ޢާއިޝަތު ރަފާޙް ޢަލީ
ﷲ ސުބުޙާނަހޫ ވަތަޢާލާއާ އަޅާގެ ހިތާ އޮންނަ ގުޅުން އެންމެ ބޮޑަށް ވަރުގަދަކޮށްދޭ ދެ ކަމެއްގެ ވާހަކަ ޝައިޚް ވަނީ ފާހަގަކުރައްވާފައެވެ. މި ދެ ކަމަކީ އަޅުގަނޑުމެން ކޮންމެހެން ސަމާލުކަން ދޭންޖެހޭ ދެ ކަމެވެ.
ފުރަތަމަ ކަމަކީ ދުޢާކުރުމެވެ. އަޅަކު ﷲ އަށް ދުޢާކުރާ ހިނދު، އެކަމުން އެނގެނީ އޭނާގެ ހިތް އެކަލާނގެއާ ގުޅިފައިވާ މިންވަރެވެ. އެހެނީ، ތިބާ ދުޢާކުރާ ހިނދު އެ ދުޢާގެ އަޑު އެކަލާނގެ ފިޔަވައި އެހެން އެއްވެސް ފަރާތަކަށް ނީވޭނެއެވެ. އަދި އެކަލާނގެ ފިޔަވައި އެހެން ފަރާތަކަށް އެކަމެއް ނުވެސް އެނގޭނެއެވެ. ޚާއްޞަކޮށް، ސަޖިދައިގައި އޮންނަ ހިނދު ނުވަތަ ރޭގަނޑުގެ ފަހުބައިގެ އަނދިރިކަމުގެ ތެރޭގައި، ދުނިޔޭގެ އެންމެހައި ވަސީލަތްތަކާއި މީސްތަކުންގެ ކިބައިން އުއްމީދު ކެނޑި، ހަމައެކަނި އެކަލާނގެއާ ގުޅުން ގާއިމުކުރާ ހިނދު، އެމީހެއްގެ އީމާންތެރިކަން އެންމެ ބޮޑަށް ވަރުގަދަވެގެންދެއެވެ.
ކީރިތި ރަސޫލާ ﷺ ޙަދީޘްކުރައްވާފައިވާ ފަދައިން، "ދުޢާއަކީ އަޅުކަމެވެ." މިއީ އަޅާ އާއި އޭނާގެ ރައްބާ ދެމެދު އޮންނަ ގުޅުން އެންމެ ބޮޑަށް ވަރުގަދަކޮށްދޭ ކަންތަކެވެ. އެހެންކަމުން، ކޮންމެ ބޭނުމަކަށް އެދިވެސް ހަމައެކަނި އެކަލާނގެ حضرة އަށް ދަންނަވާށެވެ. ކޮންމެ ބޭނުމެއް އޮތް ކަމުގައިވިޔަސް، ކުރިމަގުގެ އުއްމީދަކަށް ވިޔަސް، ބިރުގަންނަ ކަމަކުން ސަލާމަތްވުމަށް ވިޔަސް، ނުވަތަ ކަމަކާ މެދު ގޮތެއް ނިންމަން ދަތިވެފައިވާ ހިނދުގައި ވެސް ﷲ އަށް ދުޢާކުރާށެވެ.
ޢުމަރުގެފާނު ވިދާޅުވެފައިވެއެވެ. "ތިމަންކަލޭގެފާނު ކަންބޮޑުވަނީ ދުޢާ އިޖާބަވުމާ މެދުގައެއް ނޫނެވެ. ނަމަވެސް ތިމަންކަލޭގެފާނު ކަންބޮޑުވަނީ ދުޢާކުރުމުގެ ތައުފީޤު ލިބުމާ މެދުގައެވެ." އެހެނީ ކޮންމެ ކޮންމެ މީހަކަށް ދުޢާކުރުމުގެ ފުރުޞަތެއް ނުލިބެއެވެ. ބައެއް ޞާލިޙު ބޭކަލުން ވިދާޅުވާ ގޮތުގައި، ބައެއް ފަހަރު ކަމަކަށް އެދި ދުޢާކުރަމުން ދާއިރު، އެކަމެއްގެ ސަބަބުން ހިތަށް ލިބޭ މަޑުމޮޅިކަމާއި، ﷲ އާ ކުއްތަންވެވޭ ކަމުގެ އިޙްސާސުން ލިބޭ އުފާވެރިކަން، އެ އެދޭ ކަމަށްވުރެ މާ ބޮޑެވެ. އިޚްލާޞްތެރިކަމާއެކު، ހިތްތިރިކޮށް، ﷲ އަށް ދަންނަވާ ހިނދު ލިބޭ ރޫޙާނީ ހިތްހަމަޖެހުމަކީ ތިބާ އެދޭ ކަމަށްވުރެ މާ މަތިވެރި ނިޢުމަތަކަށް ވެދާނެއެވެ.
- ޝައިޚް ޢަބްދުއްސަލާމް އައްޝުވައިޢިރުގެ ދަރުސަކުން
