ނުކުޅެދުންތެރިކަން ހުންނަ ފަރާތްތަކަށް މަލާމާތް ރައްދުވާ ގޮތަށް މީސްމީޑިއާގައި ކުރާ ކޮމެންޓުތަކާއި އަމަލުތައް މިނިސްޓްރީ އޮފް ހެލްތުން ހަރުކަށި އިބާރާތުން ކުށްވެރިކޮށްފިއެވެ. ސިއްޙީ ވުޒާރާއިން މިކަން ކުށްވެރިކޮށްފައިވަނީ މިފަދަ އަމަލުތައް މީސްމީޑިއާގެ އެކި މަންސަތަކުގައި އިތުރުވަމުންދާ ދަނޑިވަޅެއްގައެވެ.
އެ ވުޒާރާއިން ފާހަގަކުރި ގޮތުގައި މިފަދަ އަމަލުތަކަކީ ޝާމިލް މުޖުތަމައެއް ބިނާކުރުމަށް އެޅޭ ވަރަށް ބޮޑު ހުރަހެކެވެ. އަދި މީގެ ސަބަބުން ނުކުޅެދުންތެރިކަން ހުންނަ ފަރާތްތަކަށާއި އެފަރާތްތަކުގެ އާއިލާތަކުގެ ނަފްސާނީ ދުޅަހެޔޮކަމަށް ނޭދެވޭ ބޮޑެތި އަސަރުތަކެއް ކުރާނެ ކަމަށްވެސް ސިއްޙީ ވުޒާރާއިން ބަޔާންކޮށްފައިވެއެވެ.
ނުކުޅެދުންތެރިކަން ހުންނަ ފަރާތްތަކަކީ ބައިނަލްއަޤުވާމީ މުޢާހަދާތަކާއި ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ ދަށުން ޚާއްސަ ރައްކާތެރިކަމާއި އިޚްތިރާމް ލިބިގެންވާ ބައެއްކަން އެ ވުޒާރާއިން ހަނދާންކޮށްދީފައިވެއެވެ. އެހެންކަމުން، އެފަރާތްތަކުގެ އިންސާނީ ކަރާމާތަށް އުނިކަން އަންނަ ފަދަ އެއްވެސް އަމަލެއް އެއްވެސް ފަރާތަކުން ނުހިންގުމަށް ވަނީ އިލްތިމާސްކޮށްފައެވެ.
މީގެ އިތުރުން، ނުކުޅެދުންތެރިކަން ހުންނަ މީހުންގެ ހައްޤުތައް ހިމާޔަތްކުރާ ކައުންސިލުންވެސް ވަނީ އެފަރާތްތަކުގެ ކަރާމާތަށް އުނިކަން އަންނަ ފަދަ އަމަލުތައް ތަކުރާރު ނުކުރުމަށް ގޮވާލާފައެވެ. އެ ކައުންސިލުން ބުނީ ކޮންމެ ފަރުދަކީވެސް މުޖުތަމައުގައި އިޚްތިރާމާއެކު އުޅުމުގެ ހައްޤު ލިބިގެންވާ މީހެއް ކަމަށެވެ.
ނުކުޅެދުންތެރިކަން ހުންނަ ފަރާތްތަކުގެ ހައްޤުތައް ކަށަވަރުކުރުމަށް ދައުލަތުން ކުރާ މަސައްކަތުގައި އެންމެހާ ރައްޔިތުން ގުޅިގެން މަސައްކަތް ކުރުމަށް ސިއްޙީ ވުޒާރާއިން ވަނީ ބާރުއަޅާފައެވެ. އަދި މުޖުތަމައުގެ ހޭލުންތެރިކަން އިތުރުކޮށް، އެފަރާތްތަކަށް ބޭނުންވާ އެހީތެރިކަމާއި އެއްބާރުލުން ދިނުމަކީ އެންމެންގެ ޒިންމާއެއް ކަމުގައިވެސް އެ ވުޒާރާއިން ފާހަގަކުރެއެވެ.
