މިއަދު އަހުރެމެންގެ ތެރެއިން ގިނަ ބައަކަށް އޮތް އެންމެ ބޮޑު އެއް މައްސަލައަކީ އިޙްޞާންތެރިކަން ނެތުމެވެ. މިއީ އެއްވެސް ވަރަކަށް ޝައްކުކުރަން ޖެހެންވީ ކަމެއްވެސް ނޫނެވެ. ވިސްނައިފި ކޮންމެ މީހަކަށް އެނގިޔަޤީންވާ ކަމެކެވެ.
އެމީހެއްގެ ކިބައިގައި އިޙްޞާންތެރިކަން ހުރިނަމަ ﷲ ތަޢާލާ ރުހިވޮޑިނުގަންނަވާނެ އެއްވެސް ކަމެއް ކުރަން ބިރުގަންނާނެއެވެ. ފާފައެއްކުރަން ބިރުގަންނާނެއެވެ. އަދި ނަފްސުގެ ބަލިކަށިކަމުން ފާފައެއް ކުރެވުނަސް ތައުބާވުމަށް އަވަސްވެގަންނާނެއެވެ.
އިޙްޞާންތެރިކަމަކީ ﷲ ތަޢާލާއަށް ބިރުވެތިވުމަށް އޮތް މަގެވެ. އެހެނީ އިޙްޞާންތެރިއަކަށް ވެވިއްޖެނަމަ ތިމާކުރާ ކޮންމެ ކަމެއް ﷲ ތަޢާލާ ވަޤުތުން ބައްލަވައިވޮޑިގެންވާކަން އިޙްޞާޞްކުރެވޭނެއެވެ. ނަތީޖާއެއްގެ ގޮތުން ހަމައެކަނި ބިރުވެތިވެވޭނީއެއް ނޫނެވެ. ލަދުވެތިވެސްވެވޭނެއެވެ.
ﷲ ތަޢާލާ ރުހިވޮޑިނުގަންނަވާ ކަންކަން ނުވަތަ ފާފަކުރުން ހުއްޓާލަން ބޭނުންވާ މީހާ އިޙްޞާންތެރިކަން އިތުރުކުރަން މަސައްކަތްކުރާށެވެ. އިޙްޞާންތެރިކަމަކީ ކުރިން މިބުނި ފަދައިން ތިމާކުރާ ކޮންމެ ކަމެއް ﷲ ތަޢާލާ ވަޤުތުން ބައްލަވައިވޮޑިގެންވާކަމާއި އަދި ދެކެދެނެވޮޑިގެންވާކަން ޤަބޫލުކުރުމެވެ.
- އިމާމް ޢުމަރު ސުލައިމާންގެ ދަރުސަކުން
