މިވާހަކަ އެގޮތްގޮތަށް ދައްކަން މިޖެހެނީ މެދުނުކެނޑި އެންމެ ގިނައިން ލިބޭ އެއް ޝަކުވާއަކީ ދުޢާކުރީމާވެސް ޙަޔާތުގެ ބައިވެރިއަކަށް ތިމާ ބޭނުންވި މީހާ ނުލިބުނު ކަމުގެ ޝަކުވާކަމަށްވާތީއެވެ. ވިސްނާށެވެ! ތިބާގެ ބައިވެރިއަކަށް ތިބާއަށް އޭނާ ދެއްވަވައިފިނަމަ ތިބާއާއިމެދު އޭނާ ކަންކަންކުރާނެ ގޮތް ތިބާއަކަށް ނުއެނގޭނެއެވެ. އެކަމަކު ﷲ ތަޢާލާ ދެނެވޮޑިގެންވެއެވެ.
ތިބާއަކީ ﷲ ތަޢާލާގެ ރުހިވޮޑިގަތުން ލިބިގެންވާއަޅަކުނަމަ ލައްވަވާނެ ހެޔޮ ރަޙްމަތުގެ ތެރޭގައި ހެޔޮލަފާ އަދި ތިބާއަށް ރަނގަޅު ގޮތުގައި ކަންކަން ކުރާނެ ބައިވެރިއަކުވެސް ހިމެނެއެވެ. ވީމާ އެފަދަ މީހުންނަށް ދެއްވަވާނީ އޭނާގެ ހިތަށް އުފާވެރިކަމާ ހަމަޖެހުން ގެނެސްދޭނެ ބައިވެރިއެކެވެ. އިން ޝާ ﷲ.
މިގޮތަށްވެސް ވިސްނައިލާށެވެ! މައިންބަފައިން އެންމެ ލޯބިވާ ދަރިފުޅަށް އެންމެ ރަނގަޅު ބައިވެރިއަކު ލިބުމަށް މައިންބަފައިން ނުއެދޭހެއްޔެވެ؟ އެންމެ ރަނގަޅު ބައިވެރިއަކު ހޯދައިދޭން މަސައްކަތް ނުކުރެހެއްޔެވެ؟ އަހުރެމެންގެ މައިންބަފައިން އަހުރެމެންދެކެ ލޯބިވާ ވަރުގެ އެތައް ގުނައެއް އިތުރަށް ﷲ ތަޢާލާ އަހުރެމެން ދެކެ ލޯބިވެވޮޑިގެންވެއެވެ. ދެން އަޑުއަހާށެވެ!
އަހުރެމެންނަށް ބޭނުންވާ ކަންކަން ވަރަށް ގިނަވާނެއެވެ. އެއިގެ ތެރެއިން ޙާޞިލްކުރެވޭނީ މަދުކަމެކެވެ. އެއިގެ މާނައަކީ އެމީހަކު ދެކެ ﷲ ތަޢާލާ ލޯބިވެވބޮޑިނުގަތުމެއް ނޫނެވެ. އެކަން އަބަދުވެސް ޔަޤީންކުރަންވާނެއެވެ.
އަހަރެމެން އެންމެ ބޮޑަށް ކަންބޮޑުވާ އެއްކަމަކީ ތިމާ ބޭނުންވާ ގޮތަށް ކަންކަން ނުފުދުމެވެ. ބޭނުންވާ މީހާ އާއި ކައިވެނި ނުކުރެވުން، ބޭނުންވާ ވަޒީފާ ނުލިބުން، ބޭނުންވާ ގެ، ކާރު ފަދަ ތަކެތި ނުލިބުން ފަދަ ކަންކަމެވެ.
ތިބާ ހެޔޮ ޢަމަލުކުރެއެވެ. ދުޢާވެސް ކުރެއެވެ. ނަމަވެސް ބޭނުންވާ ގޮތަށް ކަންކަން ޙާޞިލުނުވަނީއެވެ. ޔަޤީންކުރަންވީ އެކަންކަން ޙާޞިލުނުވަނީ ނުވުމުން ކުރާނެ ފައިދާ މާބޮޑުވާނެތީ ކަމެވެ.
ވިސްނާށެވެ! ﷲ ތަޢާލާ އެމީހަކަށް ދެއްވަވަން ކަނޑައަޅުއްވަވާފައިވާ ރިޒުޤާއި އެހެނިހެން ކަންކަން ނުލިބޭ ހިންޏެއްވެސް ނުވެއެވެ. އަހަރެމެން އެންމެ ރުޅި އަންނަ މަދިރިއަށް އަހަރެމެންގެ ގައިން ލޭ ބޮވެނީ ﷲ ތަޢާލާ އެކަން ކަނޑައަޅުއްވަވާފައިވާތީއެވެ. މިއީ އެއްވެސް ޝައްކެއް އޮތްކަމެއް ނޫނެވެ.
ވީމާ އަހަރެމެންނަށް އޮތީ ދެއްވަވާ މިންވަރަށް ޝުކުރުވެރިވުމެވެ. މީހަކު ތިމާއަށް ގެއްލުމެއް ދިންނަމަވެސް އެކަން މެދުވެރިވީ އެކަން މެދުވެރިވުމަށް ﷲ ތަޢާލާ މިންވަރުކުރައްވަވާފައިވާތީ ކަމަށް ޤަބޫލުކޮށް އެމީހަކަށް ޙަސަދަނުލާށެވެ! އެމީހާ ކުރި ނުބައި ކަންތަކަށް އެމީހާއަށް ޖަޒާދެއްވަވާނެކަން ޔަޤީންކޮށް ތިބާ އެމީހާއަށް މާފުކުރާށެވެ!
ބޭނުންވާ ބައިވެރިޔާ ނުލިބުމުންވެސް ޔަޤީންކުރަންވީ އެކަން އެގޮތަށް މެދުވެރިވާނީ ﷲ ތަޢާލާ އެކަން އެގޮތަށް މިންވަރުކުރައްވަވާފައިވާތީ ކަމެވެ. ބޭނުންވާ ވަޒީފާ ނުލިބުނު ނަމަވެސް އެހެންކަމެއް ޙާޞިލުނުކުރެވުނު ނަމަވެސް ހަމަ މިމޭރުމުން ޤަބޫލުކުރާށެވެ! ޔަޤީންކުރަންވީ:
1 ތިބާ އެދުނު ގޮތަށް ހިންމަވައި ނުދެއްވެވި ނަމަވެސް ތިބާއަށް ބޭނުންވާނެ މިންވަރަށް ފުއްދަވައި ދެއްވަވާނެކަން،
2 ބޭނުންވި ބައިވެރިޔާ ނުދެއްވެވި ނަމަވެސް އެކަލާނގެ ރުހިވޮޑިގަންނަވާ ބައިވެރިޔާ ދެއްވަވާނެކަމާއި އަދި
3 ތިމާއަށް އެއްވެސް ގެއްލުމެއް ދިނުމުގެ ބާރު އެއްވެސް މީހަކަށް ލިބިގެން ނުވާނެކަމެވެ.
އިތުރަށް ޔަޤީންކުރަންވީ ތިބާ ބޭނުންވި ގޮތަށް އެކަމެއް ނުފުދުނީ އެއަށްވުރެ މާފުރިހަމަ ގޮތެއް ﷲ ތަޢާލާ މިންވަރުކުރައްވަވާނެތީ ކަމެވެ. މިބުނި މަގުން ކަންކަން ޔަޤީންކޮށްގެން ހުންނަ މީހާ އަބަދުވެސް ހުންނާނީ އުފާވެރިކަމުގައެވެ. އުފާކުރަން ޖެހޭ ސަބަބަކީ ތިމާއެދުނު ގޮތަށް ކަމެއް ފުއްދަވައި ނުދެއްވެވުމަކީ އެމީހަކު ދެކެ ﷲ ތަޢާލާ ލޯބިވެވޮޑިގަންނަވާ ކަމުގެ ޢަލާމާތަކަށްވާތީއެވެ!
--މުފްތީ މެންކުގެ ދަރުސަކުން
