މަޝްހޫރު ވިޔަފާރިވެރިޔާ، ކޮމަންޑޫ ދާއިރާގެ މެންބަރު ޙުސައިން ވަޙީދު ރޭ މެންދަމު ވަނީ ނިޔާވީ ހޮސްޕިޓަލުގައެވެ. ޙުސައިން ވަޙީދު ވަނީ ގިނަ ދުވަސްތަކެއް ވަންދެން ކެންސަރު ބައްޔަށް ފަރުވާ ހޯއްދަވައިފައެވެ.
ޙުސައިން ވަޙީދު މަޖިލީހުގެ މެންބަރުކަން ކުރައްވަމުން ގެންދެވީ ދެވަނަ ފަހަރަށެވެ. މަޖިލިސް މެންބަރުކަމުގައި ހުންނަވައިގެންވެސް އަދި މެންބަރުކަން ނެތްއިރުވެސް ޙުސައިން ވަޙީދަކީ ގިނަ ޢަދަދެއްގެ ފަޤީރުންނަށް ތަފާތު ގޮތްގޮތުން އެހީތެރިވެދެއްވަމުން ގެންދެވި ބޭފުޅެކެވެ.
އެކަމުގެ ނަތީޖާ ދުނިޔޭގައިވެސް ފެނިވަޑައިގެންނެވިއެވެ. ލަކުޑީގެ ވިޔަފާރިއާއި ޢިމާރާތްކުރުމުގެ ވިޔަފަރީގައި ޓިންބާރ ހައުސް "އެފްޑަބްލިޔޫ" އަދި ކާބޯތަކެތީގެ ވިޔަފަރީގައި "ޔުނައިޓެޑް" ވަނީ އެންމެ ކާމިޔާބު ލިސްޓުގެ ކުރީގައެވެ.
ޙުސައިން ވަޙީދު މިއަދުނޫހަށް ވިދާޅުވެފައިވެއެވެ. "ސިޔާސީ ދާއިރާއަށް ވަންނަނީ ކަންކަން އިޞްލާޙްކުރަން ބާތުއަޅަން ބޭނުންވާތީއެވެ. ސިޔާސީ ޙަރަކާތް ހިންގަން ޝައުޤުވެރިކަމެއް ނެތެވެ."
އަދިވެސް ވިދާޅުވިއެވެ. "އެންމެ ބޮޑު ހިތްހަމަޖެހުމެއް ލިބެނީ ހުސެންގެ ފަރާތުން މީހަކަށް އެހީތެރިކަމެއް ފޯރުކޮށްދެވޭ ވަގުތު. އެހީއަށްއެދޭ އެންމެންނަށް އެހީތެރިނުވެވުނަސް ވީވަރަކުން އެހީތެރިކަން ފޯރުކޮށްދެވޭތޯ އަބަދުވެސް ބަލަމެވެ."
މި އަހަރުގެ މާޗް މަހު 30 ވަނަ ދުވަހު މަޖިލީސް ޖަލްސާއެއްގައި ވަނީ ބައިވެރިވެ ،އޭނާގެ ހާލު ބެއްލެވި އެންމެންނަށް ޝުކުރު އަދާކުރައްވައިފަވެއެވެ.
މަރްޙޫމްގެ ފުރާނައަށް ސުވަރުގޭގެ ރަޙްމަތް މިންވަރުކުރައްވަވާށި! ޢާއިލާއަށް ކެތްތެރިކަން މިންވަރުކުރައްވަވާށި! އާމީން
