ބަލަމުންދާ މައްސަލަތަކާ ގުޅޭ 45 ބިދޭސީއަކު ހޯދަން މޯލްޑިވްސް އިމިގްރޭޝަނުން އިއުލާންކޮށްފިއެވެ.
އިމިގްރޭޝަނުން ކުރި އިއުލާނެއްގައި ވަނީ "އެކްސްޕެޓްރިއޭޓް މޮނިޓަރިން އެންޑް ރެޕަޓްރިއޭޝަން ޑިވިޝަން" އަށް ކުރިއަށް އޮތް ހަތް ދުވަހުގެ ތެރޭގައި ހާޒިރުވުމަށް އެ ބިދޭސީންނަށް އަންގާފައެވެ. އެ ފަރާތްތަކަކީ އެ އިދާރާގެ އެކި ސެކްޝަންތަކުން ބަލަމުންދާ މައްސަލަތަކާ ގުޅިގެން ހޯދާ މީހުން ކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަނުން ހޯދަން އިއުލާންކޮށްފައިވާ މީހުންގެ ތެރޭގައި ހިމެނެނީ 8 އަންހެނަކާއި 37 ފިރިހެނެކެވެ. އެމީހުންގެ ވަނަވަރާއެކު އިމިގްރޭޝަނުން އާންމުކުރި މައުލޫމާތުގައި ހިމެނެނީ ބަންގްލަދޭޝްގެ 34 މީހަކާއި އިންޑިއާގެ ތިން މީހަކާއި އަދި ނައިޖީރިއާ ދެ މީހަކާއި ތައިލޭންޑާއި އިޓަލީ، ބްރިޓިޝް، ސްރީ ލަންކާ އާއި ފިލިޕީންސް އާއި އިތިއޯޕިއާގެ މީހެކެވެ.
