ކޮންމެ މީހަކު ވެސް އެންމެ އުފާވާނީ އަދި އެންމެ ބޭނުންވާނެ އެއްކަމަކީ އެމީހަކުކުރާ ހެޔޮ އަމަލުތައް، ކުރާ އަޅުކަން ﷲ ތަޢާލާ ޤަބޫލުފުޅު ކުރައްވަވާކަން އެނގުމެވެ. ނަމަވެސް އެއި މިދުނިޔޭގައި ޙާޞިލުކުރެވެން އޮތް ކަމެއް ނޫނެވެ!
އެކަން އެނގުން ވަނީ ޤިޔާމަތް ދުވަހުގައެވެ! އެއިގެ ކުރިންނަމަ މަރުވުމުގެ ވަގުތުގައެވެ. އެހެނީ އެމީހެއްގެ ޢަމަލުތައް ﷲ ތަޢާލާ ޤަބޫލުފުޅު ކުރައްވަވާފައިވާ ޞާލިޙް އަޅުންގެ ފުރާނަ ހިއްޕަވާނީ ރަޙްމަތުގެ މަލާއިކަތުންނެވެ! އޭނާގެ ހަށިގަނޑުން ފުރާނަ ނެރުއްވަވާނީ ނުހަނު އޯގާތެރިކަމާއިއެކުގައެވެ. އެމީހާއަށް ބިރެއް ނެތްކަމުގެ އުފާވެރި ޚަބަރުވެސް އެމީހަކަށް މަލާއިކަތުން ދެއްވަވާނެތެވެ! އެކަން އެމީހާއަށް އެނގޭނެއެވެ!
ކީތިތި ޤުރްއާނުގައި ﷲ ތަޢާލާ ވަޙީކުރައްވަވާފައިވެއެވެ!
"ތެދުމަގު ލިބިގެންފި މީހުންނަށް ﷲ ތެދުމަގު ދެއްކެވުން އިތުރުކުރައްވަވަތެވެ. އަދި ކަލޭގެފާނުގެ ވެރިރަސްކަލާނގެ ޙަޟްރަތުގައި، ޘަވާބު ލިބުމުގެގޮތުން އެންމެ ހެޔޮވެގެންވަނީ، އަދި ނަތީޖާގެގޮތުން އެންމެ ހެޔޮވެގެންވަނީ، ދެމިހުންނަނިވި ޞޯލިޙް ޢަމަލު ތަކެވެ." (މަރްޔަމް: 76)
މިއާޔަތުން އެނގިގެން މިދަނީ އެމީހާ ކުރާ މަސައްކަތުން އެމީހަކަށް ﷲ ތަޢާލާގެ ރުހިވޮޑިގަތުން ލިބިގެންފި މީހާ، އީމާންކަމުގައި އިތުރަށް ސާބިތުވަމުންދާނެއެވެ! އަޅުކަންކުރުން ގިނަކުރާނެ ކަމެވެ! ﷲ ތަޢާލާއަށް ބިރުވެތިވުން އިތުރުވަމުންދާނެ ކަމެވެ! އެހެނީ "ތެދުމަގު ލިބިގެންފި މީހުންނަށް ﷲ ތެދުމަގު ދެއްކެވުން އިތުރުކުރައްވަވަތެވެ."
މިއާޔަތުން އެނގެމުން މިދަނީ އީމާންކަން ކުޑަވުމާއި އަޅުކަން ކުރުމުގައި ފަރުވާކުޑަކުރެވުމާއި ﷲ ތަޢާލާއަށް ބިރުވެތިވުން ކުޑަވުމާއި ތަޤްވާވެރިކަން ކުޑަ ނަމަ އެކަންކަމުން އެނގެނީ އެމީހަކު އެވަނީ ތެދު މަގު ލިބިގަންނަން އިތުރަށް މަސައްކަތްކުރަންޖެހިފައިވާ މީޙުންގެ ތެރެއިން ކަމެވެ!
ލޮބުވެތި އަޚުންނާއި އުޚުތުންނޭވެ! ތިމާއަކީ ތެދުމަގު ލިބިގެންހުރި، ﷲ ތަޢާލާގެ ރުހިވޮޑިގަތުން ލިބިގެން ހުރި މީހެއް ކަމަށް ބަލައި ފަރުވާކުޑަނުކުރާށެވެ! ތިމާގެ ޙާލަތު އަމިއްލައަށް އިމްތިޙާންކުރާށެވެ! އަމިއްލައަށް މިނެކިރާށެވެ! އިޞްލާޙްކުރަން ޖެހޭ ކަންކަން އިޞްލާޙްކުރަމުން ގެންދާށެވެ! ﷲ ތަޢާލާ ރުހިވޮޑިގަންނަވާ އަޅަކަށް ވުމުގެ ފުރުޞަތަކީ ހަމަ ކޮންމެ މީހަކަށްވެސް ލިބިގެންވާ ފުރުޞަތެކެވެ! ފުރުބަތު ހޯދުން އޮތީ އެމީހެއްގެ އަތްމަތީގައެވެ. އެއީ އެމީހަކު ކުރަންޖެހޭ ކަމެކެވެ!
- އިސްލާމީ ތިލަފަތުގެ ދަރުސަކުން
