އެމީހެއްގެ ކިބައިގައި އިސްލާމްދީނަށް ލޯބިކޮށް މާތް ﷲ އަށް ބިރުވެތިވުން ހުރި މިންވަރަކުން މެނުވީ އެއްވެސް މީހަކަށް އެއްވެސް މަތިވެރިކަމެއް ނެތެވެ! މީސްތަކުންގެ ރުހުމާއި ތާއީދު ހޯދަން ކިތަންމެ ގިނަ ކަންތައްތަކެއް ކުރިނަމަވެސް އެމީހެއްގެ ކިބައިގައި ތަޤްވާވެރިކަން ނެތް ނަމަ އެމީހާއަކީ ﷲ ތަޢާލާގެ ޙަޟްރަތުގައި އެއްވެސް މަތިވެރިކަމެއް ހުރި މީހެއް ނޫނެވެ" މިކަންކަން ބަޔާންކޮށް މިއަދުގެ ހުކުރު ޚުޠުބާގައި ބަޔާންކޮށްފައި ވެއެވެ!
ޚުޠުބާއިން:
ﷲ ތަޢާލާގެ ޙަޟްރަތުގައި މާތްކަމާއި، ޢިއްޒަތާއި، ޤަދަރުގެ ނާރެހަކީ ތަޤްވާއެވެ. ޝަރަފާއި ޢިއްޒަތް ޙާޞިލްވުމުގައި ކަޅެއް ދޮނެއް، ޢަރަތްބެއް، ޢަޖަމީއެއް ފަރަޤުކުރުމެއް ނުވެއެވެ.
ކީރިތި ރަސޫލާ صلى الله عليه وسلم ޙަދީޘްކުރެއްވިއެވެ. (أَلَا لَا فَضْلَ لِعَرَبِيٍّ عَلَى أَعْجَمِيٍّ ، وَلَا لِعَجَمِيٍّ عَلَى عَرَبِيٍّ ، وَلَا لِأَحْمَرَ عَلَى أَسْوَدَ ، وَلَا أَسْوَدَ عَلَى أَحْمَرَ إِلَّا بِالتَّقْوَى) މާނައީ: "ދަންނާށެވެ! ޢަރަތްބަކަށް ޢަޖަމީއެއްގެ މައްޗަށް (އެބަހީ: ޢަރަބި ނޫން މީހެއްގެ މައްޗަށް) މޮޅުކަމެއް، އަދި ޢަޖަމީއަކަށް ޢަރަތްބެއްގެ މައްޗަށް މޮޅުކަމެއް ނުވެއެވެ. ދޮންމީހަކަށް ކަޅުމީހެއްގެ މައްޗަށް މޮޅުކަމެއް ނުވެއެވެ. އަދި ކަޅު މީހަކަށް ދޮން މީހެއްގެ މައްޗަށް ވެސް މޮޅުކަމެއް ލިބިގެންނެއް ނުމެ ވޭމެއެވެ. ތަޤްވާވެރިކަމުން މެނުވީއެވެ."
ކީރިތިވަންތަ ﷲ ވަޙީކުރެއްވިއެވެ. (إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ) މާނައީ: "ހަމަކަށަވަރުން، اللَّه ގެ حضرة ގައި ތިޔަބައިމީހުންކުރެ އެންމެ މާތްކަންބޮޑީ، ތިޔަބައިމީހުންކުރެ އެންމެ تقوى ވެރި މީހާއެވެ. ހަމަކަށަވަރުން، اللَّه އީ، މޮޅަށް ދެނެވޮޑިގެންވާ، خبير ވަންތަ ރަސްކަލާނގެއެވެ."
- މިއަދުގެ ހުކުރު ޚުޠުބާއިން
