ތިބާ މީހަކު ދެކެ ބިރުގަންނަނީއެވެ. ސުވާލަކީ ތިބާ އޭނާ ރުޅިއަރުވާނީހެއްޔެވެ؟ ނޫނީ އޭނާގެ ރުހުން ހޯދަން މަސައްކަތްކުރާނީހެއްޔެވެ؟ ތިބާ މީހަކުދެކެ ލޯބިވެގެން އުޅޭނަމަ އެމީހަކާއި އަޅުވައިވެސް ހަަމ މިދެ ސުވާލުކުރެވިދާނެއެވެ.
އަހުރެން ހިތުން މި 2 ޙާލަތުގައިވެސް ޖަވާބަކަށްވާނީ އޭނާ ރުޅިއަންނާނެ ކަމެއް ނުކުރާނަމެވެ. އަދި މަސައްކަތްކުރާނީ އޭނާގެ ރުހުން ހޯދާށެވެ!
ދެން އަހަރެމެން މިބުނަނީ ﷲ ތަޢާލާއަށް ބިރުވެތިވާކަމަށާއި ލޯބިވެސްވާކަމަށެވެ. އެއީ އިޚްލާޞްތެރިކަމާއިއެކު ބުނެވޭ ބަހެއް ނަމަ ﷲ ތަޢާލާ ރުހިވޮޑިނުގަންނަވާނެ ކަމެއް ކުރާނެހެއްޔެވެ؟ ﷲ ތަޢާލާގެ ރުހިވޮޑިގަތުން ހޯދަން މަސައްކަތް ނުކުރާނެ ހެއްޔެވެ؟ ކުރާނަމަ ތިއަބުނާ ބަހުގައި އޮތީ ކޮން އިޚްލާޞްތެރިކަމެއް ހެއްޔެވެ؟
މީސްތަކުންނޭވެ! ހިފާ ރޯދަ ރޯދައަކަށް ހެދޭނީވެސް އަދި މި ރަމަޟާން މަހު ﷲ ތަޢާލާ ފާފަތައް ފުއްސަވައި ދެއްވަވާ އަޅަކު ކަމުގައިވެވޭނީވެސް މިކުރާ ދެ ސުވާލަށް ވިސްނައިލެވިގެންނެވެ. ﷲ ތަޢާލާއަށް ބިރުވެތިވެވިގެންނެވެ. ﷲ ތަޢާލާގެ ރުހިވޮޑިގަތުން ހޯދަން މަސައްކަތްކުރެވިގެންނެވެ.
އެގޮތުން ކުރަން އޮތް ހަމައެކަނި ކަމަކީ މިސްކިތުގައި ނުވަތަ މުސައްލަމަތީގައި ކުރާ އަޅުކަމެއް ނޫނެވެ. ނިކަމެތިންނާއި ބައްދަލުކުރަން އެބަޖެހެއެވެ. އެމީހުންގެ ޙާލު ބަލައި އެހީތެރިކަން ފޯރުކޮށްދޭން އެބަޖެހެއެވެ. އެހެނީ ނިކަމެތި ޙާލުގައި އެތިބީވެސް ﷲ ތަޢާލާގެ އަޅުންނެވެ. ތިބާފަދަ އަޅުންނެވެ.
- އިސްލާމީ ތިލަފަތުގެ ދަރުސަކުން
