މައިންބަފައިން ނުވަތަ އެކަނުން އެކަކުނަމަވެސް ދުނިޔޭގައި ހުރެ މުސްކުޅިވާދުވަހު ދަރިން އެމީހުން ނުބެލުމުގެ ހުރި ނުބައިކަމުގެ ބޮޑުކަން ނިކަން ދެކިބަލާށެވެ!
ﷲ ގެ ރަސޫލާ މުޙައްމަދު ޞައްލަﷲ ޢަލައިހިވަސައްލަމަ ވަނީ އެމީހަކު "ގެއްލި ނިކަމެތިވެ ހަލާކުވެއްޖެ" ކަމަށް ވިދިވިދިގެން 3 ފަހަރު ޙަދީޘްފުޅުކުރައްވަވައިފައެވެ. އަދި އެއީ އެމީހާއަށް ސުަވރުގެ ނުވަދެވިދާނެ ޢަމަލެއް ކަމަށްވެސް ޙަދީޘްފުޅުން އެނގެން އެބައޮތެވެ.
ތިރީގައިވާ ޙަދީޘްފުޅު ބައްލަވާށެވެ!
މައިންބަފައިންނަށް ހެޔޮކޮށް ހިތުމަކީ ސުވަރުގެއަށް ކޮށޭ މަގެކެވެ.
ނަބިއްޔާ ﷺ ޙަދީޘްކުރެއްވިއެވެ.
«رَغِمَ أَنْفُ، ثُمَّ رَغِمَ أَنْفُ، ثُمَّ رَغِمَ أَنْفُ»، قِيلَ: مَنْ؟ يَا رَسُولَ اللهِ قَالَ: «مَنْ أَدْرَكَ أَبَوَيْهِ عِنْدَ الْكِبَرِ، أَحَدَهُمَا أَوْ كِلَيْهِمَا فَلَمْ يَدْخُلِ الْجَنَّةَ» [رواه مسلم 9 - (2551)]
މާނައީ: “އެ މީހަކު ނިކަމެތިވެ ގެއްލި ހަލާކުވެއްޖެއެވެ. ދެންވެސް އެ މީހަކު ނިކަމެތިވެ ގެއްލި ހަލާކުވެއްޖެއެވެ. ދެންވެސް އެ މީހަކު ނިކަމެތިވެ ގެއްލި ހަލާކުވެއްޖެއެވެ."
އެކަލޭގެފާނަށް ދެންނެވުނެވެ. އޭ ﷲ ގެ ރަސޫލާއެވެ! އެއީ ކާކުތޯއެވެ؟ ޙަދީޘްކުރެއްވިއެވެ.
"އެއީ އެ މީހެއްގެ މައިންބަފައިން މުސްކުޅި ޙާލުގައި، އެ ދެ މީހުން ނުވަތަ އެއިން އެކަކާ ބައްދަލުވެ (އޭނާ އެބައިމީހުންނަށް ހެޔޮކޮށް ނުހިތުމުން) އޭނާއަށް ސުވަރުގެ ނުވަދެވުނު މީހާއެވެ."
- ޙަދިޘްފުޅާއި މާނަ: ޝައިޚް ޢިމްރާން މުޙައްމަދު ޢަލީ
