ޢާއިޝަތު ރަފާޙް ޢަލީ
ކޮންމެ މީހަކުވެސް ދުނިޔެއިންވެސް ކަންތައްތަކަކަށް ބޭނުންވާނެއެވެ. އެއިގެ ތެރޭގައި މުދަލާއި ދަރިންވެސް ހިމެނެއެވެ. އޮތީ ލިބިއްޖެނަމަ އުފާކޮށް ޝުކުރުވެރިވުމާއި ނުލިބިއްޖެނަމަވެސް ކަންބޮޑު ނުވުމެވެ.
މިހެން ބުނަންޖެހެނީ ޤިޔާމަތް ދުވަހުން ތިބާގެ މުލާއި އަދި ދަރީންގެ ސަބަބުން ފައިދާ ނުކުރާނެކަން ވަޙީބަސްފުޅުން އެނގެން އޮތުމުންނެވެ. ޤިޔާމަތް ދުވަހު ފައިދާ ނުކުރާނެ ކަމެއް ޙާޞިލުނުވެގެން ކަންބޮޑުވާން ނުޖެހޭނެތީއެވެ.
ﷲ ތަޢާލާ މުމްތަޙިނާ ސޫރަތުގެ 3 ވަނަ އާޔަތުގައި ވަޙީ ކުރައްވާފައިވެއެވެ.
لَن تَنفَعَكُمْ أَرْحَامُكُمْ وَلَا أَوْلَادُكُمْ ۚ يَوْمَ الْقِيَامَةِ يَفْصِلُ بَيْنَكُمْ ۚ وَاللَّهُ بِمَا تَعْمَلُونَ بَصِيرٌ ﴿٣﴾
މާނައީ: "ތިޔަބައިމީހުންގެ ގާތްތިމާގެ މީހުންނާއި، ތިޔަބައިމީހުންގެ ދަރިން، قيامة ދުވަހުން ތިޔަބައިމީހުންނަކަށް މަންފާއެއް ނުކޮށްދޭނެތެވެ. ތިޔަބައިމީހުންގެ މެދުގައި އެކަލާނގެ (އެދުވަހުން) ނިޔާކުރައްވާނެތެވެ. اللَّه އީ، ތިޔަބައިމީހުންކުރާ ކަންތައް މޮޅަށް ބައްލަވާވޮޑިގެންވާ ރަސްކަލާނގެއެވެ. (3)"
- ނަބިއްޔުންގެ އަޚްލާޤުން ނަމޫނާ ލިބިގަތުން :
ﷲ ތަޢާލާ މުމްތަޙިނާ ސޫރަތުގެ 6 ވަނަ އާޔަތުގައި ވަޙީ ކުރައްވާފައިވެއެވެ.
لَقَدْ كَانَ لَكُمْ فِيهِمْ أُسْوَةٌ حَسَنَةٌ لِّمَن كَانَ يَرْجُو اللَّهَ وَالْيَوْمَ الْآخِرَ ۚ وَمَن يَتَوَلَّ فَإِنَّ اللَّهَ هُوَ الْغَنِيُّ الْحَمِيدُ ﴿٦﴾
މާނައި: "އެބޭކަލުންގައި ތިޔަބައިމީހުންނަށް ރިވެތި ނަމޫނާއެއް ވާކަން ކަށަވަރެވެ. اللَّه އާއި، آخرة ދުވަސް އެދޭކަމުގައިވީ މީހަކަށެވެ. އަދި ފުރަގަސްދީ އެނބުރިގަންނަ މީހާ (ދަންނާށެވެ!) ފަހެ، ހަމަކަށަވަރުން، اللَّه އީ، ފުދިވޮޑިގެންވާ، حمد ލިބިވޮޑިގެންވާ ރަސްކަލާނގެއެވެ. (6)"
- ކާފަރުންނާ މެދުގައި ޢަދުލުވެރިކޮށް ކަންތައް ކުރުން:
ﷲ ތަޢާލާ މުމްތަޙިނާ ސޫރަތުގެ 8 ވަނަ އާޔަތުގައި ވަޙީ ކުރައްވާފައިވެއެވެ.
لَّا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَن تَبَرُّوهُمْ وَتُقْسِطُوا إِلَيْهِمْ ۚ إِنَّ اللَّهَ يُحِبُّ الْمُقْسِطِينَ ﴿٨﴾
މާނައި: "ތިޔަބައިމީހުންގެ دين އާހުރެ، ތިޔަބައިމީހުންނާ ހަނގުރާމަނުކުރާ، އަދި ތިޔަބައިމީހުންގެ ގޮވަތި ގެދޮރުން ތިޔަބައިމީހުން ބޭރުކޮށްނުލާ މީހުންނަށް ތިޔަބައިމީހުން ހެޔޮކޮށްހިތައި، އަދި އެއުރެންނަށް عدل ވެރިގޮތުގައި ކަންތައް ކުރުން، اللَّه ތިޔަބައިމީހުންނަކަށް މަނައެއް ނުކުރައްވަތެވެ. ހަމަކަށަވަރުން، عدل ވެރިންދެކެ اللَّه ލޯބިވެވޮޑިގެންވެތެވެ. (8)"
