ޢާއިޝަތު ރަފާޙް ޢަލީ
ދަތިޙާލެއްގަ ހުރި މީހަކަށް ނިޞްބަތްކޮށް ތަނަވަސްކަންހުރި މީހަކު އުފާކުރާށެވެ. ބުނެފިނަމަ ހިތްހަމަޖެހުން ލިބެއެވެ. އެއީ އޭނާ އެހީތެރިވެދޭނެކަމުގެ އުންމީދުގައެވެ. ނަމަވެސް އެމީހަކަށް އުފާވެރިކަން ހުރިކަމަށް ﷲ ތަޢާލާ އަންގަވާފައި އޮތްއޮތުމުން ހިތްހަމަޖެހުން ލިބޭކަމަކަށް ނުވެއެވެ. އެކަމުން އެނގެނީ އެމީހަކު ﷲ ތަޢާލާއަށް އިތުބާރުނުކުރާކަމެވެ. ވީމާ ފުރަތަމަ ކަމަކަށް އޮތީ ﷲ ތަޢާލާއަށް އެންމެ ފުރިހަމަ ގޮތުގައި އިތުބާރުކުރުމެވެ.
ތިރީގައިވާ ލިޔުމުން އެކަން އެނގިލައްވާނެއެވެ. އިން ޝާ ﷲ
ސޫރަތުއް ޝަރްޙް އަކީ މައްކީ ސޫރަތެކެވެ. މި ސޫރަތް ބާވައިލެއްވުނީ ހިޖުރައިގެ ކުރިން މައްކާގައެވެ. އަދި ޟުޙާ ސޫރަތުގެ ފަހުންނެވެ.
މި ސޫރަތުގައި 8 އާޔަތް ވެއެވެ. މިސޫރަތައް އިންޝިރާޙް ސޫރަތޭވެސް ކިޔައެވެ.
މި ސޫރަތުގައި ﷲ ތަޢާލާ ބަޔާން ކުރައްވާފައިވާ މައިގަނޑު ބައިތަކަކީ:
· ރަސޫލާ މުޙައްމަދު ޞައްލަ ﷲ ޢަލައިހި ވަސައްލަމް ގެ ދަރަޖަފުޅު، ﷲ ތަޢާލާގެ ޙަޟްރަތުގައި މަތިވެރިވެގެން ވާނެކަން
· ﷲ ތަޢާލާ ރަސޫލާ ޞައްލަ ﷲ ޢަލައިހި ވަސައްލަމް އަށް ދެއްވި ނިޢުމަތްތައް
· ﷲ ތަޢާލާ ރަސޫލާ ޞައްލަ ﷲ އަލައިހި ވަސައްލަމަ އަށް ދެއްވި ނިޢުމަތްތަކުގެ ތެރޭގައި އީމާންކަމުން ހިތްޕުޅު ފުރުއްވެވުމާއި، ޢިލްމާއި ޙިކްމަތުން ހިއްޕުޅު އުޖާލާކުރެއްވެވުމާއި، ކުއްފާފަތަކާއި ހަވާނަފްސުގެ އެދުންތަކުން ޠާހިރުކުރެއްވުން ހިމެނެއެވެ.
ﷲ ތަޢާލާ ޝަރްޙް ސޫރަތުގެ 1 ވަނަ އާޔަތުގައި ވަޙީ ކުރައްވާފައިވެއެވެ.
أَلَمْ نَشْرَحْ لَكَ صَدْرَكَ ﴿١﴾
މާނައީ: ތިމަންރަސްކަލާނގެ، ކަލޭގެފާނުގެ ހިތްޕުޅު ކަލޭގެފާނަށްޓަކައި ތަނަވަސްކޮށް ނުދެއްވަންތޯއެވެ؟ (1)
· މި ނިޢުމަތްތައް ﷲ ތަޢާލާ ރަސޫލާ ޞައްލަ ﷲ ޢަލައިހި ވަސައްލަމަށް ދެއްވީ މައްކާގެ މުޝްރިކުން ކުރި ދުއްތުރާ އާއި އަނިޔާއާއި އަދި އެކަލޭގެފާނުގެ ދަޢުވަތު އެބައިމީހުން ޤަބޫލު ނުކުރުމުން އެކަލޭގެފާނަށް ކުރިމަތިވެވަޑައިގަތް ހިތްދަތި ކަމަށް ހިތްހަމަޖައްސަވާ ދެއްވުމުގެ ގޮތުންނެވެ.
· ރަސޫލާ ޞައްލަ ﷲ ޢަލައިހި ވަސައްލަމް ގެ ނަންފުޅު ދުނިޔެއާއި އާޚިރަތުގައި މަތިވެރި ކުރައްވާ ދަރަޖަ އުފުއްލަވާނެކަން
ﷲ ތަޢާލާ ޝަރްޙް ސޫރަތުގެ 4 ވަނަ އާޔަތުގައި ވަޙީ ކުރައްވާފައިވެއެވެ.
وَرَفَعْنَا لَكَ ذِكْرَكَ ﴿٤﴾
މާނައީ: އަދި ކަލޭގެފާނަށްޓަކައި ތިމަންރަސްކަލާނގެ، ކަލޭގެފާނުގެ ނަންފުޅު މަތިވެރިކުރެއްވީމެވެ. (4)
އެގޮތުން ރަސޫލާ ޞައްލަ ﷲ އަލައިހި ވަސައްލަމް ގެ ނަންފުޅު ޝަހާދަތުގެ ފަހު ދެކަލިމާގައާއި، ބަންގީގައި ހިމަނުއްވުން
· މައްކާގައި މުސްލިމުންނަށް މުޝްރިކުންގެ ފަރާތުން ލިބުނު ދުއްތުރާތަކުގެ ސަބަބުން ދިރިއުޅެން ޖެހުނު ދަތި ޙާލާއި، މުސްލިމުންނަށް ކުރިމަތިވި ކަންތައްތަކުގެ ސަބަބުން ﷲ ތަޢާލާ މި ސޫރަތުގައި ކޮންމެ ދަތިކަމަކާއި ބުރަކަމަކަށްފަހު ލުއެއް އަންނާނެކަން ހަނދުމަކޮށްދެއްވާފައިވޭ
ﷲ ތަޢާލާ ޝަރްޙު ސޫރަތުގެ 5 އަދި 6 ވަނަ އާޔަތުގައި ވަޙީ ކުރައްވާފައިވެއެވެ.
فَإِنَّ مَعَ الْعُسْرِ يُسْرًا ﴿٥﴾ إِنَّ مَعَ الْعُسْرِ يُسْرًا ﴿٦﴾
މާނައީ: ފަހެ، ހަމަކަށަވަރުން، އުނދަގޫކަމާއެކު ފަސޭހަކަންވެއެވެ. (5) ހަމަކަށަވަރުން، އުނދަގޫކަމާއެކު ފަސޭހަކަންވެއެވެ. (6)
ހިތްދަތިކަމާ ތަކްލީފް އުފުލަންޖެހިފައިވާ މީހުންނަށް އޮތް އެންމެ އުފާވެރި ޚަބަރު މިއާޔަތުގައި އެވަނީއެވެ. " ހަމަކަށަވަރުން، އުނދަގޫކަމާއެކު ފަސޭހަކަންވެއެވެ."
