ފައިދާ މާބޮޑުވާނެއެވެ.
މިބުނަނީ ވަރަށް ކުޑަކުޑަ މިސާލެކެވެ. ދަރިއަކު ކާތަށިން ނަގާއިރު ދުރުފަރާތުން ނަގާނަމަ މޭޒުމައްޗަށް އެޅިދާނެ ކަމަށް ބުނުމުގެ ބަދަލުގައި ރަސޫލް ޞައްލަﷲ ޢަލައިހި ވަސައްލަމަ ޙަދީޘްފުޅު ކުރައްވަވާފައިވަނީ ތަށީގެ ގާތުން ނަގައިގެން ކާންކަމަށް ބުނާށެވެ! ސުންނަތާއި ޚިލާފަށް ކާނަމަ ތަށިން އިބްލީސްކާނެކަން ވިސްނައިދޭށެވެ! ދަރިފުޅު އެކަމަށް ދޭ ސަމާލުކަން މާބޮޑުވާނެއެވެ. އިން ޝާ ﷲ
ދަރިން ތަރުބިއްޔަތުކުރުމުގައި މިކަންކަމަށް އެކުދިންގެ އެންމެ ޅަފަތުން ފެށިގެން އަމަލުކުރެވިއްޖެނަމަ ނުކިޔަމަންތެރިވުމުގެ މައްސަލަތައް ކުރިމަތިވުން ވަރަށް ބޮޑަށް މަދުވާނެއެވެ.
ހަމަ އެއާއިއެކު ދަރިންނަށް ނަޞޭޙަތްދޭއިރު ރުޅި އިސް ނުކުރާށެވެ. އޯގާތެރިކަން އިސްކުރާށެވެ! އޯގާތެރިކަމާއިއެކު މުޢާމަލާތުކުރާށެވެ! ދަރިންގެ ސަމާލުކަން އިތުރުވާނެއެވެ.
ކޮންމެ ބެލެނިވެރިއަކުވެސް ނިކަން ބުނެބަލާށެވެ! އެންމެފަހުން ދަރިފުޅަށް ހިނިތުންވެލީ ކޮން ދުވަހަކު ހެއްޔެވެ؟ ދަރިފުޅު ރަނގަޅުކަމެއް ކުރުމުން ތަޢްރީފްކުރީ ކޮން ދުވަހަކު ހެއްޔެވެ؟ މިއީ ވެސް ހަމަ ކޮންމެހެން ކުރަން ޖެހޭ ކަންކަމެވެ. ދަރިންގެ ހިތުގައި މައިންބަފައިންނަށް ލޯބި އިތުރުވާނީ އެކަންކަން ކުރުމުންނެވެ. ދަރިންގެ ހިތުގައި މައިންބަފައިންނަށް ލޯބި ތިރުވާ ވަރަކަށް ދަރިންގެ ކިޔަމަންތެރިކަން އިތުރުވާނެއެވެ!
ބޮޑެތި މީހުންނަށް ބެލިނަމަވެސް ނުކިޔަމަންތެރިވުމުގެ މައްސަލަތައް މިފެންނަނީ ﷲ ތަޢާލާއަށް ބިރުވެތި ނުވާ މީހުންގެ ކިބައިންނެވެ. ﷲ ތައާލާގެ އެންގެވުންތަކަށް އިޙްތިރާމް ނުކުރާ މީހުންގެ ކިބައިންނެވެ. ވީމާ ކޮންމެ އިންސާނަކަށްވެސް އެންމެ މުހިންމު ކަމަކީ ﷲ ތައާލާއަށް ބިރުވެތިވެ ކިޔަމަންތެރިވުމުގެ ޢާދަ އެމީހެއްގެ ކިބައިގައި ހަރުލާފައި ހުރުމެވެ. ވީމާ ދަރިން އިޞްލާޙްކުރަން މަސައްކަތް ކުރުމުގައިވެސް އެންމެ މުހިންމު ކަމަކީ އެކުދިންނަކީ ﷲ ތައާލާއަށް ބިރުވެތިވާ ކުދިންގެ ގޮތުގައި ތަރުބިއްޔަތުކުރަން މަސައްކަތް ކުރުމެވެ.
--އިސްލާމީ ތިލަފަތުގެ ދަރުސަކުން
