ޞަދަޤާތްކުރުމުގެ ވާހަކަދައްކާއިރު ދެކަމަކަށް ވިސްނަން ޖެހޭނެއެވެ. ފުރަތަމަ ކަމަކީ ޞަދަޤާތްކުރާމީހާގެ ޙާލު ﷲ ތަޢާލާ ދެނެވޮޑިގެންވާ ކަމެވެ. ތަނަވަސްކަން ހުރެ މަދުން ޞަދަޤާތްކުރަން ލަދުގަންނަންވީވެސް އަދި ދެވެންއޮތް މިންވަރު މަދުވެގެން ލަދުނުގަންނަންވީވެސް އެހެންވެގެންނެވެ.
ދެވަނަކަމަކީ ޞަދަޤާތަސް ލިބުނުވަރު މަދުވެގެން ހިތްބުރަ ނުކުރުމެވެ. އެކަންވެސް ﷲ ތަޢާލާ ދެކެދެނެވޮޑިގެންވާތީއެވެ. އެކަންކަން އެނގެނީ މިކިޔައިދޭ ޙާދިސާއިންނެވެ.
އެއީ ޞަޙާބީ ބޭކަލެކެވެ. އެބޭކަލަކު ކުރެއްވެވި މަސައްކަތްޕުޅުގެ އުޖޫރައަކަށް ލިބިވަޑައިގަތީ ކަދުރުކޮޅެކެވެ. އެބޭކަލަކު އެއިން އެއްބައި ﷲ ތަޢާލާގެ މަގުގައި ޞަދަޤާތްކުރެއްވެވިއެވެ.
އެކަދުރުކޮޅު ހިއްޕަވައިގެން ރަސޫލް ޞައްލަﷲ ޢަލައިހި ވަސައްލަމަގެ އަރިއަހަށް ވަޑައިގަތުމުން، އެހައިމަދު ކަދުރުކޮޅެއް ﷲ ތަޢާލާ ބޭނުންފުޅުވެވޮޑިގެންނުވާކަމަށް ބުނެ ބައަކު އެޞަޙާބީއަށް މަލާމާތްކުރިއެވެ.
އެކަމަށް ކީރިތި ޤުރްއާންގައި ﷲ ތަޢާލާ ވަޙީބަސްފުޅު ބާވައިލެއްވެވިއެވެ. އެޞަޙާބީއަށް މަލާމާތާ ފުރައްސާރަކުރި މީހުންނަށް އެކަން ބައްދަލުކުރާނެ ދުވަސް އަންނާނެކަމުގައި ވަނީ ވަޙިކުރައްވަވައިފައެވެ.
މީސްތަކުންނޭވެ! މީހެއްގެ ގާތުގައި އެހީއަކަށް އެދުމުން އެމީހެއްގެ ފެންވަރުން ދެވުނީ ކިތަންމެ ކުޑަމިންވަރެއް ނަމަވެސް ނަފްރަތު ނުކޮށް ﷲ ތަޢާލާއަށް ޙަމްދުކުރަންވީ އަދި އެމީހަކަށް ހެޔޮދުޢާކުރަންވީވެސް މިހެންވެގެންނެވެ. ހެޔޮނިޔަތުގައި އެމީހެއްގެ ފެންވަރުން އެމީހަކު ދޭ ކިތަންމެ ކުޑަމިންވަރަކީވެސް ﷲ ތަޢާލާގެ ޙަޟްރަތުގައި ވަރަށް ބޮޑު އެއްޗަކަށްވެގެންދާތީއެވެ.
ކުޑަކުޑަ މިންވަރަކުން ޞަދަޤާތްކުރުމުން މިކަންކަމަށް ވިސްނާނުލައި ނުރުހި ކުނިމޫނުދައްކައި އަދި ނުބައި ބަސްތައް ބުނަން ހެޔޮނުވާނެކަން ފުރަތަމަ މިބަޔާންކުރީއެވެ! އެމީހަކަށް ﷲ ތަޢާލާގެ ޙަޟްރަތުން ކުރިމަތިވާނެ ޙާލަތުވެސް މިބަޔާންކުރީއެވެ.
- މުފްތީ މެންކުގެ ދަރުސަކުން
