ވެސްޓަރން ރީޖަން ޓީ ޓްވެންޓީ ކްރިކެޓް މުބާރާތުގެ ތިންވަނަ މެޗުންވެސް ރާއްޖެ ބަލިވެއްޖެއެވެ.
އޭޝިއަން ކްރިކެޓް ކައުންސިލުން އިންތިޒާމުކޮށްގެން އޮމާނުގައި ބާއްވާ މި މުބާރާތުގެ 3 ވަނަ މެޗުގައި ސައުދީ އަރަބިއްޔާ އާބައްދަލުކޮށް މިއަދު ކުޅުނު މެޗުން މެޗުން ސައުދީ މޮޅުވީ 6 ވިކެޓުންނެވެ.
މި މެޗުގެ ޓޮސް ދިމާވުމުން ރާއްޖޭގެ ޓީމު ކުޅެންއަރާ 20 އޯވަރު ހަމަވިއިރު، 7 ކުޅުންތެރިން ނުބައިވެގެން ހެދުނީ 139 ލަނޑެވެ. ރާއްޖޭގެ ޓީމުން އެންމެ ރަނގަޅަށް ކުޅުނީ 67 ލަނޑު ހެދި ރިޝްވާން މުހައްމަދެވެ.
ޖަވާބުގައި ސައުދީ ކުޅެންއަރާ 17 ވަނަ އޯވަރުގެ ތެރޭގައި 4 ކުޅުންތެރިން ނުބައިވެގެން 140 ލަނޑު ވަނީ ހަދާފައެވެ.
މި މުބާރާތުގައި ރާއްޖޭގެ ޓީމު މިހާތަނަށް ކުޅުނު ތިން މެޗުންވެސް ބަލިވެފައިވާ އިރު، ފުރަތަމަ މެޗު ކުވެއިތު އަތުން ބަލިވީ 8 ވިކެޓުންނެވެ. އަދި ދެވަނަ މެޗުން ބަހްރެއިން އަތުން ބަލިވީ 2 ވިކެޓުންނެވެ.
މުބާރާތުގެ ފަހު މެޗުގައި މާދަމާ ރާއްޖެ ނުކުންނާނީ ގަތަރާ ދެކޮޅަށެވެ.
މިއަހަރުގެ މުބާރާތުގައި 5 ޤައުމު ވާދަކުރާއިރު ފައިނަލުގައި ބައްދަލުކުރާނީ އެންމެ ރަނގަޅު ނަތީޖާ ހޯދާ ދެ ޤައުމެވެ.
