ކޮންމެ ނަމާދެއްވެސް އެންމެ މޮޅު އިތުރުވެގެންވަނީ ވަގުތު ޖެހުމުން ވަގުތުން ކުރުމެވެ. އެހެންކަމާއިއެކުވެސް ފަތިސްނަމާދާއި ޢަޞްރުނަމާދު ކުރުމަށް ވަގުތު ޖެހުމުން އަވަސްވެގަންނަން ޖެހޭ ވަރަށް މުހިންމު ސަބަބެއް ވެއެވެ.
އެއީ ފަތިސްނަމާދާއި ޢަޞްރުނަމާދުގެ ވަގުތަކީ މަލާއިކަތުން ޝިފްޓް ބަދަލުކުރައްވަވާ ވަގުތެވެ. ފަތިސްނަމާދުގެ ވަގުތަކީ ރޭގަނޑު ޝިފްޓްގައި ތިބާ އާއިއެކު ތިއްބެވި މަލާއިކަތުން ޝިފްޓް ނިންމަވައި ﷲ ތަޢާލާގެ ޙަޟްރަތަށް އެނބުރިވަޑައިގަންންވާ ވަގުތެވެ! އަދި ދުވާލުގެ މަލާއިކަތުން ތިބާ އާއި ބައްދަލުކުރައްވަވާ ވަގުތެވެ! ހަމައެފަދައިން ޢަޞްރުނަމާދުގެ ވަގުތަކީ ދުވާލުގެ މަލާއިކަތުން ތިބާ ދޫކުރައްވަވައި ﷲ ތަޢާލާގެ ޙަޟްރަތަށް އެނބުރި ވަޑައިގަންނަވާ ވަގުތެވެ. ރޭގަނޑުގެ މަލާއިކަތުން ތިބާ ގާތަށް ވަޑައިގަންނަވާ ވަގުތެވެ!
އެހެންކަމުން ފަތިސްނަމާދުގެ ވަގުތަށް ވިސްނާށެވެ! ޝިފްޓް ބަދަލުވީ ތިބާ ނަމާދަށް ހުއްޓައި ކަމުގައިވާނަމަ ޝިފްޓް ނިންމެވި މަލާއިކަތުންގެ ފަތުގައި އެބޭކަލުން ތިބާ ދޫކުރެއްވެވީ ފަތިސް ނަމާދަށް ހުއްޓައި ކަމުގައި ލިޔުއްވަވާނެތެވެ! ﷲ ތަޢާލާގެ ޙަޟްރަތުގައިވެސް ހަމަ އެގޮތަށް ދަންނަވާނެތެވެ! ހަމަ އެއާއިއެކު ދުވާލުގެ ޝިފްޓަށް ވަޑައިގެންނެވި މަލާއިކަތުން ލިޔުއްވަވަން ފަށްޓަވާނީ ތިބާ ފަތިސް ނަމާދަށް ހުރި ވާހަކައިންނެވެ. ޝިފްޓް ނިންމަވާފައި އެނބުރިވަޑައިގެން ﷲ ތަޢާލާގެ ޙަޟްރަތުގައި ދަންނަވާނީ ވެސް އެގޮތަށެވެ!
ވީމާ ތިބާ ކުރި ފަތިސް ނަމާދުގެ ވާހަކަ 2 ޝިފްޓްގެ މަލާއިކަތުންވެސް ލިޔުއްވަވާނެތެވެ! އަދި 2 ޝިފްޓްގެ މަލާއިކަތުންވެސް ﷲ ތަޢާލާގެ ޙަޟްރަތުގައި ދަންނަވާނެތެވެ! ޢަޞްރު ނަމާދުގައިވެސް ކަންކަން ވާނީ ހަމަ އެގޮތަށެވެ! ކޮންފަދަ މަތިވެރި ނިޢްމަތެއް ހެއްޔެވެ؟ އެ މަތިވެރި ނިޢްމަތް އެދޭނަމަ ވަގުތުވުމުން ގޭގައި ކުރި ނަމަވެސް ނަމާދަށް އަވަސްވެގަންނާށެވެ! މިހިރީ ލިބެން އޮތް އެންމެ އަގުހުރި ފުރުޞަތެވެ! ހީވާގިވެ އެ ފުރުޞަތު ދޫކޮށްނުލާށެވެ! މިސްކިތުގެ ޖަމާއަތަށް ނުދެވޭތީ މިފަދަ އަގުހުރި ފުރުޞަތުތައް ދޫކޮށްލަން ހެޔޮނުވާނެއެވެ!
- ވައްހާޖް ޠަރިންގެ ދަރުސަކުން
